Vihle swnjcienz nem daihlig fatyiengz gij vwnzva eufwen maenh- ndei minzcuz ndawbiengz Guengjsae raeuz，vih seizdaih moq seveicujyi gensez fuzvu, fungfouq gij hozdung neiyungz 2016 nienz “sam nyied sam Bouxcuengh”，baijok mienhmauh moq vwnzva minzcuz Guengjsae mwn- hoengh nem minzcuz doxgiet，gaengawq gij anbaiz Swcigih Minzveij， Yozvei Eufwen Guengjsae nem Guengjsae Sam Nyied Sam Cazcise boiqhab Guengjsae Densidaiz sinhvwnz binzdau (sinhvwnz cungsim) loegguh sibinz fwen yenzswnghdai Guengjsae，cujciz gij fwenvuengz、canghfwen Cuengh、Gun、Yiz、Gingh seiq aen minzcuz ndaw gih gungh 24 boux comz youq Guengjsae Vwnz- vuzyen loegguh cietmoeg，gij cietmoeg neix youq 2016 nienz “sam nyied sam Bouxcuengh”geizgan book，sou ndaej yaugoj ndei.

3 nyied 30 hauh，Yozvei Eufwen Guengjsae daj Namzningz、Liujcouh、Laizbinh、Fangzcwngz、Hozciz、Bak- saek daengj si cingj gyoengq cangh- fwen maenhndei Cuengh、Gun、Yiz、Gingh daengj minzcuz ndaw gih gungh 24 boux，comz youq Namzningz， loq guh beizyin le，youz boux daujyenj densidaiz nem lauxhangz fwen daengq gij saehcingz mwh loegguh cietmoeg aeu louzsim de，caiq saemjcaz simjdingh gij goswz dem yaemlwd eu fwen. 3 nyied 31 hauh，Guengjsae Densidaiz baenz 10 boux gunghcoz yinzyenz youq Guengjsae Vwnzvuzyen ndabaij le sam aen sezsienggih loegguh cietmoeg. Aen cietmoeg loegguh neix miz fwen Bouxcuengh Gveisaebaek《Minzcuz Doxgiet Va Haihoengh》《Ngoenzneix Angqhoh Sam Nyied Sam》; fwen Yizcuz Nazboh《Gouz Fwen Roeb Daengz Seizcin Ndei》; fwen Ginghcuz Fangzcwngz- gangj《Fwen Couxhek Ginghcuz》; Fwengun Gveicungh《Mehmbwk Vuj- senh Caiq Caeuq Goenggeq Liujcouh Doiqfwen》daengj. Gij neiyungz baugvat minzcuz doxgiet、gekleiz doxhuz、ndawranz huzndei、mbanj moq seveicujyi、ak nungz vei nungz、gaijndei minzswngh、fwenyoux conz- dungj、fwen fungsug、fwen lijyiz daengj, yungh Vahcuengh、vah Ginghcuz、vah Yizcuz nem Vahgun daengj vah gak dieg daeuj yienjciengq. Gij fwen neix yaemlwd sepset ndeidingq，goswz sohsed、swhyienz、caensaed, funghgwz laj- mbanj noengznwd，gezgou fwen dinjiq, funghgwz yaemlwd huzndei、goswz genjdanh yungzheih geiq, ciengq hwnjdaeuj caemh yungzheih dawzbak，gij fwen neix hix fuengbienh riuzcienz. Gya hwnj gij fwen neix neiyungz lai cungj lai yiengh， gengangh gaenx- maenx, yisuz hingzsik biujyienh gak cungj gak yiengh， ndigah gij fwen neix fanjyingj le gak fueng- mienh Guengjsae ndawbiengz saedceij hingzsieng sengdoengh nem laegdaeuq.

3 nyied 31 hauh， Guengjsae Densidaiz sinvwnz binzdau (lanzmoeg Sinhvwnz Caisen) aeu《Sam Nyied Sam Bouxcuengh Minzcuz Fungh Betgvei——Fwenvuengz Gak Cuz Caez Comz Namzningz Mehmbwk Vujsenh Caiq Caeuq Goenggeq Liujcouh Doiqfwen》guh daez，bocuengq le siusik loegguh fwen yenzswngdai，hix yiengq vunzlai daez- gonq book le cietmoeg siennaeuz, yinx vunz dawz aen cietmoeg neix geiq haeuj sim. Guengjsae Minzcuz Bause boux fusecangj he youq ngoenz daihngeih aen cietmoeg book haenx raen boux canghfwen camgya cietmoeg he，couh doiq de gangj gij sim’angq bonjfaenh：“Ngoenzlwenz banhaemh gou youq gwnz densi yawjraen gyoengqsou lo，gij cietmoeg neix yungh Vahcuengh senhconz le vah saw minzcuz， gig miz daegsaek，ndei raixcaix ha. Danghnaeuz boux mehmbwk Vujsenh caemh yungh Vahcuengh daeuj ciengq, couh engqgya miz daegsaek lo.”

4 nyied 9 hauh (liggaeuq sam nyied cosam)， haj aen cietmoeg loegguh haenx youq“cizbo hung 2016 sam nyied sam”(daiz doiqfwen) cienzbouh book，Guengjsae Veisi、Guengjsae Sinhvwnz Binzdau、Gozci Binzdau、Anhveih Gunghgung Binz- dau、Gvangjdungh Gvangjbo Densidaiz Sinhvwnz Binzdau daengj caemh book, hawj aen cietmoeg neix ndaej bocuengq daengz cienz seiqgyaiq，sou ndaej yaugoj ndei， gak dieg bingzlwnh ndei lai lumj daihhaij fan langh.

Ganhsuz Ciujcenz bouxyawj youq gwnz veihsin sij daengz：“Siengj mbouj daengz singfwen Bouxcuengh baenzneix ndeidingq，gvaqlaeng miz gihvei itdingh bae Mbanjcuengh yawjyawj. Mbouj yungzheih dingqnyi Fwencuengh baenzneix ndeidingq ha. Gou maqmuengh lai ok cozbinj lumj yiengh ndeidingq neix. Caiq hohfuk Fwencuengh ciengq doh daengx seiqgyaiq，okmingz daengx seiqgyaiq.”

Cunghgoz Sevei Gohyozyen boux lauxhangz yenzgiu singhag haenx youq gwnz veihsin sij daengz：“Gou dwg lwg Mbanjcuengh, youq dieg rog dingqnyi gij fwen raeuz gig ndeidingq，sim maezlienh youq ndaw haijfwen,ndawsim gamjdaengz gig caenciet nem raeujrub”

Yinghgoz Lunzdunh bouxyawj singq Fangh haenx youq gwnz veihsin sij daengz：“Fwen Guengjsae caen ndeidingq， gou gig haengj dingq bw.”

Yizbwnj Dunghgingh bouxyawj singq Loeg haenx youq gwnz veihsin sij daengz：“Dingq daengz fwen Bouxcuengh, caen mbouj loek ha.”

Boux vangjminz Veiz Lenzdungh youq gwnz veihsin sij daengz：“Gij diuh fwen lauxgeq nem angqyangz, cungfaen yienh’ok le vwnzva daejgiek nem dungxcaiz noengznwd gyoengq canghfwen! Dang ndaej hwnj fwen- vuengz ha! Caensim hohfuk Fwen cuengh ndaej louzcienz ciengx- lwenx.”

Boux vangjminz Caijyih youq gwnz veihsin naeuz：“Cuj fwen Boux- cuengh ciengq haenx gij yaemlwd de caen ndeidingq，ciengq ndaej caemh ndei raixcaix.”

Boux vangjminz Cunhcihveih youq gwnz veihsin naeuz：“Yienznaeuz gou gangj Vahcuengh，danhseih lumj yienghneix miz binjciz haenx gaxgonq gou mbouj dingqnyi gvaq，gij fwen neix gig miz caengzmbaekgamj. Danghnaeuz ndaej lumj Liuz Samcej yienghhaenx youq gyang byaraemx doiqfwen， caemh mbouj loek bw.”

Boux vangjminz Yenzyenz youq gwnz veihsin naeuz：“Daiq ndei lo, gij fwen ndeidingq neix biujyienh le gij fungsug saenzcingz Bouxcuengh raeuz, bietdingh aeu dawz gij gingh- denj neix swnjcienz roengzbae.”

Ceiqgaenh, vunz Cunghgoz Meijgoz ciz Cai Beizgangh daj Meijgoz Niujyoz hawj Guengjsae Sam Nyied Sam Cazcise geiq daeuj bien bingzlwnh dinj ndeu，biujdap le gij simcingz gikdoengh boux vunzlaux neix yawj sibinz gvaqlaeng de:

Gij sibinz neix yiengq cienz seiqgyaiq bocuengq, hawj vunz gak dieg engqgya yungzheih nem cigciep rox gij vwnzva minzcuz Cungguek，minzcuz doxgiet dem sevei huzndei，ndei raixcaix ha. Gou simmuengh sibinz lumj yienghneix ndaej laebdaeb loegguh roengzbae，caiq daihlig cienzboq.

Caensim docih gyoengqvunz loegguh sibinz nem boux camgya eu fwen haenx，daiq hawj raeuz haujlai angqyangz. Gou aeu eu geij coen fwen daeuj biujdap gij cingznaek docih gou:

Dwen daengz Sam Nyied Sam,

Nanzlumz lo ciuhvunz；

Hawfwen comz beixnuengx,

Seiqfueng rwenz sing fwen.

Nanz lai youq Niujyoz,

Hawfwen hoj ndaej bae；

Hawj gou siengj ndaej maez,

Seiqseiz fangzhwnzloq.

Sibinz ranzmbanj daeuj,

Gou simhai lumj liengj;

Yawj fwenvuengz eu fwen,

Ngoenzmaz siengj ndaej lumz.

（bien faenzcieng neix youz Yozvei Eufwen Guengjsae hawj）