Gou son saw yaek ndaej 30 bi lo. Hagseng gou son gvaq, noix hix miz bak lai boux vunz, lai miz daengz cien boux vunz hwnjroengz lo. Hoeng youq ndaw gyoengqdoih hagseng gou, cijmiz song boux hagseng ceiq daegbied.

Song boux hagseng ceiq daegbied neix, cix mbouj dwg aenvih gyoengqde guh vunz manz lai, roxnaeuz cingzcik yaez lai, hawj gou geiq ndaej laeg、geiq ndaej nanz. Naeuz gyoengqde daegbied, dwg aenvih song boux de caeuq gyoengq hagseng wnq saedcaih mbouj doxdoengz, hawj gou geiq daengz seizneix, yaek lumz hix lumz mbouj ndaej.

Gou dwg bi 1987 bizyez, bizyez seizhaenx dingqcoengz baihgwnz anbaiz, faenboiq daengz aen siujyoz gyae’gyangq gungzhoj lajmbanj. Aen siujyoz neix, seizhaenx yienznaeuz miz cib lai boux lauxsae, hoeng, gyoengqde bouxboux cungj laux lo, miz saek boux gojnwngz mbouj hwnj gvaq cunghconh dem. Vihneix ndaw yozyau neix goq yinhyoz、goq meijsuz caeuq goq dijyuz cungj mbouj miz vunz bae son.

Gou baez daengz yozyau, yaucangj angq dangqmaz. Yaucangj naeuz, gyoengqde ngoenz muengh hwnz muengh, dauqdaej muengh ndaej daengz boux lauxsae oiq daeuj lo. Yienghneix, anbaiz gocwngz seiz, gyaudauj cujyin couh anbaiz gou bae son goq yinhyoz、goq meijsuz caeuq goq dijyuz 3 aen nienzgaep, lij son seiq nienzgaep Sawgun caeuq Sawcuengh dem. Aenvih seizhaenx gou nienz oiq, guh maz cungj mizyinx, couh lingx hong roengzdaeuj lo.

Caen dwg lwg vaiz mbouj lau guk. Seizhaenx guh maz cungj dwg mbeihung rengz cuk. Aen singgeiz 25 dangz goq, gou cungj guh caenhgyaeuj bae, mbouj miz saek coenz vah ienqhoj. Yaucangj raen gou baenzneix gaenx guh hong, youh faenboiq yinvu moq hawj gou lo.

Gijmaz yinvu ne? Gou youq aen yozyau dwg aen siujyoz daengx yienh Cuengh Gun song saw vah sonhag sawqniemh. Seizhaenx ndaw yienh vihliux caenh gojnwngz lai beizyangj ok hagseng Cuengh Gun song saw vah cungj rox, couh youq ndaw yienh minzcuz cunghyoz hai aen ban yawhbwh ndeu, aen ban neix, cienmonz daj gak aen sawqniemh siujyoz aeu hagseng. Ndigah, yaucangj gietdingh youq ndaw yozyau dou laemzseiz hai aen ban yienghneix, heuh gou leihyungh banhaemh bae hawj gij ban haj nienzgaep gaxgonq mbouj ndaej son Sawcuengh haenx bouj son Sawcuengh.

Vihliux aen swnghaglwd caeuq mingzdaeuz yozyau dou, gou mbouj gangj saek yiengh diuzgen, couh dapwngq yaucangj lo.

Daj seizhaenx hwnj, aen haggeiz haenx, daengz banhaemh mbwn laep caez, gou lij buenx gyoengq hagseng bouj son Sawcuengh, youq laj daengyouz sonhag Sawcuengh.

Gou couh yienghneix roxnaj boux hagseng daih’it neix. Gangj de daegbied, dwg de yienzbonj mbouj dwg yozyau gvihaeuj aen ban neix. De doeklaeng haeuj ndaw ban neix daeuj hagsib Sawcuengh, dwg aenvih bohmeh de rox ndaw yozyau hai baenz aen ban bouj son Sawcuengh le, daegdaengq daeuj yozyau ra gou, naeuz dahlwg gyoengqde caen maij Sawcuengh, siengj haeuj ndaw ban bouj son Sawcuengh neix hagsib Sawcuengh. Bohmeh de gangj ndaej caensim dangqmaz, gangj daengz gikdoengh seiz, raemxda gyoengqde cungj yaek doek roengzdaeuj. Gou raen bohmeh de caen dwg mizsim lai, nyinhnaeuz boux hagseng neix wnggai gig siengj hag Sawcuengh, couh doengzeiq hawj dahlwg gyoengqde haeuj ndaw ban gou son neix duenh seizgan he yawjyawj.

Caen daihraix, boux hagseng neix lumj caeuq Sawcuengh miz yienzfaenh nei. De hag Sawcuengh hwnjdaeuj, gig nyinhcaen, gou son song sam baez gvaqbae, boux doengzhag wnq yaep ndeu couh lumz lo, lij cingj gou caiq son geij baez cij geiq ndaej maenh. Hoeng de cix mbouj doengz, cijaeu gou baez son gvaq, de couh geiq youq ndawsim lo.

Bihaenx, gou son ban bouj Sawcuengh haenx, miz cib lai boux hagseng gauj ndaej yienh minzcuz cunghyoz, de couhdwg ndawde boux he. Doeklaeng gou cam vunz rox daengz, boux hagseng neix camgya daengx yienh Sawcuengh gaujsi ndaej 80 lai faen, dwg ndaw gyoengq doengzdoih de boux daih’it. Caiq doeklaeng, de youq ndaw yienh minzcuz cunghyoz hagsib sam bi le, camgya cunghgauj, gauj ndaej Guengjsae Sawcuengh Yozyau, dwg ndaw mbanj de hix dwg aen siujyoz dou daj hoizfuk gauhgauj daeuj, boux daih’it gauj hwnj cunghconh yozyau.

Gou roxnaj boux hagseng daeg- bied daihngeih couh engq geizheih lo. Gou baenzlawz hix siengj mbouj daengz, gou cijdwg boux siujyoz lauxsae ndeu, gawqyienz miz boux dayozswngh yaek bizyez daeuj baiq gou guh lauxsae, cingj gou son de Sawcuengh.

Saehcingz dwg yienghneix, boux hagseng neix yaek daj Swhfan Dayoz bizyez, siengj bauqgauj aen gangjvei gvendaengz minzcuz yijvwnz. Hoeng, aen danhvei de siengj bauqgauj cij ciu aeu gyoengq bizyezswngh rox Sawcuengh. De couh gizgiz bae cam byawz Sawcuengh suijbingz sang, miz vunz naeuz hawj de gou youq siujyoz son Sawcuengh, mboujdan rox Sawcuengh, caemhcaiq wnggai lij rox son dem. Ndigah de couh dwk dienhvah hawj gou, cingj gou son de hag Sawcuengh lo.

Baez ciep ndaej dienhvah boux hagseng neix, sim gou doeksaetyat. Gou cijdwg boux siujyoz lauxsae, baenzlawz son ndaej dayozswngh? Caiq gangj, aenvih seizgan gaenj, de cijmiz geij ngoenz daeuj hag, couhcinj hwnz nangq ngoenz cungj mbouj yietnaiq bae son de, goulau hix cijdwg rox maz dwg singmeh、yinhmeh caeuq diuhhauh.

Lijndei, boux dayozswngh neix caen laemxsim daeuj hag Sawcuengh dahraix. De ganj daengz ndaw yienh dou le, couh coh yozyau gou daeuj ra gou, moix ngoenz cinjseiz daeuj bangunghsiz gou dingq gou son de Sawcuengh.

Raen de yienghneix yunghsim daeuj hag, gou hix yunghsim bwh goq, yunghsim bae son. Vahsug gangj “mehmbwn mbouj hangz boux yunghsim”. Geij ngoenz gvaqbae lo, boux hagseng neix, yienznaeuz mbouj guh ndaej daengz sij gij cih singmeh、yinhmeh caeuq diuhhauh cungj deng, hoeng, de gaenq daj coengzlaiz mbouj rox Sawcuengh dwg maz bienqbaenz rox saek di Sawcuengh lo. De yaek bae ndaw sengj camgya Sawcuengh gaujsi seiz, gou soengq de coenz vah ndeu——“Hoh mwngz cenzcwngz ronghsag, baez gauj couh ndaej”.

Hwnz haenx, gou baenz aen loq ndeu, youq ndaw loq, gou lumj yawjraen de gauj ndaej aen danhvei de baugauj, gou gig angq. Daj seizhaenx hwnj, gij hong Sawcuengh raeuz youh dem miz vunz moq lo.

Gou siengj, cijaeu miz vunz siengj hag Sawcuengh, gou couh yunghsim bae son. Yienghneix miz vunz hag Sawcuengh, gij hong Sawcuengh raeuz cij miz vunz ciepban, vunz lai couhdwg ligliengh, gij hong Sawcuengh raeuz cij rox yied daeuj yied hoenghhwd.