□ Liengz Fuyungz / 梁富容

Sai: Seizneix guekgya raeuz

Gangjvah lumj sing gang

Fazcanj suijbingz sang

Beij mbin lij vaiq lai

Mbwk: Seizneix vunz Cungguek

Ngoenz beij ngoenz miz ngaenz

13 ik lwgminz

Sing riu mbwn yaek lak

Sai: Seizneix vunz Cungguek

Fwngz camx rin hix byoengq

Guek giengz minz miz ngaenz

Lajmbwn miz visaenq

Mbwk: Gohyoz fazcanj vaiq

Guh yienghyiengh cungj baenz

Fwngz vix rin bienq ngaenz

Fwngz vix raemx baenz gim

Sai: Guh aen ruz rox mbin

Raeuz bae cunz bouxsien

Caux lwgroeg ndaem ndaej

Bae laj haij gaemh lungz

Mbwk: Gyaudoeng fazcanj vaiq

Daihloh lienz baenz muengx

Ruz laux doeng lajmbwn

Vaiq caeuq mbin doxdoengz

Sai: Lohdiet gvaq bak mbanj

Bouxlaux gyaez ganjhaw

Ngoenzcog bae Ouhcouh

Ngoenzrawz youh dauqdaeuj

Mbwk: Gwn raemx mbouj lumz mboq

Byaij roen mbouj lumz din

Guek giengz minz fouqmiz

Guek gungz minz engq hoj

Sai: Gwn haeux mbouj lumz naz

Gwn noh mbouj lumz mou

Seizneix raeuz bienq fouq

Doenghbaez mbouj ndaej lumz

Mbwk: Lij youq sevei gaeuq

Guek deng vunz ciemqhaeuj

Gaj lwgminz fouzsoq

Raeuz lix ndaej gig nanz

Sai: Miz bing bet guek comz

Daeuj Baekging guhyak

Baj feiz ndeu baez coemh

Suen Yenzmingz baenz daeuh

Mbwk: Hoenxciengq mbouj ndaej

hingz

Gvej deih hawj bouxwnq

Yanghgangj caeuq Aumwnz

Hawj guek wnq daeuj guenj

Sai: Bing Yizbwnj ciemqhaeuj

Daeuj Namzging gaj vunz

Cibsam fanh beixnuengx

Lwed lae rim daihhaij

Mbwk: Bing Yizbwnj ciemqhaeuj

Gaj vunz lumj gaj gaeq

Bouxlaux caeuq lwgnyez

Boux lawz cungj mbouj ce

Sai: Bing Yizbwnj haeuj mbanj

Gaj vunz lumj gvej rum

Mboujguenj mbwk naeuz sai

Raen vunz doq gaj caez

Mbwk: Lwgminz raeuz deng haih

Cuengq sing daej mbouj dingz

Daengx guek gag beixnuengx

Caeuq Yizbwnj hoenxciengq

Sai: Lwgminz cienz Cungguek

Caezsim bae dingjhoenx

Aeu noh lwed raeuz bae

Henhoh guek caeuq ranz

Mbwk: Vih baujvei guekgya

Aeu ndang dangj lwgyienz

Yungh bet bi seizgan

Hawj Yizbwnj douzyangz

Sai: Cungguek Gungcanjdangj

Dwg gangcan yinghyungz

Dazyinx vunz cienz guek

Buek hingz bing Yizbwnj

Mbwk: Caetcib lai bi gvaq

Hix aeu geiq ndawsim

Raeuz yunghrengz geijlai

Cij dwk hingz Yizbwnj

Sai: Doeklaeng couh deng dub

Gag boux yaek aeu geiq

Vih saedceij raeuz ndei

Aeu haenqrengz fazcanj

Mbwk:Vih mbouj caiq deng ciemq

Gyaez guek geiq ndawsim

Caezgya cungj fukok

Guekgya ndaej fouqgiengz

Sai: Hwnj mbwn gaemh duzbyaj

Roengz haij dwk duzlungz

Vih guekgya mbouj gungz

Gunghawj ok cingqcin

Mbwk: Cax bya hix gamj caij

Feiz haij hix gamj youz

Vih guek raeuz engq ndei

Bouxboux cungj gaenx guh

Sai: Seizneix lij miz fangz

Yaek haeuj ranz caeg huq

Raeuz aeu miz cinjbi

Moeb de mbouj louzcingz

Mbwk: Seizneix Cungguek raeuz

Gangdiet guh cangzcwngz

Mbwn loemq hix mbouj ning

Deihsaenq hix mbouj lau

Sai: Daezsingj fangz gag rox

Byaij roen aeu siujsim

Haeuj ranz wnq caeg gwn

Lau mwngz deuz mbouj ndaej