“Bet nyied cibngux rongh- ndwen lwenq, Fwencuengh Maj- bingz sing hap sing, mbanjranz Fwencuengh laeb majbingz, Banh- sin ndaej baenz vunz swnjcienz.”Youq Guengjsae Siengcouh Yen Majbingz Yangh, miz boux vunzlaux 80 bi ndeu, geijcib bi lumj ngoenz ndeu baujciz eu Fwencuengh sibgvenq, doenggvaq eu Fwencuengh, guh Fwencuengh eu fwen doxdax,caiqlij youq de 78 bi seiz cingjleix ok le bonj saw Fwencuengh ndeu. Swcigih bingzdingh de guh “Guengjsae boux swnjcienz feihvuzciz vwnzva yizcanj——Fwencuengh”, de hix caeuqfaenh sij bien bonj saw《Fwencuengh Siengcouh》. Boux vunz neix couhdwg Cinz Banhsin, vunz Majbingz Yangh Lungzyenz Cunh.

Cinz Banhsin 1934 nienz 8 nyied seng youq aen ranz ciuhciuh daihdaih eu Fwencuengh haenx. Dingq boux- laux ndaw mbanj gangj：Vunz Majbingz Yangh daj Dangzcauz couh hainduj eu Fwencuengh, aenvih gij yaemlwd Fwencuengh ndeidingq, daegsaek noengznwd, dwg cungj fuengsik vunz Bouxcuengh biujdap sim’angq he. Cinz Banhsin daj 17 bi couh yiengq daxboh de Cinz Cujsung hag eu Fwencuengh, aenvih de daj iq couh coengmingz、uklingz, geiqsingq ndei, gya hwnj de banhaet eu, banhaemh caemh eu, ndigah de rox eu cibgeij cungj eufap Fwencuengh, daegbied caixhangz eu fwenlaeggiek. Youq gawqfap eu Fwencuengh aen fueng- mienh neix, de rox eu“fwen haj cih”“fwen roek cih”“fwen caet cih”“fwen bet cih”daengj. Youq gij neiyungz eu Fwencuengh aen fuengmienh neix, de rox eu fwen gvendaengz lizsij、lijyiz、fungsug、swnghcanj、 siengsim haemzhoj nem fwen gvendaengz cwngci、ginghci、denhvwnz、deihleix nem saedceij ciengzsik daengj.

Cinz Banhsin sim gyaez eu Fwencuengh, geijcib bi lumj ngoenz ndeu, itcig yungh Vahcuengh eu gij fwen vunz Bouxcuengh haengj eu haenx, de doiq gij banjdaeuz eu fwen, yienjeu、buenxeu、dungcoz Fwencuengh gig sug, doiq eu Fwencuengh gak fuengmienh cungj rox haemq caez, gyoengq banlaux eu Fwencuengh ak haenx gvaqseiq le, de doq ciep gvaq gij hong duicangj eu Fwencuengh, daiqlingx ndaw mbanj vunz eu Fwencuengh nem ok rog bae camgya gak cungj hozdung, lij youq gwnz gai cujciz hawfwen. Aenvih de eu fwen eu ndaej ndei, moix baez miz vunz gietvaen cingjlaeuj, couh iucingj de daiqdoih bae ranz bouxcawj doiq fwen, youq bakdou caj aen doih ciepbawx aeu civaiz rag haenx daengz bakdou seiz, de couh daiq gyoengq canghfwen eu fwen hohfuk《Angq Laengz Dou》, caj doiqfueng doiq fwen sat, bawxmoq song din cij ndaej roengz namh, gwizmoq cij rag fwngz bawxmoq haeuj ranz hengzlaex.

Youq ngeihcib sigij loegcib nienzdaih seiz dwkbuq “seiq gaeuq”, gij sawfwen Cinz Banhsin louzce roengzdaeuj haenx haujlai deng soudeuz、coemhcag lo. Seizhaenx, gyoengqvunz rox eu Fwencuengh hix mbouj ndaej eu fwen lo, daengz 1980 nienz, Cinz Banhsin dingq gvangjbo dingqnyi gij sing fwen《Liuz Samcej》, cij roxyiuj saedhengz gaijgwz, ndaej seizbienh eu fwen lo, de cij dauqcungz eu hap aen minzcuz vwnzva yizcanj neix——Fwencuengh. Doengzseiz de sou le geij boux lwgsae, camgya yanghcin henzgyawj nem Liujgyangh Yen Fwencuengh doxdax, lai baez dawz roengz daih’it mingz, lai baez souh’iu guh bingzveij.

1986 nienz, Cinz Banhsin ciuq ndaw uk ndaejgeiq de, yungh Sawcuengh nem Sawgun cingjleix ok le bonj sawfwen yungh fwngz sij《Cinz Yanghlenz》, gungh miz 480 hot fwen. De mboujdan swhgeij yo miz geij bonj sawfwen ciuhgeq——fwenlizsij Dangzcauz 《Dangz Daicungh》, sawfwen Cauzcauh、Gungjmingz、Liengz Sanhboz caeuq Cuz Yinghdaiz daengj, caemhcaiq miz bonj sawfwen boux canghfwen ndaw mbanj youq seiz Minzgoz sij he…… Seizneix, de yo miz sawfwen fwngz sij fanh lai hot, dwg dangdieg boux soucomz Fwencuengh ceiq lai ndeu, ndigah Swcigih Vwnzvadingh dingh de guh boux swnjcienz Fwencuengh. 2013 nienz, de hix ndaej aen mingzdaeuz ndei“Fwenvuengz Fwencuengh Guengjsae ”.

Vihle hawj gij feihvuzciz vwnzva——Fwencuengh ndaej fat- yiengz nem swnjcienz, gaenh bi daeuj, Cinz Banhsin mboujduenh beizyangj vunz ciepban, de cienz sim cienz eiq son’gyauq gyoengq lwgsae, mboujdan Veiz Denhswng daengj vunz ndaw mbanj bonjfaenh yiengq de hag eu Fwencuengh, gij vunz Liujgyangh Yen Conhsanh Cin caemh daeuj yiengq de hag, gyoengq lwgsae de miz 40 lai boux. Moix baez ndaw mbanj miz gijmaz saeh cungj raen Cinz Banhsin daiq gyoengq lwgsae de youq giz haenx eu Fwencuengh, daegbied dwg moix bi miuhhoih “Mehgoujlwg”seiz, Cinz Banhsin caeuq doih eu Fwencuengh itheij biujyienj, gij diuq gij yaem Fwencuengh gyoengqde eu haenx gig ndeidingq, gij neiyungz lai cungj lai yiengh, hawj gyoengqvunz yawj dwk haenhdanq raixcaix, cungj dingq mbouj rox gaeuq. Gvangjsih Densidaiz lij caijfangj de song baez gvaq lo.

2009 nienz daeuj, Cinz Banhsin gaenxmaenx boiqhab dangdieg dangj- veij cwngfuj guh ndei hong haivat、soucomz、cingjleix feihvuzciz vwnzva yizcanj——Fwencuengh, vih fwen ndawbiengz《Fwencuengh Siengcouh》senjhaeuj Swcigih feihvuzciz vwnzva yizcanj mingzloeg ok le haujlai rengz. 2013 nienz, Majbingz Yangh caemh ndaej bingz baenz“Mbanj Fwencuengh”, Cinz Banhsin aenvih yienghneix, caemh ndaej bingz baenz fwenvuengz Fwencuengh Guengjsae. De hix ndaej senj guh bouxleixsaeh Fwencuengh Majbingz, youq Majbingz Cin laebguh le Fwencuengh swnjcienz gihdi nem Fwencuengh vwnzva gvangjcangz, daengx cin gak mbanj cungj laebguh le Fwencuengh swnjcienz beizyin gihdi. Youq Cinz Banhsin caeuq gyoengq lwgsae itheij okrengz guh saeh gvaqlaeng, Fwencuengh haeuj le hagdangz, byaij haeuj le yienhsingz, vih hong ciubing guh le senhconz, engqgya yungh eu Fwencuengh senhconz le cwngcwz dangj. Gij vunz eu Fwencuengh yied daeuj yied lai, yen cwnghez vanzlij gaengawq bonj saw Fwencuengh Cinz Banhsin daezhawj haenx, biencomz okbanj le bonj saw《Fwencuengh Siengcouh》, daih’it baez yiengq ndawbiengz fathengz. “Siengcouh dauqcawq va hai rim, Fwencuengh seiqlengq baij daiz eu. Laexsoq cingzyoux caemh daiz eu, bet sien gvaq haij gak bonjsaeh.” Cinz Banhsin doiq hong fatyiengz Fwencuengh caenh sim caenh rengz, seizneix Fwencuengh Siengcouh Yen mboujdan eu daengz le gak dieg ndaw Guengjsae, caemhcaiq eu doh daengx guek.