Danghnaeuz youq ndaw gyoengqbya lizhai

mwngz,

Gou yaek dauqma,

Con gvaq doenghfaex mwncum,

Bienqbaenz duzroegvenz,

Dauq daengz henz ndang mwngz!

Danghnaeuz youq gwnz haij lizhai mwngz,

Gou yaek dauqma,

Vad gvaq raemxlangh fanfoed,

Bienqbaenz duzroeghaij,

Dauq daengz henz ndang mwngz!

Danghnaeuz gou youq diegnywj byaijloeng,

Gou yaek gyaep dauq rizdin mwngz,

Bienqbaenz duzloeg,

Byaij doh cien bya fanh yiemj,

Dauq daengz henz ndang mwngz!

Hoeng boux gou gyaez a,

Gou nyengh dwg youq,

Yien fwngz mwngz seiz lizhai mwngz,

Ndigah,

Gou cij ndaej doiq mwngz naeuz:

Nyienh ciuhvunz mwngz,

Ciengxlwenx lumz gou bae!

Mbawfaex loenq,

Gou rox,

Gvaq mbouj ndaej geijlai nanz,

Seizcin caiq dauqma,

Gaenq mbouj dwg geiqciet gou lo.

Ganxgonq gou caen siengj cam mwngz,

Ciuhvunz neix,

Ndaej gvaq geij aen seizcin?