Youq ndaw Mbanjgunglenz Sinhliz Cunh Nazmanj Cin Denzyangz Yen, vunzraeuz ndaej yawjraen aen dem aen ranzlaeuz moq ciengz hau vax mong baenz coij baenz baiz cingjcingj caezcaez, roenmbanj diuz vangz diuz raeh gvangqyub bingzbwd sohswd seuqcingh, seksek cazcaz gova mbaw heuloeg va ronghsien, aen daizheiq henz gvangjcangz cang ndaej ronghsag ndeiyawj, lanz- giuzcangz、ranzyawjsaw、veiswnghsiz、dieglienhndang doenghgij neix yienghyiengh miz caez, baenz aen mbanj ceiq gyaeundei Mbanj- cuengh.

Mbanjgunglenz dieg youq rangh baihnamz Dahyougyangh, liz yienh- singz Denzyangz 12 goengleix gyae, dwg aen mbanj senjyouq bi 1977 daj ndaw diegbya Sinhliz Cunh senjbuen okdaeuj ndeu, gungh miz 96 ranz 320 vunz, miz 256 moux reih. Aenvih dieg neix youq rangh ngadah iq Dahdozlez, dwg giz doxgap diegbingz caeuq diegbya, raemx conj namh saetlae gig youqgaenj, namhreih genzbyom, miengrij saekdimz, gaiq- reih soucingz yaez, vunzlai souhaeuj mbouj lai, bi 2010 daengx mbanj moix vunz bingzyaenz cinghsouhaeuj ngamq 2500 lai maenz, youq Denzyangz baiz youq cungqgyang lij daemq di.

Bi 2010 ndwen 5, Siz Ginbingz cujsiz (seizde lij dang fucujsiz) bae aen mbanj neix cunzyawj le, ndaw yienh couh dawz aen mbanj neix lied guh diemjguhyiengh hwnjguh lajmbanj moq seveicujyi, haeuj- coengh gyoengqde hwnjguh lajmbanj moq, vat mieng yinx raemx caeuq ceihleix raemx conj namh saetlae, doenggvaq fung bya ung faex、doiq reih ndaem faex caeuq gak ranz guh caujgiciz doenghgij hong neix le, hawj dangdieg faex loeg raemx saw, swnghdai vanzging bienq ndei. Doengzseiz, bangcoengh vunzmbanj haenqrengz dajndaem dajciengx, guh le gunghcwngz byoq rwed dwkraemx, laeb hozcozse caeuq Mbanjcuengh Ranghdah Cizdonz doxgap cauxguh makyungz iq ndaemganq gihdi, hawj moux reih daj gaxgonq souhaeuj 2000 maenz dem daengz le 10000 maenz doxhwnj; lij miz ciengzciengxgaeq ndaw ndoengfaex 12 aen, bi ndaej gai gaeqnoh 30 fanh duz, ndaej ngaenz 2100 fanh maenz; mbangj bouxcoz lij okrog dajgoeng demlai souhaeuj, baenzneix, bi 2011, daengx mbanj moix vunz bingzyaenz cinghsouhaeuj couh dabdaengz 5000 lai maenz.

Aenmbanj bienqvaq hungloet, vunzmbanj saedceij bi ndei gvaq bi, ndawsim angqyangz, ngoenznaengz guhhong dauqma le, vunzmbanj caemh ciuq haengjgyaez bonjfaenh, mbangj dwkgiuz yawjsaw, mbangj yienjheiq diuqfoux, yungh gij hengz- doengh gaenxguh bonjfaenh、aeu gij saedceij cwxcaih vuenyungz neix bae hwnjguh siujgangh sevei, angqcoux daengzcog engq gyaeundei.