Liggaeuq “sam nyied sam” dwg “ciet hawfwen” Cingsih yienhsingz caeuq gwnzgai gaglingh aen yanghcin, gyoengqde cingmingz sauqmoh, “sam nyied sam” couhdwg “ciet sauqmoh” lajmbanj Cingsih Si, ngoenzneix ranzranz cungj naengj haeuxnaengj haj saek, nyumx gyaeq hoengz gyaeq maeq, angq gvaq ngoenzciet. Ndaw- biengz seizneix lij cienznaeuz aen gojgaeq cienzgeiz ndeu.

Gaxgonq, Cingsih miz boux Bouxbuengh ndeu heuhguh Daeggvei, de youq lajfwngz vuengzdaeqdoj guh cwngzsieng. De coengmingz youh maenh’ak, mbouj lau giengzgienz, haengj bang yinzminz gejnanz.

Bi ndeu mbwn rengx youqgaenj, beksingq mbouj miz haeux sou, saedceij gvaq ndaej gig hoj. Daeggvei gvih cingj vuengzdaeqdoj mienx bek- singq gyau vuengzliengz. Vuengz- daeqdoj fouznaih cij ndaej doengzeiq, hoeng de haemz Daeggvei yaek dai, ciengz ra saeh yaek cawz Daeggvei bae.

Ngoenz ndeu, vuengzdaeqdoj heuh Daeggvei daeuj, buenq hai da naeuz: “Gou cingq laeb aen bam he, mbouj miz vax, dingq naeuz naengvunz Cingsih baenz guh vax, gou heuh mwngz youq 60 ngoenz ndawde aeu 900 mbaw naengvunz daeuj guh vax, banh mbouj daengz couh yiemzleih dwk fad mwngz.” Daeggvei dap naeuz:“Ndei ha.” 59 ngoenz gvaqbae lo, Daeggvei cungj mbouj miz saek di doenghdanh. Geizhanh daengz le, Daeggvei couh comz 900 bouxsai, hawj gyoengqde cungj dawz gijgwn daeuj daengz laj vuengzsingz, naengh youq naj bakdou singz cawj gwn. Gyoengqde gwn laeuj gwn raemxdang lwgmanh le, bouxboux hanh dumz gyaeuj. Vuengzdaeqdoj ganj daengz le, Daeggvei naeuz:“Huq gaenq soengq daeuj lo, hoeng gij naeng neix cungj roh raemx, mbouj baenz yungh.” Vuengzdaeqdoj baez yawj, bouxboux naengnoh cungj dwg mbaeqmbatmbat, caemhcaiq miz heiqhaeu coemj ndaeng vunz dem, vuengzdaeqdoj goemq ndaeng nyaeuq bwnda doiqlaeng geij yamq le couh bae’ngwtngwt lo.

Yaek daengz cingmingz le, vuengzdaejdoj youh heuh Daeggvei daeuj daengz dangqnaj naeuz:“Ciet cingmingz yaek aeu aen gyaeujmou ndeu, lumj aen bya baihlaeng aen gungdienh haenx baenzneix hung daeuj caeq cojcoeng, 30 ngoenz ndawde mwngz aeu dawz okdaeuj, mboujnex yiemzleih dwk fad mwngz.” Daeggvei riu naeuz: “Ndei ba.” 30 ngoenz gvaqbae lo, Daeggvei lijdwg mbouj miz maz doenghdanh. Geizhanh daengz le, vuengzdaeqdoj baij bing daeuj gaeb Daeggvei, Daeggvei gwed ganj caengh hung ndeu caeuq gyoengq bing itheij bae raen vuengzdaeqdoj. De naeuz:“Vuengzdaeq, Mbanjcuengh miz haujlai gyaeuj mou beij goengqbya lij hung, cingj mwngz sien caengh goengq bya neix miz geijlai naek, gou caiq bae aeu gyaeujmou caeuq goengq bya neix ityiengh naek haenx daeuj hawj mwngz.” Vuengzdaeqdoj baez dingq Daeggvei baenzneix gangj, ngoemxngwd lo.

Couhcinj dwg yienghneix, vuengzdaeqdoj lijdwg gietdingh aeu cawz Daeggvei bae, de youh siengj aen geiqdoeg ndeu okdaeuj. De heuh Daeggvei daeuj daengz dangqnaj naeuz:“Daeggvei, caiq gvaq ndwen he Vuengzhouq couh yaek naenghndwen lo, dingqnaeuz gyaeq gaeqboux gig miz yingzyangj, mwngz 20 ngoenz ndawde dawz 490 aen gyaeq gaeqboux daeuj, mboujnex couh hawj mwngz dai.” Daeggvei dapwngq lo. Geizhanh gvaq le, vuengzdaeqdoj baij bing bae gaeb Daeggvei, Daeggvei lienzmuengz doiq gyoengq bing naeuz:“Caen dwg doiq mbouj hwnj, gou cingq naenghndwen, ciuq gvigawj, gou aeu caetcaet seiqcib gouj ngoenz le cij ndaej ok dou, daengz seizhaenx gou couh dawz gyaeq gaeqboux soengq bae hawj vuengzdaeq.” Bouxdaeuz gyoengq bing hat naeuz:“Lajmbwn bouxsai baenzlawz rox seng lwg ne?” “Bouxsai mbouj rox seng lwg, gaeqboux youh baenzlawz rox ok gyaeq la?”

Daeggvei swnh raemx cauh ruz naeuz, bouxdaeuz gyoengq bing mbouj miz vah gangj lo, cijndei baema bauq hawj vuengzdaeqdoj. Vuengzdaeqdoj gig ndatheiq, roengzlingh bae gaeb Daeggvei. Ngoenzhaenx dwg liggaeuq sam nyied cosam, beksingq rox le, yo Daeggvei youq ndaw ndoeng faexraeu gwnz goengq bya he. Gyoengq bing hwnj bya bae saeuj, ra mbouj ndaej Daeggvei, couh humx goengq bya haenx hwnjdaeuj. Vuengzdaeqdoj aeu Daeggvei dai de cij gamsim, doek- laeng couh roengzlingh diemj feiz coemh bya. Vuengzdaeqdoj caeuq gyoengq bing baez byaij, beksingq cij youq congh gofaexraeu ra raen seihaiz Daeggvei, caezgya raemxda lae hoemq seihaiz Daeggvei caez. Bilaeng, gwnz moh Daeggvei hwnj miz baenz go baenz go gofaexraeu daeuj.

Vihliux geiqniemh Daeggvei, gyoengqvunz youq henz moh Daeggvei laeb aen miuh ndeu. Moix daengz ciet cingmingz roxnaeuz sam nyied sam, gyoengqvunz couh dawz haeuxnaengj haj saek、laeuj、nohgaeq、nohmou、yieng 、saceij doengh gij doxgaiq neix bae caeq Daeggvei, lij youq henz miuh eufwen danq dem, fungsug neix hix ndaej cienz roengzdaeuj lo.