Miz boux canghfaex ndeu laux lo, de caeuq lauxbanj de gangj de yaek lizhai hangz gencuz, dauqbae ranz caeuq yah、lwg de itheij gvaq saedceij bingz- ciengz.

Boux lauxbanj de yienz- naeuz sij mbouj ndaej boux canghfaex laux dinfwngz ndei neix lizhai, hoeng, hix cijdwg cam de ndaej mbouj ndaej bang guh aen ranz he dem caiq bae, boux canghfaex laux neix doengzeiq lo. Doeklaeng, caezgya cungj yawj ok sim de caeux couh mbouj youq gij hong lo, de yungh gij faex mbouj ndei, guh hong hix simco. Daengz aen ranz neix guh baenz seiz, boux lauxbanj de hawj fag yaekseiz aen ranz neix hawj de dawz.

“Aen ranz neix doeklaeng couhdwg aen ranz mwngz”, boux lauxbanj de naeuz,“Gou soengq hawj mwngz.”

Boux canghfaex laux neix doeksaet caez, najhoengz dangqmaz. Danghnaeuz de caeux di rox aen ranz boux lauxbanj de heuh de guh couhdwg guh hawj swhgeij youq, de baenzlawz rox yienghneix guh ne? De itdingh rox lumj gaxgonq nei yunghsim bae guh ranz. Couhdwg aenvih nyinhnaeuz aen ranz neix dwg de ceiqlaeng guh aen he lo, ndigah mbouj baenzlawz nyinhcaen. Seizneix de deng youq haeuj aen ranz vaih- vadvad he lo!

Gizsaed raeuz hix lumj boux canghfaex neix dox- doengz. Dou mbouj cizgiz bae guh saeh, cungj dwg siuhgiz dwk doiqdaih, gijmaz saeh cungj dwg mbouj haengj guh ndei liux caiq aeu ndei, youq youqgaenj seiz mbouj ndaej yienh’ok rengz ceiq hung. Daengz raeuz gamjdaengz hingzsi mbouj deng seiz, raeuz caeux deng homh youq ndaw aen ranz swhgeij gag guh haenx.

Ndigah, siengj swhgeij baenz boux canghfaex neix, siengjsiengj aen ranz mwngz cingq guh haenx, moix ngoenz mwngz roq haeuj diuz ding ndeu, dem hwnj gep benj he, roxnaeuz caep hwnj faq ciengz he, yungh raemxhanh mwngz ndeindei bae guh aen ranz mwngz ba! Swnghhoz mwngz dwg doxgaiq ciuh neix mwngz caux ok dog, mbouj ndaej uet bae caiq guh baez ndeu, couhcinj cijmiz ngoenz he ndaej lix, ngoenz haenx hix wnggai lix ndaej nyinhcaen, seizseiz geiq ndaej coenz vah neix——swnghhoz dwg mwngz swhgeij caux ok.