□ bonjbauq gicej Couh Yi /周 玉

“Cietfwen sam nyied sam, nauhyied dangq gvaq cieng. Hohfuk gyoengq beixnuengx, ndang cangq dem souhyienz.”“Aen cietfwen Mbanjcuengh, dauqcawq yiengj sing fwen. Mboujdan vunz Bouxcuengh, beixnuengx wnq caemh daeuj.” Youq yienhciengz bi 2016 cietfwen Mbanj- cuengh Cungguek·Vujmingz “sam nyied sam Bouxcuengh”nem ciet Loegvet vwnzva lijyouz, dingqnyi Se Cinhsenh caeuq Cau Cuiyen daengj canghfwen Bouxcuengh doiq fwen, gij hekyouz daeuj Vujmingz camgya“sam nyied sam”Bouxcuengh haenx dingq dwk dawzyinx raixcaix.

Liggaeuq sam nyied sam, dwg aen ciet Bouxcuengh youqgaenj, lij heuhguh“cietfwen sam nyied sam”. Vunz Bouxcuengh sibgvenq aeu gij hingzsik eu fwen doiq fwen、diuq foux、caeq cojcoeng mbaenj fuk doenghgij neix daeuj angqcoux seiz hainduj fanh faed hoengh maj neix, ranzranz aeu haeuxnaengj haj saek、gaeqdumq、nohbit、bya daengj doxgaiq cuengq- caeq cojcoeng，mbaenj muengh bi laeng fouqmiz swnhleih. Daj bi 2014 hwnj, moix bi liggaeuq sam nyied sam dingh aen gyajgeiz goengcungq, daengx gih cuengqgyaj song ngoenz.

Vujmingz dangguh “Mbanj- cuengh Cungguek”, youq seiz“sam nyied sam”, dauqcawq miz sing fwen, dauqcawq cungj vunz lai vunz daih. 4 nyied 9 hauh baihaet, youq aen gvangjcangz Vujmingz Dijyuzcangz, 2016 nienz hawfwen Mbanjcuengh Cungguek·Vujmingz “sam nyied sam”nem ciet Loegvet vwnzva lijyouz haimuq, gij fwen gij go gij foux yienh’ok daegsaek Bouxcuengh, gij ciengzmienh biujyienj dwkgienz hungloet, gij fouxfaexsaux yinx vunz yawj、yinx vunz haengj, gij haiz- giegraez biujyienj gig ndeiyawj, gak yiengh biujyienj doxlwnz hwnjdaiz, hawj vunzlai yawj dwk angq raixcaix. Seizhaenx, ndaw gvangjcangz gig nauhyied, couh lumj aen gyangngoenz seizhaenx ityiengh hoengz, ityiengh ndat.

Naihlaux Liuz Yiyingh ndaej 92 bi neix, heuh lan de buenxdaiq daj Yilinz daeuj Vujmingz camgya hozdung“sam nyied sam”. Youq yienhciengz doiq fwen, naihlaux dingq bouxwnq doiq fwen dingq dwk naj riu sim’angq. Boux lan de doiq gicej gangj, naihlaux itcig haengj dingq fwen, ndigah, bineix couh daiq de daeuj Vujmingz yienhciengz dingq, hawj de angq gaeuq mbat ndeu.

Aen haimuqsik cawz le gij go foux miz daegsaek Bouxcuengh, caemh lij miz go foux gij vunz daj Funghbinh Yangh Daizvanh daeuj biujyienj —《Cingz Ahmeij Daibingz- yangz》, aen cezmuz neix hawj gij heiqfaenh yienhciengz hoengh hwnj- daeuj. Boux yanghcangj Funghbinh Yangh Liuz Cingfangh gangj: Baez neix dwg dou baez daihngeih daeuj Vujmingz camgya hozdung “sam nyied sam”lo, dou camgya aen hozdung neix, maqmuengh ndaej doiq doicaen vwnzva cietheiq saujsu minzcuz fazcanj miz leih, doengzseiz caemh ndaej doicaenh mbouj doengz minzcuz vwnzva gyaulouz dem cingzgamj gyaulouz.

9 hauh baihringzgvaq, Swcigih fucujsiz Vangz Siyungj、Swcigih Daizban、Minzveij、Vwnzvadingh、Namzningz Si Cwngfuj daengj danhvei lingjdauj bae daengz Gvangjsih Minzcuz Cunghconh camgya le 2016 nienz“sam nyied sam Bouxcuengh”ndaw hag minzcuz vwnzva hozdung—“Fatyiengz minzcuz vwnzva, caemh guh hagdangz gyaeundei”. Ngoenz haenx, ndaw hag dauqcawq ndaej gamjsouh daengz heiqfaenh cietheiq, gij minzsuz hozdung lai cungj lai yiengh, yiengh beij yiengh ndeiyawj. Hagseng Gvangjsih Minzcuz Cungh- conh caeuq beixnuengx daj Daizvanh Vahlenz Si、Yizlanz Yen、Daizdungh Yen daeuj haenx itheij fwngz rag fwngz diuq fouxdohyeh，yienhciengz sing riu、sing wenqyaem、sing diuqfoux gyoebgyaux youq itheij nauhyied raixcaix.