5 nyied 1 hauh, Gveilinz Si Lungzswng Gak Cuz Swciyen Lungzciz Cin Mbanjcuenghgeq Lungzciz banh conz- dungj “ciet hai ndaem”. Ngoenzhaenx, dangdieg beixnuengx Bouxcuengh youq Lungzciz nazmbaeklae banh caeq naz yizsi, doeklaeng youh haiguh cae naz、 vat naz、 ndai nywj daengj conzdungj guh hongnaz hozdung, yiengq ndaw guek rog guek hekyouz baijyienj gij vwnzva dajndaem dangdieg.

Hozdung ngoenzhaenx, lij banh “benz Lungzciz guh vunzak” benz nazmbaeklae doxdax、 youq gyang nazmbaeklae ciengj gaeq ciengj bit、 fanh gaem bogfeiz diemj rongh banhaemh Lungzciz、 yenzswnghdai gofoux minzcuz biujyienj daengj hozdung ndei yawj dem, Lungzciz nazmbaeklae nauhyied raixcaix, yinx ndaej haujlai ndaw guek rog guek hekyouz daeuj yawjngonz、 daejniemh.

“Ciet hai ndaem” dwg aen ciet conzdungj Lungzswng Gak Cuz Swciyen Lungzciz Cin Mbanjcuenghgeq Lungzciz ndeu, moix bi youq hai ndaem gaxgonq, dangdieg beixnuengx Bouxcuengh cungj senj ngoenz ndei ndeu, banh hai ndaem yizsi, gouz daengx mbanj rumz swnh fwn yinz、 haeuxgwn fungsou. Yizsi guhsat le, daengx mbanj hai mieng dwkraemx haeuj naz, hai ndaem doengh namh, hainduj Lungzciz nazmbaeklae seizcin dajndaem.

(Banh Cisiengz/潘志祥)