Mwngz naeuz gou mbouj naek,

Yawj saeknaj cij rox,

Boh cam baenz maz bingh,

Naj nding daengz goekrwz.

Mwngz naeuz gou mbouj naek,

Yawj saeknaj roxndeq,

Meh cam gou aeu vah,

Bak aj mbouj miz coenz.

Mwngz naeuz gou mbouj naek,

Laep da ciz baenz fangz,

Naemj daengz mwngz couh gvangh,

Ndang fouz lumj yiuhrumz.

Mwngz naeuz gou mbouj naek,

Laep da couh raen ngaeuz,

Vunz guh’angq bae youz,

Sim gou fouzfangfang.

Naek mwngz lumj naek va,

Youq giz sang ngafaex,

Fwngz mbaet mbaet mbouj ndaej,

Faex fad fad mbouj daengz.

Naek mwngz lumj naek va,

Hai youq giz fag dah,

Aj fwed mbouj ndaej mbin,

Yaek dienzminj benq dah.

Naek mwngz lumj naek gim,

Da cim mbouj ndaej aeu,

Naek mwngz lumj naek haeux,

Caeuz ngaiz mbouj ndaej noix.

Naek mwngz lumj naek gim,

Da raen sim gig maij,

Naek mwngz lumj naek ngaiz,

Yaek dai lij gwn amq.

Gou naek mwngz lailai,

Dai sam ngoenz ndaw mbonq,

Boh fonj gyaeuj dauq din,

Sim diuq ndang mbouj doengh.

Gou naek mwngz lailai,

Dai sam ngoenz gwnz congz,

Meh heuh bae guh hong,

Gou gongz lumj boux bingh.

Gou naek mwngz lailai,

Ngaiz mbouj gwn hix imq,

Ngeix mwngz laeuj mbouj cimz,

Sim cieg lumj feiz coemh.

Gou naek mwngz lailai.

Byaeknoh mbouj ngah gwn,

Naemj mwngz gizgiz lwnh,

Fangzhwnz hix rox riu.