Daxmeh yaek 50 bi lo, byoem de lij lumj lwgraz ndaem raixcaix. Ciuq gou naeuz, daxmeh gou vanzlij lumj boux dahsau nei gyaeundei.

Gou baenz bi youq baihrog doegsaw, ciengzciengz buenq bi cij ndaej dauqma baez ndeu. Aenvih bi neix aeu ma lajmbanj saedsib, gou couh caeuxcaeux ma daengz ranz lo.

Daxmeh seizneix cingq youq cazgij sij saw, raen gou daengz ranz, couh cam gou:“Gij cih naeuz seizgan gvaq ndaej vaiq baenzlawz sij ne?” Gou gaem bit couh sij, caemhcaiq doiq de naeuz:“Lienz aen cih neix cungj sij mbouj ok, baenzlawz guh vunz lauxsae ne?” Daxmeh gou najriu dwk naeuz:“Gou laux lo, geiq mbouj ndaej baenzneix lai doxgaiq lo, mwngz yawj byoem gou lij miz geijlai geu dwg ndaem?” Gou raen de byoem lumj mbwn haemh、da lumj ndaundeiq, miz gyawz lumj bouxlaux? Haengjdingh dwg gangjriu.

Ngoenzlaeng, daxmeh bae cauhsi cawx byaek. Mbouj rox vihmaz de angqyangz okbae, hoeng saetmuengh ma ranz. Gou cam de dwg mbouj dwg doek ngaenz lo, de ngauz gyaeuj; cam de dwg mbouj dwg deng boux- guhyaeuh, de ngauz gyaeuj. Gou doeklaeng cam de dauqdaej miz maz saeh, de cij menhmenh gangj:“Gou bae ndaw cauhsi cawx byaek, dawz byaek bae suenq ngaenz, hawj ngaenz liux couh ce youq gwnz daiz lo, lumz dawz dauqdaeuj, byaij daengz ranz yaek cawj seiz cij rox. Haemhneix raeuz mbouj miz byaek daeuj cawj gwn, cij ndaej okbae gwn faenj lo. Gou caeuxcaeux couh gangj, gou laux lo, mbouj lumj sou bouxoiq geiq ndaej maenh.”

Gou caiq ngonz naj daxmeh, doq aekdiuq mbouj dingh, henz gakda de cungj nyaeuqnyatnyat, caiq mbouj dwg yienghceij doenghbaez ndawsim gou geiq yienghhaenx lo, seizneix gou cij roxnyinh daengz: Daxmeh caen laux lo.

Miz haemh he gwn ngaiz gvaq, gou lij miz saeh aeu bae bangunghsiz guhhong. Yaek ok bakdou youh ngeixhwnj mbouj caengz daiq ngaenz. Caiq haeuj dou seiz, daxmeh cingq naengh gwnz daengqeij swiq byoem de. Vihmaz de aeu youq rogding swiq ne? Ndawsim gou cingq geizgvaiq seiz, gou yawjraen gij doengjgvih cazgij haiok, gwnz daiz miz geij aen bingz gou mbouj caengz raen gvaq. Hoengheiq ndaw ranz haeurad, miz cungj heiq yw vayoz he. Daxmeh raen gou dauq, rox muenz mbouj gvaqbae lo, couh dingz fwngz doiq gou riu dwk gangj:“Gou laux lo, byoemgyaeuj gaenq bienq hau caez, cijndei nyumx gyoengqde ndaem gaenq lo.”

Ndaw ding daeng ronghsag lumj ndit, ciuq ndaej gou naj ndat da moengz. Seizneix caiq yawj byoem daxmeh, hausek lumj nae. Gou cang guh mbouj miz maz, doiq daxmeh naeuz:“Gou dauqdaeuj dawz ngaenz, mwngz laebdaeb nyumx ba.” Baez ok bakdou, lwgda gou caiq gaem mbouj maenh raemxda, lumj fwncin doek roengz nei mbouj miz sing.

Yenzlaiz byoem daxmeh ndaem- dwt cijdwg gyajsiengq. Daj haemhneix hwnj, gou caiq hix lumz mbouj ndaej byoem daxmeh hausek lumj nae, de gaenq bienq laux lo, gaxgonq cungj dwg de daeuj ciuqgoq gou, gvaqlaeng daengz gou bae goqhoh de lo.