Cau Gveilanz，vunz Bouxcuengh，63 bi，vunzmbanj Gveilinz Si Lungz- swng Gak Cuz Swciyen Biuzlij Cin Gaicenz Cunh. Aen ranz Cau Gveilanz dwg aen ranz hung he，gwnz miz boux gyagoeng 90 bi ndeu，laj miz seiq boux lwgnyez ngamq ndaej geij bi，de dwg ndaw ranz boux vunzhong dog ndeu. Liengz Houyangz 10 bi，Liengz Libingz 9 bi，Vangz Cingzsi 5 bi，Vangz Ginhyungz 2 bi，seiq boux lwgnyez neix dwg gij lwg sam dah lwg de. Ciuqgoq bouxlaux、daiq lwgnyez、hwnj bya raemj fwnz、dajndaem yienghyiengh cungj dwg de boux ndeu guh, Cau Gveilanz couh yienghneix dawz seiq aen ranz cuglamh youq giz ndeu.

Miz coenz fwen ndeu dwg baenzneix:“Lungzswng Gveilinz dwg diegbya，bya sang roen lingq dieg mbouj bingz. Bakdou daegbeix bya saekdimz, nuengxlingz yaek daeuj hoj youh nanz……” Aen ranz Cau Gveilanz couhdwg youq ndaw lueg byasang haenx. Yienznaeuz ranz gungz saedceij hoj, danhseih de caeuq bouxgvan de gamjcingz gig ndei, gyagoeng、gyabuz caemh dawz aen ranz guenj ndaej ndei. Gvanbaz de seng miz sam dah lwg, aeucoemq song daeg gwiz, saedceij bonjlaiz gvaq ndaej haemq swnh. Hoeng cib bi gonq gyabuz caeuq bouxgvan de lienzdaemh gvaqseiq，diuzrap naekcaem ciuqgoq saedceij daengx ranz couh daenz hwnj gwnz mbaq de.

Dahlwg hung doeg daihhag sat le，caeuq bouxgvan de itheij bae dieg rog guhhong. Danhseih，bohmeh lwggwiz hung cungj bingh gyad youq ranz, cienzbouh gauq sam boux lwg ciengx.“Lwggwiz hung youq ranz gou lo, danhseih ranz de caemh nanz, ndigah song ranz cungj aeu goq.”Cau Gveilanz doq danqheiq doq gangj.

Dahlwg ngeih caemh ciu le lwggwiz haeuj ranz, seizneix, gyoengqde caemh daengz yienhsingz guhhong lo. Dahlwg iq aenvih bingh Naujmozyenz bienq canz.“Mbouj rox gangj caemh mbouj rox guh saeh, nit ndat cungj mbouj roxyiuj.”Cau Gveilanz gangj dwk da hoengz sim sieng, de umj dahlan Vangz ginhyungz gangj：“Ginhyungz daj seng roengz- daeuj couhdwg gou daiq lo, daxmeh de mbouj rox ciuqgoq law.”

Goeng gyagoeng de 90 bi lo, miz binghfatmwnh, bouxlawz cungj mbouj roxnaj lo，cij rox siengjniemh dahlwg daeglwg de. Seiz fatbingh haenx, gyagoeng de hemq ra dahlwg、daeglwg daeuj buenx：“Daeglwg dahlwg cungj ndoj bae gizlawz la!”Miz seiz singqheiq gaenj hwnjdaeuj，buet bae gwnz gai daejnauh. Seizhaenx，Cau Gveilanz doq uet raemxda doq riengz gyagoeng，siengj banhfap lox de ma ranz.

Sam dah lwg seng le seiq boux lwg, doxlwnz doxlienz gyau hawj Cau Gveilanz ciuqgoq. Vih le fuengbienh hawj lwgnyez doegsaw, song boux lwggwiz doxcaeuq ciq le 7 fanh maenz, bae gwnz haw Biuzlij cawx le aen ranz gaeuq ndeu youq. Song ranz vunz youq dieg rog buekmingh guh hong boizcaiq. Ranz lwggwiz iq saedceij ceiq hoj，moix baez aemq haeux ma yawj Cau Gveilanz caeuq lwgnyez, caiq hix mbouj miz ngaenz hawj gyoengqde. Cau Gveilanz gangj:“Yawjraen dahlwg iq byoem fou lo，fwngz naj cungj biegbembem, bouxgvan caemh gyaez de, gou couh cuengqsim lo.”Gij hoj gij nanz saedceij hawj gwnz naj Cau Gveilanz hwnj nyaeuq haujlai，youq gij nyaeuq haenx，yawjraen le gij hoj gij naek saedceij，doengzseiz caemh gamhsouh daengz le caencingz raeujrub.

Ndaw ranz miz seiq boux lwgnyez, yienznaeuz cauzcauz nauh- nauh，danhseih caemh gig nauhyied. Ngoenznaengz haetromh 5 diemj，Cau Gveilanz couh hwnqcongz bae dwk feiz cawj haeux、ndat raemx，soengq sam boux lwgnyez bae hagdangz. Goeng gyagoeng cij gwn ndaej gijgwn cukcet，de dawz nohmou faeg mienz caeuq haeuxcuk itheiq aeuq. Caj gyoengqde gwn sat le，de cij ndaej- hoengq gwn geij gaemz. De sousib ndaw ranz， guh hongranz， lox laeq lwg’iq Vangz Ginhyungz sat le，vanzlij yaek bae gwn bya raemj fwnz roxnaeuz ndaem byaek. Gaenj guh menh ganj，seizgan gvaq ndaej gig vaiq，gyoengq lwgnyez youh yaek cuengqhag ma ranz lo. Gyanghaemh， Swiqndang sat，gyoengq lwgnye caeuq de ninz youq aen congz hung ndeu，de dingq gyoengq lwgnyez boih faenzcieng gobwnj、gangj gojgaeq，daengx ngoenz couh yienghneix gvaqbae lo.

Ndaejhoengq seiz, Cau Gveilanz bang gyagoeng de fei byoem，fei sat le，yungh sujbaq raeuj mad gij byoem nwnh deuz, gyagoeng de doiq aen gingq yawj le yawj bonjfaenh, riu dwk gig sim’angq. Gij bien aen gingq ndaw ding hwnj myaex lo，seiqhenz nem rim le gij ciengjcang gyoengq lwgnyez. Cau Gveilanz naeuz：“Bouxbawx caemh dwg dahlwg bonjfaenh，lwggwiz caemh dwg daeglwg swhgeij.”

Cau Gveilanz gangj：“Suenq hwnjdaeuj，caiq gvaq 16 bi，dahlan Vangz Ginhyungz 2 bi neix ndaej 18 bi le，gou cij ndaej yietnaiq lo. ”