Fwn oemq baenz geij ngoenz

Gwnz roen raeuzradrad

Civaiz yiengjngatngat

Ngaenz baenz gaem haeuj fwngz

Ranz ngamq buemzsuemj, Augeiz doq angq dwk ngon fwen ngwngngwng doq yien vaiz rag ci okbae, duzvaiz gig dingq vah, mbouj yungh hat mbouj yungh fad couh gag byaij bae- ngoegngoeg, aen civaiz ngi’ngi ngat- ngat bae riengz laeng caekhaex vaiz.

Caeuxcaeux couh miz vunz dwk dienhvah daeuj heuh de bae Mbanjnazgut daeh geij roengq gaeq ok rog goengloh bae. Geij ngoenz neix oemq fwn, gwnz roen myag dai myag lix, Nazgut Nazgyoij song aen mbanj neix bouxlawz miz maz doenghyiengh yaek daeh haeuj daeh ok, cungj dwg okcienz cingj Augeiz bae bang daeh. Nyaenxlai bi daeuj gij vunz song aen mbanj neix gik ciengx vaiz, lau langh vaiz dwgrengz, gag Augeiz Mbanj- nazgyoij ciengx miz duzvaiz dog. Yienghneix, baez doek fwn, Augeiz couh miz hong guh lai, miz baenz gaem ngaenz roengz daeh lo.

Augeiz bineix gaenq ndaej 60 bi, de caeuq Simjgeiz ciengx vaiz rag ci geijcib bi lo, daengx bi youq diuz roen gumzgumz gamxgamx doeng haeuj Mbanjnazgut Mbanjnazgyoij neix baebae dauqdauq. Song aen mbanj caemh diuz roen namhnding neix doeng ok rog goengloh bae, mwh mbwn ndei soujfuz dohlahgih byaij ndaej, baez doek fwn couh dandan yawj aen civaiz Augeiz byaij ndaej. Geij bi gonq, Augeiz ndang lij cangq, yien vaiz rag ci baenz ngoenz mbouj youqgaenj, caiq gangj seizhaenx gyoengqvunz baebae dauqdauq hix mbouj miz geijlai doxgaiq aeu daeh haeujok. Hoeng gaenh song bi neix daeuj, Augeiz roxnyinh bonjfaenh rengz doiq lai lo. Seizneix vunz lai miz cienz, ngoenznaengz ok haw cungj dwg baenz ci baenz ci doxgaiq dauqma, hawj Augeiz cungj nyaengq mbouj gib. Augeiz gvanbaz ngamq miz dahlwg dog, dahlwg gaenq maj baenz sau, mboengqneix cingq caeuq Daeggviq Mbanjnazgut guhyoux. Augeiz couh baengh aen civaiz de laeuq lai di cienz ma bangzlaux.

Augeiz fwngz ndeu gaem cag yien vaiz, lohdin byaij youq gwnz roen myagsubsub, doq byaij doq detlet, saemxsaemx saxsax, dwgrengz dangq- maz. Yienznaeuz Augeiz laeuq ndaej cienz haemq lai, ndaej gwn haemq ndei, hoeng lij dwg byombyom nengjnengj, gaiq naeng suek gaqndok. Yienznaeuz “laux cix byom, rom ndaej fuk”, hoeng Augeiz cix mbouj nyienh hawj bonjfaenh laebdaeb byom roengzbae lo. Danghnaeuz caiq byom roengzbae dem couh mbouj baenz yiengh bouxvunz lo.

Augeiz laeh dangq civaiz ndeu dauqma, caen siengj yiet saek yaep. Hoeng ngamq naengh roengzdaeuj daengq lij caengz raeujremh, youh miz vunz daeuj heuh, youh yien vaiz okbae. Dauqma caengz ndaej aen roetgaeq he, youh miz vunz heuh, youh yien vaiz okbae……Geij ngoenz fwnmoenq neix ngoenz daengz haemh cungj mbouj ndaejhoengq saek seiz, Augeiz baeg dwk ndok yaek sanq.

Augeiz Simjgeiz seizneix song gvanbaz gag youq, dahlwg de Dahyungz deuz bae laeng Daeggviq. Dahyungz nem Daeggviq song boux gag doxrox gag guhyoux, Augeiz bonjlaiz siengj ra boux moiz ndeu bae cam Daeggviq aeu saek di cienzlaex, hoeng dah lwg cienh neix caeuq Daeggviq cix “caengz humx suen, sien ndaem byaek”, mbouj cingjlaeuj, hix mbouj baiqdangz, couh yienghneix haeuxsan cawj baenz ngaiz lo. Seizneix, ban hauxseng cungj haengj yienghneix, Augeiz hix mbouj ndei caiq gangj gijmaz.

Aiq dwg geij ngoenz neix soemh fwn laeh vaiz rag ci dwgrengz gvaqbouh, Augeiz fatsa lo, cienq ywdoj gwn geij baez hix mbouj raen ndei, mbouj ndaej mbouj bae yangh veiswnghyen dajcim. Canghyw naeuz Augeiz ndang nyieg lai, yaek daj cimvenj geij ngoenz cij ndaej. Couh yienghneix Augeiz youq veiswngh- yen dinghdingh venj geij ngoenz cim. Geij ngoenz mbouj ndaej bae laeh vaiz rag ci, Augeiz hozgenx dangqmaz.

Mboengqneix baihrog riuzcienz miz aen siusik ndeu: Cunhveij vuenh gaiq senjgij guh sat lo, boux cujyin moq couhdwg Daeggviq, “hak moq co hwnj nyaemh, cacaemj bang vunzlai”, de gietdingh bu roen suijniz doeng haeuj Mbanjnazgut Mbanjnazgyoij. Seizneix cingq dungyenz daengx- gyoengq vunzmbanj boux comz di ngaenz, gangj gijmaz “Yaek baenz- fouq, couh coih roen, mbanjmbanj heiqci doeng, goengdaek louz fanh- daih”. Lij ndaejnyi naeuz baihgwnz gaenq bued bit ngaenz guh gihcuj sezsih lajmbanj ndeu roengzdaeuj.

Ndaejnyi aen siusik neix, Augeiz lumj deng byajraez hwk dwk gwn mbouj van, ninz mbouj ndaek, ngamq haemh seizgan ndeu, binghcingz couh lumj dem naek haujlai. Daeggviq riuj geij gaen lwgmak daeuj yawjngonz de, Augeiz ninz youq gwnz congzbingh, cengqgengz hai lwgda yawj Daeggviq mbat ndeu, naeuz:“Mwngz cingqcaen dajsuenq gvej goenq diuz roen laeuq cienz gou bae?”

“Daxboh,” Daeggviq mbajdwd- dwd naeuz, “Seixneix daengxgyoengq vunzmbanj cungj maqmuengh bu roen suijniz ha.”

Augeiz laepda mbouj guhsing.

“Daxboh, roen suijniz itdingh aeu guh, aen seizdaih neix mbouj guh mbouj baenz, caux mbanjmoq sevei- cujyi mbouj guh mbouj baenz. Couh- cinj gou seizneix mbouj heuh guh, roengzbae hix miz vunz heuh guh, gou seizneix wngdang vih gyoengq vunz- mbanj guh di saedsaeh ha. Mbouj bu suijniz vunz song aen mbanj neix daeh huq haeujok mbouj fuengbienh. Seizneix vunz mbanj monzloh lai lo, dajndaem dajciengx gijmaz cungj guh baenz gveihmoz hung, gihcuj sezsih mbouj guh ndei mbouj baenz ha.” Daeggviq naeuz.

“Mwngz deuz vaiq di, gou mbouj dwg boh mwngz……” Augeiz heiq- hwnj lo.

Dahyungz bae yawj Augeiz, Augeiz hix mbouj swt de.

Baezneix haeuj yihyen, Augeiz yungh bae haujlai cienz, sim’in raixcaix. Mwh gietsuenq, yihyen daengq de aeu dawz ndei mbawfei gyau ngaenz, naeuz ndaej dawz bae gizbanhsaeh sinhnungzhoz ndaw yangh ndaej lingx dingzlai cienzyw boiz dauq hawj de. Augeiz dauqma le cam Simjgeiz cij rox, laxlawz Daeggviq caeux couh bang song boux laux de banhleix camgya sinhhingz nungzcunh hozcoz yihliuz lo. Simjgeiz lij dawz bonj bouhnding iq ndeu daeuj hawj Augeiz, naeuz neix dwg yangh giswnghsoj fat hawj, ndaej bae lingx aeu gij ngaenz bangcoengh gwndaenj ranz giva senglwg.

Bi daihngeih haicin, diuzroen doeng haeuj nazgut Mbanj- nazgyoij haenx hai hong coih bingz yaek bwh bu suijniz lo. Augeiz naeuz coenz hawj Daeggviq, heuh de dauqma bang yien duzvaiz caeuq aen civaiz bae gai, ndaej cienz gien bae coih roen.

Geij ngoenz neix mbwn gvengq, gig ndei guh hong coih roen.