Ngoenzsinghgiz, gou youq gwnz laeuz yawj densi. Sawqmwh, laj laeuz cienz daeuj sing “caca”. Gou gig geizheih, siengj rox dwg gijmaz yiengj, couh buet roengz laeuz bae yawj.

Gou yawjraen gwnz diegnywj miz geij duz gaeqmeh aeu nyauj viq namh, viq le haujlai nanz, gou raen mbouj miz maz ndei yawj, ngamq siengj byaij bae, sawqmwh, gaeqmeh youq ndaw namh de viq haenx ringx bae ringx dauq, yienzhaeuh youh yunghrengz bek doiq fwed baet aenndang de. Gou naemj: Gaeqmeh vihmaz viq namh ne? Vihmaz youq ndaw namhfaenx ringx bae ringx dauq ne? De vihmaz youh yungh rengz bek doiq fwed baet aenndang ne?

Gij vwndiz neix gou mbouj mingzbeg, couh bae cam daxboh. Daxboh naeuz:“Gou mbouj rox bw, mwngz bae cam daxgoeng”. Gou youh cam daxgoeng, daxgoeng gou hix mbouj rox dapanq. Loengh mbouj mingzbeg ndaw sim gou gig mbouj ndei souh. Gou sawqmwh siengj daengz hwnj dennauj bae caz dapanq.

Gou sikhaek bae hai dennauj, gwnz dennauj gangj, gwnz ndang duzgaeq miz cungj non ndeu sup lwed de. Duzgaeq youq ndaw namhfaenx ringx, hawj namhfaenx cungj nem gwnz ndang de, bwn gaeq couh nyungq lo. Yienzhaeuh, duzgaeq yunghrengz bek fwed saeuj ndang, duznon gwnz ndang couh doek roengzdaeuj lo. Vih- liux niemhcingq aen dapanq neix，gou youh bae caz bonj saw 《 Cib Fanh Aen Vih Gijmaz》, gwnz saw gangj gij eiq- sei haenx caeuq dapanq gwnz dennauj ityiengh.

Swnghhoz fuengsik doenghduz gig mizyinx, raeuz aeu lailai bae cazyawj, cij miz fatyienh, miz soundaej.

（指导老师：陈静）