5 nyied 14 hauh, 2016 Cungguek·Lungzanh ciet lijyouz vwnzva “naz” nem ciet hongdawz “seiq nyied bet” youq Namzningz Si Lungzanh Yen Nazdungz Cin hainduj, vwnzva “naz” gig miz daegsaek Bouxcuengh naekna, yinx ndaej haujlai hekyouz daeuj yawjngonz youzcet. Aen ciet lijyouz neix laebdaeb daengz 5 nyied 16 hauh, hozdung neiyungz fungfouq, ndeiyawj raixcaix.

Gwnz gaihmusiz, baenzdauq vwnzva “naz” conzdungj minzsuz cezmuz ronghsien——foux lungz foux saeceij hoh ciet、 gouz fwn yizsi、 caeqbaiq hongdawz、 gingq vaiz yizsi daengj, gij ceiq ndei vwnzva “naz” nyuenz miz neix, yinx ndaej bouxyawj bekfwngz haenhndei. Ngoenzhaenx, yienhsingz lij miz diuz gai gijgwn ndei dem. Gwnz gai baij rim gijgwn ndei ndawbiengz miz Lungzanh bonjdieg daegsaek haenx, hawj guengjdaih hekyouz daejniemh vwnzva “naz” naekna, doengzseiz cimz le gijgwn ndei Lungzanh gig miz daegsaek haenx, roxnyinh gij yiedcingz gyaez hek Lungzanh.

（Lij Ginz Dangz Ciuhyen Nungz Gencangh）