Cietsingqdanq daengz lo, beix Bauj Loz soengq de gyaq ci moq ndeu. Ngoenzde, de lizhai bangunghsiz seiz, miz boux nyezsai he youq henz ci moq de cienj bae cienj dauq, lij cam de:“Daxau, gyaq ci neix duh mwngz? ”

Bauj Loz ngaekgyaeuj naeuz:“Dwg a, aen neix dwg gij saenzcingz cietsingqdanq beix gou soengq hawj.”

Nyezsai neix doeksaet caez, mbajdwddwd dwk cam:“Mwngz naeuz gyaq ci neix dwg beix mwngz soengq hawj mwngz, mwngz mbouj yungh ok faen ngaenz ndeu? Gou hix maq- muengh ndaej……”

Bauj Loz nyinhnaeuz de maq- muengh hix miz boux beix he soengq de gyaq ci ndeu, hoeng gij vah nyezsai neix gangj hawj ndawsim Bauj Loz gig saenqdoengh.

“Gou maqmuengh swhgeij ndaej bienqbaenz boux beix he soengq gyaq ci ndeu hawj nuengx.” Nyezsai neix laebdaeb gangj.

Bauj Loz yawj nyezsai neix, gij vah cung ok bak daeuj:“Mwngz siengj mbouj siengj naengh ci gou bae youz yaep he?”

Nyezsai neix angq dangqmaz, diemzsubsub dwk naengh hwnj ci. Gvaq yaep he, de cam Bauj Loz:“Daxau, mwngz ndaej mbouj ndaej hai ci daengz baihnaj bakdou ranz gou?”

Bauj Loz riu lo, de naemj naeuz nyezsai neix itdingh siengj coh ranznden de angj, hawj caezgya cungj rox de ndaej naengh ci dauqma. Yaek daengz ranz de seiz, boux nyezsai neix gouz Bauj Loz dingz ci gyawj mbaeklae naj bakdou ranz de di.

Boux nyezsai neix buet hwnj mbaeklae, gvaq yaep ndeu Bauj Loz dingqnyi sing de dauqma, hoeng lumjnaeuz miz di numq. Yenzlaiz de daiq nuengx ga’gvez de okdaeuj, menhmenh cuengq nuengx de youq gwnz mbaeklae, gaenjndaet dwk got nuengx de caemhcaiq vix gyaq ci Bauj Loz naeuz:“Mwngz yawj, gyaq ci moq neix couhdwg gou ngamq caeuq mwngz gangj. Gyaq ci neix dwg beix boux daxau neix soengq hawj de bw! Doeklaeng gou hix rox soengq gyaq ci yienghneix hawj mwngz, daengz seizhaenx mwngz hix ndaej youq cietsingqdanq seiz bae yawj gij doxgaiq gyaeundei conghcuengh bouqdaeuz venj haenx lo.”

Mbouj siengj daengz, gaxgonq Bauj Loz youh cai loeng lo. Bauj Loz roengz ci daeuj umj boux nuengx ga’gvez haenx daengz ndaw ci naengh, caemhcaiq heuh boux nyezsai neix hwnj ci, naengh youq henz ndang nuengx de. 3 boux vunz neix couh hainduj naengh ci bae youz lo.

Haemh cietsingqdanq neix, Bauj Loz cij rox eiqsei gij vah neix——mbouj caengz yawjraen saehcingz caez couh gaej guh gietlwnh!