Doenghbaez gonq, miz diuz dah daj henz Mbanjsinhgyangh lae gvaq. Aenvih aen mbanj neix mbouj miz aen giuz lawz, ndigah vunz mbanj neix bae ganjhaw cungj aeu naengh ruzfaex gvaq dah, roxnaeuz byaij bae daengz gig gyae cij miz aen giuz faex vaihvadvad he.

Vunz mbanj neix baez naengh ruz bae ganjhaw cungj aeu daez sim diuq damj, miz saek seiz lij miz vunz aenvih aenruz fan couh deng mued dai bae. Vunz mbanj neix gig maqmuengh miz ngoenz ndeu youq bak mbanj miz aen giuzrin he.

Seizhaenx miz boux coz he heuh guh Vuj Gangzsiz, ranz de mbouj miz geijlai ngaenz. Hoeng, de simsienh caemhcaiq simhoengz, haengj bae bang vunz, caezgya cungj gyaez de. De raen vunz mbanj ganjhaw baenzneix sinhoj, ndawsim laeglemx dwk siengj, danghnaeuz daengz ngoenz lawz de baez miz ngaenz, itdingh guh aen giuzrin he hawj gyoengq beixnuengx, fuengbienh caezgya bae ganjhaw, gawq sengjsaeh youh ancienz. Yienghneix, de couh ngoenznaengz gaenx guh hong, mbaet gwn mbaet yungh, dawz gij ngaenz mbaet roengzdaeuj cuengq haeuj aen gang hung he bae. Ngoenz doek ngoenz gvaqbae lo, ginggvaq geijcib bi roengzrengz, Vuj Gangzsiz cungjsuenq rom ndaej 9 aen gang cang ngaenz hungrad, gij ngaenz neix gaeuq guh aen giuzrin ndeu lo.

Miz ngoenz he, de comz vunz mbanj hwnjdaeuj naeuz, de yaek ok ngaenz guh aen giuzrin he hawj gyoengq beixnuengx. Caezgya dingq le angq dangqmaz, bouxboux naeuz swhgeij ndaej ok saek di rengz bae guh giuz. Youq Vuj Gangzsiz dazyinx lajde, guh liux bi ndeu, doeklaeng guh baenz aen giuzrin gvangq ndeu. Baezneix vunz mbanj neix caiq hix mbouj yungh naengh aen ruzfaex bae ganjhaw lo.

Gyoengq beixnuengx gamjgik de dangqmaz, youq henz giuz laeb aen bei he, youq gwnz bei gaek saw geiq gienh saeh neix, hawj lwglan ciengxlwenx geiq ndaej de. Daengz ngoenzneix, aen giuzrin neix lij youq gwnz dah henz Mbanjsinhgyangh, fuengbienh caezgya gvaq dah.