Seizgan：Ciuhneix

Diegdeih：Ndawranz

Boux ndawheiq：Daegdenz, vunzsai, 30 lai bi, diuzgaijyenz ndaw mbanj.

Aucibsam, vunzsai, 40 bi, boux

guhnaz.

Simjcibsam, mehmbwk, 35 bi, yah

Aucibsam.

(Daegdenz genjdanh heuh “Denz”, Aucibsam genjdanh heuh “Au”, Simjcibsam genjdanh heuh “Simj”)

Baijgingj: (Ndaw ranz Aucibsam)

Hai muq: (Simj hwnj)

Simj:

Gwn ngaiz nanz caemh moj,

Ok haex hoj caemh gumz,

Daraen dwg raemxhoemz,

Dai mbouj goemz gyaeuj ndoet！

(Au hwnj)

Au:

Yah rwix baenz duzguk,

Nyapnyuk siengj gyaep deuz,

Lumj duzma duzmeuz,

Mbouj deuz baenzlawz gvaq?

(Daegdenz hwnj )

Denz:

Ngoenzngoenz raen doxceng,

Rox byawz deng byawz loek,

Boux naeuz boux yakdoeg,

Ceng lai boek gyaranz.

(Bongxdou: Dugdugdug)

Simjcibsam: (hozgaet) Mbouj miz

vunz youq ranz!

Denz: Hai dou, gou dwg boux diuzgaijyenz cunhveij——Daegdenz.

(Au hai dou)

Simj: Daegdenz, mwngz daeuj ndaej ngamj lo.

Song dou yaek lizvaen,

Mbouj gaen de gwnheiq,

Nem de gvaq saedceij,

Ngoenz mbouj ndaej anningz.

Mbouj youq ndaej cix sanq,

Sikhaek banh soujsuz;

Gvanbaz mbouj doxhuz,

Caemh aen ruz yungyiemj.

Denz:

Haeuj dou nyi hemq liz,

Dauqdaej miz maz saeh,

Sou gaej byaij bouh neix,

Genj daihngeih diuz roen.

Au:

Ngoenz youq rog dwgrengz,

Dauq ranz deng gwnheiq,

danghnaeuz mbouj miz maex,

Lij gvaq ndaej lai soeng.

Yahrwix gou mbouj ngah,

Mbouj ndaej gvaq doxndei,

Ngoenz ceng song sam baez,

Hoj caez youq saek yaep.

……

Simj:

Gag mwngz dwgrengz gvaq,

Mwngz gaej baj gou ngawz,

Lwgnyez byawz guh dawz,

Buhvaq byawz guhsaeg.

Mwngz ndaek neix fatbag,

Bwt ma dag sim vunz,

Donq cawj hawj mwngz gwn,

Lij ngeiz vunz dwk doeg.

(caengz sat)