Sai: Guhdoj dwg famhfap

Meuzdiet dwg fouzhingz

Bouxlawz mbouj siujsim

Deng gap din ga goenq

Mbwk: Bya mboujlwnh hung’iq

Mbouj ndaej diuq hwnj haenz

Veizfap gangj swyouz

Dai gwnz haenz ndongjndot

Sai: Guhdoj lumj gwndoeg

Hainduj gwn saek di

Gwn ndaej baez doek baez

Ciuhvunz gaiq mbouj bae

Mbwk: Cujsiz Siz Ginbingz

Heuh raeuz gangj vwnzmingz

Mboujlwnh vunz gijmaz

Cungj mbouj ndaej guhdoj

Sai: Sevei gyacizgvanh

Lumj daengngoenz nei rongh

Ciuq ngoenz lienz daengz haemh

Dazyinx vunz guh saeh

Mbwk: Daj Buenzgoj roengzdaeuj

Ndaem naz ndaej gwn haeux

Guhdoj siengj fatcaiz

Dungx iet dai gwnz roen

Sai: Cujsiz Siz Ginbingz

Son lwgminz roxyiuj

Gaenx guh byaij roen fouq

Guhdoj hoj daengz dai

Mbwk: Cujsiz Siz Ginbingz

Son gyoengqvunz gwnzbiengz

Guhhong liz hoj gyae

Guhdoj baenz gaujvaq

Sai: 360 hangz

Hangzhangz ok canghyienz

Bouxgik bae doj cienz

Gag byaij hwnj lohgungz

Mbwk: 360 Roen

Diuzdiuz doeng loh fouq

Cijmiz bae guhdoj

Dwg diuz roen ra dai

Sai: Gaenx guh reih guh naz

Cancan miz bya noh

Bae guhdoj raqraq

Bae ngaenz lij deng gyaeng

Mbwk: Dojciengz nywjsaejgoenq

Bouxsien gwn hix dai

Gangjnaeuz vunzbiengz raeuz

Baez bungq mingh mbouj miz

Sai: Dojciengz youq giz ndaem

Cauzlak fanh ciengh laeg

Mwngz ciengeiz geiq ndaej

Doek roengz gouq mbouj hwnj

Mbwk: Dojciengz cingj fouzdaej

Vunz mbouj ndaej bae gyawj

Danghnaeuz byawz mbouj dingq

Ranz caiq miz hix gungz

Sai: Canghgyah hai dojciengz

Couh lumj vunz doj bya

Cijaeu mwngz bak ngah

Baez gwn couh hwnj ngaeu

Mbwk: Guhdoj lumj doj bya

Yaeuh vunz gwn ngaeubya

Daengz mwngz gwn seizhaenx

Deng ngaeu deuz mbouj ndaej

Sai: Gyanghaet bae geij maenz

Gyanghaemh saw baenz fanh

Ngaenz cienzbouh saw liux

Lumj hanq deng cienz bwn

Mbwk: Hainduj bae geij faen

Doeklaeng saw daengz cien

Ngaenz saw bae seuqsat

Lumj duzdangh bok naeng

Sai: Miz vunz vih guhdoj

Bienq bae caeg doxgaiq

Deng moeb gen ga raek

Lij deng daep gazfwngz

Mbwk: Miz vunz saw ngaenz lai

Deng gai gyadangq caez

Yah caeuq lwg mbouj aeu

Ngoenznaeng youq dojciengz

Sai: Mbanj gou Cieng Daegsam

Geij bak fanh gyacaiz

Doj saw bae daiq lai

Daengz dai mbouj miz faex

Mbwk: Hawj hingz duznou gonq

Doeklaeng saw duzvaiz

Yied doj saw yied lai

Lwg yah gwn raemx gvaq

Sai: Miz vunz vih guhdoj

Bae lanz loh gaj vunz

Deng buenq hawj swjhingz

Mingzsing haeu lumj haex

Mbwk: Son lwglan daihlaeng

Guhdoj haih vunz lai

Bae ngaenz dwg saeh iq

Lau mingh hix boiz haeuj

Sai: Danhfanz aen dojciengz

Cungj dwg rongz duzdoq

Bouxlawz byaj haeujbae

Boux haenx dingh boihseiz

Mbwk: Gou lwnh hawj caezgya

Vunz guhdoj deng haih

Dojciengz dwg feizhaij

Haeujbae nanz dauqma