5 nyied 19 hauh, aen gaihmusiz cawjhoihciengz Nanz- ningz ngoenzlijyouz Cungguek nem cietciengxndang Sanglinz bi 2016 youq Sanglinz Yen gawjbanh. Baez hozdung 25 ngoenz neix aeu “lijyouz coi hwngfat, lijyouz daiq banghoj” guh cawjdaez, doenggvaq langhbaij fungsug fungcingz Bouxcuengh、langhbaij huq lijyouz、guh hozdung ciengxndang daengj, hawj vunzlai roxyiuj vwnzva gyaeraez nem fungsug Bouxcuengh Sanglinz.

Sanglinz Yen ndaej vunzlai haenh baenz “gizdieg Ciz Yazgwz ceiq niemh he”“aen suenbyaek Nanzningz”, gaenh geij bi gvaq- daeuj, aen yienh neix haenqrengz ca swnghdai lijyouz gensez, dajcaux gizneix baenz ranzlaux Bouxcuengh ceiq habngamj ciengx vunz he.

Sanglinz Yen diegyouq baih cungnamz Guengjsae, daengx yienh miz 50 fanh vunz, miz Cuengh、Gun、Yauz、Myauz daengj 12 aen minzcuz, ndawde bet cingz dwg Bouxcuengh. Gizneix faex ndaet mbwn seuq raemx saw, ma daengz gizneix, bouxvunz sikhaek simsangj dangqmaz.

Youq seizdaih Sinhsizgi, Sanglinz Yen Dangzhungz Yangh Sizmwnz Cunh couh miz vunz youq. 1300 bi gaxgonq, Bwzhih Cin couh baenz cwngci、ginhsw、ginghci、vwnzva cungsim, seizneix gizhaenx lij miz song gaiq sigbei gaek miz Sawndip, dwg dangqnaj fatyienh gij saw Bouxcuengh ceiq caeux he.

Sanglinz Yen miz Mehgud vwnzva、saegoeng vwnzva、fanh- souh vwnzva、Ciz Yazgwz vwnzva daengj conzdungj vwnzva gig miz daegsaek. Cinghcauz ndawbi Ganghhih, ndaw yienh couh miz vunz Bouxcuengh eu fwen, gij fwen haenx it singbouh、song singbouh、sam singbouh、lai singbouh cungj miz, ndei dingq raixcaix. Doengzseiz, fouxgyong- lingz、gyong Mbanjyauz、heiq- saegoeng daengj hix ndaej bouxhek haenh ndei, seizneix ndaw yienh dan fouxsaegoeng couh miz 300 cungj.

Ndaw yienh Sanglinz namh biz raemx lai, ceiq habngamj guh hongnaz caeuq dajciengx, haeux- naz、nonsei、batgak、mbawcaz、yiengzbya daengj cungj gig okmingz, ndawde haeuxnaz caeuq batgak lij ndaej baenz guekgya deihleix byauhci baujhoh canjbinj dem. Dangqnaj daengx yienh 1000 lai cungj doenghgo ndaej leihyungh, hwngfat swnghdai daegsaek nungzyez caeuq ciengx- ndang gengangh canjnieb dangqnaj ronghsag.

Gwn ndei youq onj vunz minghgyaeu, daengz bi 2011, daengx yienh couh miz 63 bouxgeq nienzgeij gvaq 100 bi, boux ceiq minghgyaeu ndaej 115 bi lo. Bi 2012, Sanglinz Yen ndaej bingzguh Mbanjranz Minghgyaeu Cungguek.

Sanglinz lijyouz swhyenz fungfouq, Daihlungzhuz Gingjgih bya geiz raemx gyaeu, ndaw bya miz raemx, ndaw raemx miz bya, ndei yawj raixcaix; Mingzcauz bouxbaeyouz Ciz Yazgwz ceiq niemh Sanglinz lo, de youq gizneix dingz le 54 ngoenz. Lijmiz haujlai diegyouz ndei dem, lumjbaenz Mbanjmingzguj、Yasuijyenz daengj, hawj bouxyouz daeuj le cungj lumz dauqma.

Gak cungj ngoenzciet Sanglinz hix gig lai, ciuq conhgyah gaujcwng, Mehgud Dangzhungz Yangh Sizmwnz Cunh dwg dieggoek Cuhgyangh Liuzyiz Lungzmuj vwnzva, dwg dieggoek ngoenzciet Guengjsae“sam nyied sam” Bouxcuengh. Cietlaeuj- daeng Bouxcuengh、cietmehgud、cietfanhsouh、cietdadnoh daengj cungj miz gij vwnzva saenqsik lizsij、ginghci、cunghgyau、yijyenz、yisuz gak minzcuz.

Bi 2013 ndwen 7, Sanglinz ndaej baenz Guengjsae bueknduj daegsaek lijyouz mingzyienh caux- guh danhvei, ndaw yienh miz song aen gingjgih ndaej baenz 4 A gaep gingjgih, bi 2016 ndwen 2, youh ndaej liedhaeuj bueknduj “guekgya daengxrangh lijyouz sifangih” cauxguh danhvei.

Gwndaenj youq Sanglinz, ciengxlaux daengz Sanglinz, Sang- linz baenz gizdieg ceiq habngamj ciengx vunz he.