Youq gwnz roen bae Naz- mbaeklae Lungzci, yaekaeu gvaq Mbanjgimcuk, cijraen henz dourin bakmbanj miz gep baiz sij miz dieg goepingj 《Mbeiguk Yinghyungz》 ndeu, couh swnh gij roenlingq benjrin bin doxhwnj, byaij haeuj dourin hung le, couh yawjraen benq “ranzlae” miz haujlai aen ranzcanx faex doxdaeb doxdep baiz baenz ndeu. Roenbenjrin ngaeuzngeb baenz gep baenz gep iet coh ndaw mbanj swnj daengz gak ranz, ranzcanx ciengzfaex bambenj vaxheu aen daep aen, gij suenbyaek aeu led humx haenx byaek heu va hom, gyoengq vunzmbanj ndangdaenj Bouxcuengh gyaeundei yienhda, yiengh mbanj gaeuqgeq sengcingz youh seuqcingh caezcingj. Daengx mbanj miz gij swhyenz gingjgvanh vwnzva lai cungj lai yiengh, ranzcanx、ndangdaenj、ngoenzciet、faexcuk、nazmbaeklae daengj, yiengh gaeuq- geq de louzce ndaej caezcienz, fungsug fungcingz daegsaek yienhda, 1992 nienz ndaej Lenzhozgoz Gyaugohvwnz Cujciz soengq hawj mingzdaeuz ndei “Yienghndei Mbanjcuengh”, 2007 nienz ndaej Cungguek Gozduj Ginghci Yozvei bingz baenz Cungguek buek daih’it “aenmbanj gingj ndei Cungguek”.

Mbanjgimcuk dieg youq Gveilinz Si Lungzswng Gak Cuz Swciyen Hozbingz Yangh Ginhgyangh Cunh, liz yienhsingz coh baihdoengnamz 20 goengleix gyae, dwg aen Mbanj- cuengh daeuz haeuj Gingjgih Naz- mbaeklae Lungzciz, baiz youq daih’it 13 aen mbanj rangh Lungzciz. Aen- mbanj youq Ciuhmingz satbyai Ciuhcingh codaeuz hwnjguh, ing bya dep raemx daeb hwnj gwnz bodat Byagimcuk, ranzcanx aeu faex benj doqbaenz, gvangq rongh hawqsauj, aen daeb aen baiz doxhwnj gig ndeiyawj, funggek daegbied; Dahgim yaeng’yaeng lae gvaq najmbanj, mbiengj gvaz ndoeng faexsamoeg, mbiengj swix ndoeng faexcuk, miz 154 ranz 700 lai vunz Bouxcuengh daihdaih comzyouq, dwg aen Mbanj- cuengh denjhingz ndeu; go faex- samoeg geq ndaej 300 lai bi ndeu daengj ndwn youq gyang mbanj, gwnz ganjfaex venj aen siengqdeu “Moz Yiz daihvuengz” (boux yinghyungz gojriuz ndawbiengz Bouxcuengh) ndeu, lumj goengbaed hensouj nei hensouj gizneix, caeuq doumbanj gaeuqgeq、aen cingjraemx gaeuqgeq doenghgij rizgeq neix caemhcaez lwnhgangj gij lizsij gyaenanz aen Mbanjcuengh neix.

Ndwn youq ndaw Mbanjgimcuk, ndaej yawjraen gij nazmbaeklae gwnz Byagimcuk doiqnaj mbanj hung- gvangq gyaeundei, sienqdiuz utgoz loq nduen, youh fwt sohswd bongh mad baenaj, sangjswt soengsat, gaiq daeb gaiq lienz baenz benq, ndeiyawj dangqmaz; benq ndoeng faexcuk gwnz dingjbya henz mbanj gvangq baenz fanh lai bingzfanghmij, cungj dwg go’ndok gofaiz, saekgim yinx vunz, rumz baez ci daeuj, baenz benq ndoengfaex yiengjsasa, byaifaex bibuengq baiqyedyed, hawj vunz yawj dwk maezmwd. Hekyouz byaij haeuj ndaw mbanj, bin hwnj ranzcanx, couh ndaej cimz gwn gij “caz Lungzciz” Ciuhcingh cijdan soengq hawj ranz- vunz vuengzdaeq gwn haenx caeuq laeujhaeux aeu raemx Lungzciz siungauz ndaej vunz guekrog haenh dwg “raemxfangz baihdoeng” haenx; haeuxnaengj haj saek、gaeqnaengj mbokcuk、ngaiz mbokcuk doengh gijgwn Bouxcuengh neix feihhom biuhop, vanj、deb、cenj、dawh、beuzgeng faexcuk yiengh “doj” naekgywg. Youq ndaw mbanj, mwngz vanzlij ndaej yawj “fouxdwklongj” “fouxvunjhaz”“fouxgoengsae”“foux- daengqlungz” “fouxlwggyoh” “foux- mbokcuk” doenghgij foux ndawbiengz Bouxcuengh sengcingz sohsed haenx, lij ndaej yawjraen “yizsi coux bawxmoq” daegbied haenx, bae camgya guh’angq “dwkdomq” miz- yinx, bae humx dingq gij Fwencuengh ndei dingq haenx, yiengjsouh gij fungcingz Bouxcuengh gaeuqgeq sengcingz de, youq ndaw angqyangz ndaw mbouj sij ndaej haenx bae bin yawj nazmbaeklae, louz roengz faenh najriu soengset ndeu, daiq bae faenh vwnzva minzcuz naekgywg ndeu.