Guengjsae mboengqneix okdaiz “Cuengh Gun song saw vah gyauyuz hwngfat gveihva (2016-2020 nienz)”, daezok yaek hwnjguh 10 aen Cuengh Gun song saw vah sonhag sifan gihdi, dajcaux 6 aen Cuengh Gun song saw vah gyauyuz lienzbenq “dieg samgak”, guhbaenz Cuengh Gun song saw vah gyauyuz dijhi, caenh’itbouh gungganq saujsu minzcuz vunzcaiz “Cuengh Gun cungj rox”.

Bi 2015, Guengjsae gungh miz 35 aen yienh (si、gih) hengzguh Cuengh Gun song saw vah gyauyuz sonhag, miz Cuengh Gun song saw vah hagdangz 158 aen, hagseng youqhag 9 fanh lai boux. Hoeng bi 2010 seiz, Guengjsae ngamq miz 69 aen Cuengh Gun song saw vah hagdangz, hagseng youqhag 2 fanh lai boux.

“Youq cungh siuj hagdangz dieg lajmbanj Bouxcuengh yungh Vah- cuengh guhcawj guh doxgyau haenx haiguh Cuengh Gun song saw vah sonhag, doiq hagseng Bouxcuengh gangj Vahcuengh haenx daezsang hagsib cingzcik miz leih, gij sonhag cizlieng Cuengh Gun song saw vah hagdangz cungj sang gvaq itbuen doengzloih hagdangz.” Guengjsae Bouxcuengh Swcigih Gyauyuzdingh gvendaengz bouxfucwz naeuz.

Gveihva moq iugouz, Guengjsae yienh (si、gih) Bouxcuengh youqcomz cingzdoh haemq sang haenx, yenzcwz aeu youq 1 daengz 2 aen yanghcin caemhcaiq yen minzcuz cunghyoz haiguh Cuengh Gun song saw vah sonhag; ciemqgonq haeujcoengh Cuengh Gun song saw vah hagdangz byauhcunjva hwnjguh, haifat Cuengh Gun song saw vah sonhag swhyenz, hwnjguh swhyenzgu, saedyienh swhyenz caezyungh, daezsang song saw vah sonhag yendaiva suijbingz daengj.

(Sinhvazse Cangh Yingh)