“Lueggaeuhung” dwg mingz Cuengh, mingz Gun heuhguh “Dadwngzgyaz”.

Lueggaeuhung dwg duenh baihlaj Dahgenzgyangh, youq yienh Vujsenh caeuq singz Gveibingz giz doxgap lueg bya rangh dah haenx, dwg duenh dah lueg bya ceiq hung、 ceiq raez、 ceiq okmingz dieg Guengjsae. Gizneix miz ndoi hung、 bya daengj、 raemx laeg、 dan yiemj、 gingj lengj daengj daegdiemj, vunzlai haenh dwg “Sanhgyaz” Guengjsae (“Sanhgyaz” dwg duenh Dah- cangzgyangh okmingz ndeu).

Lueggaeuhung bakhaeuj daj Danlaegmax suenqguh, gizneix cingq dwg aen baksok geq yienh Vujsenh—— Soklaegmax. Bakok gizhaenx heuhguh dan Nujdanh, gizneix caeuq singz Gveibingz gek mbouj gyae lo, Lueggaeuhung gwnzlaj raez 41 cienmaex.

Ciuhgeq cienz gangj, Lueg- gaeuhung yienzbonj miz diuz gaeu hung ndeu vang gvaq song mbiengj dah, ngoenz caem haemh fouz, vunz yamq gwnz gaeu cix byaij ndaej gvaq dah, ndigah vunzlai heuh duenh dah neix guh “Lueggaeuhung”.

Ndwn youq gwnz Danlaegmax bakhaeuj Lueggaeuhung, swnh raemx muengh bae, hamq baihbaek dwg Byagaeuhung, hamq baihnamz dwg Byalaegmax, song bya doxdaengj, yiengh lumj bakdou hung. Caiq muengh gizgyae bae, rangh dah Lueggaeuhung song mbiengj bya- ndoi youh na youh sang, hamq baihbaek miz bya’gyoengq Dayauz- sanh, hamq baihnamz miz bya- gyoengq Lenzvahsanh. Gizneix, “Bya’gyoengq gab diuz dah, raemx gvaq geh ndonj bae.”

Lueggaeuhung, lumj diuz mae gimhenj ndeu, dawz song gaiq diegbingz nangqrangh hwnjdaeuj, baihgwnz nangqrangh diegbingz Vujsenh, baihlaj nangqrangh dieg- bingz Gveibingz. Diuz mae gimhenj neix hix dawz haujlai aen singz hung nangqrangh hwnjdaeuj, baihgwnz nangqrangh Liujcouh、 Namzningz daengj, baihlaj nangqrangh Vuz- couh、 Gvangjcouh、 Yanghgangj、 Aumwnz daengj. Duenh dah lumj gim baenzneix dijbauj neix, hwnzngoenz ruzhang ruzfaex youzledled, huq gai huq cawx yinh bae yinh dauq, gwnz dah nyaengq raixcaix.

Lueggaeuhung, gingjsaek lengj- lili, bya heu faex loeg, mbanj Cuengh、 mbanj Gun、 mbanj Yauzcuz sanq youq bangx ndoi dinbya. Gaxgonq, bya’ndoi saek- nyannyan, vunzmbanj hojsensen. Seizneix, ndwenngoenz ndei gvaq lo, mbanj doeng lohsuijniz, ranz guhbaenz laeuz moq. Loh moq heux bya lumj lungz foux, ranz gaeuq sauq seuq hawj hek youz.

Mingzcauz boux okmingz dilijyozgyah Ciz Yahgwz, naengh ruz youz gvaq Lueggaeuhung, haenh gizneix ndoi na、 bya daengj、 raemx laeg、 dan yiemj、 gingj lengj, de yungh Sawgun yienghneix sij naeuz “两岸山势高耸，独冠诸峰，时有山峰悬峙”. Aenvih Lueggaeuhung bya sang lueg yiemj, diegdeih youqgaenj, soqlaiz cungj dwg gizdieg bouxbing cengciemq. Gaxgonq, Lueggaeuhung deng gaij heuhguh “Lueggaeugoenq” gvaq, youh deng gaij heuhguh “Luegcungjdoeng” gvaq. 1974 nienz lingjsiu hungmbwk raeuz Mauz Cwzdungh, caenbit vih Lueg- gaeuhung sij Sawgun “大藤峡” sam aen cih.

Seizneix, Lueggaeuhung cingq haiguh Dadwngzgyaz Suijli Suhniuj Gunghcwngz, gvaqlaeng Lueg- gaeuhung couh baenz aen daemz hung ndeu lo, daengz seizhaenx, Lueggaeuhung youh bienqbaenz lingh cungj gingjsaek moq lo.