5 nyied 4 hauh (liggaeuq ndwensam ngeihbet) dwg hawfwen conzdungj Nazboh Yen yienhsingz moix bi gvaq baez haenx. Bineix hawfwen ngamqhab Haj Seiq Ciet Hauxseng, aen yienh neix yungh gij hingzsik mbouj doxdoengz gaxgonq doiq fwen caeuq daeuj hawfwen, aeu conzdungj gijgwn ndei、 fwngzguh gunghyibinj baij gai hozdung guh cawjsienq, aeu yaem’wenq Fwencuengh goksadsad guhcawj, hawj vwnzva minzsuz Mbanjcuengh engqgya lwenqda. Doengxngoenz banh conzdungj gijgwn ndei、 fwngzguh gunghyibinj baij gai hozdung caeuq doiq fwen doxdax, banhaemh lij banh “sam nyied sam Bouxcuengh·hawfwen Nazboh” minzcuz hozdung nem Cungguek Yeznanz Nazboh、 Baujloz、 Myauzvang 3 aen yienh cienciengz vwnzyi vanjvei dem.

Baez vanjvei neix neiyungz fungfouq, miz biujyienj gofoux、 doiq fwen、 gagciengq daengj, moix aen cezmuz cungj miz gak dieg dangdieg minzcuz daegsaek naekna, ndaej daengz bouxyawj bekfwngz haenhndei. Baez vanjvei neix cungfaen baijyienj le gij vwnzva minzcuz Cungguek caeuq Yeznanz, coicaenh le beksingq henzgyaiq doxgyau vwnzva, doidoengh song guek minzsuz vwnzva hoenghvuengh hwngfat.

(Linz Yungzsenh/林荣先)