Bakdou miz go faexgeq ndeu, lumjbaenz boux daxgoeng nei dingh- dingh dwk soengz youq baihrog bakdou. Rag gofaex cap roengz lajdeih bae laegmbub, rumz bongj ngefaex caeuq mbawfaex, daengngoenz haenq- haenq dwk ciuq roengz byaifaex daeuj. Go de couh baenzneix soengz dwk hen dwk, cin bae cou ma, de ciuqyiengh dwg baenzneix.

Gou lij iq seiz caeuq daxboh doxhaemz dawzcaeuz gvaq, doxboh couh lumj ndaek rin caepcat he, gou cibfaen lau depgaenh de. De singq gig gaep, geiq ndaej mwh lij iq, aenvih gou dwk boeg deb byaek ndeu, daxboh coenz he cungj mbouj gangj, doq gaem dawz diuz faexdonh he mboengj gou. Yaepyet, naengnoh gwnzndang gou doq hwnj geij diuz laenznding. Gou nyaenx raemxda dwk, mbouj hawj raemxda rih okdaeuj, ndawsim haemz dangqmaz. Daxboh mboengj baeg lo cij naengh gvaq henz bae yietnaiq. Mwhde, daxmeh menhmenh byaij gvaqdaeuj, gou doq bongh haeuj rungj daxmeh bae daejnganga, daxboh cix naengh youq baihhenz, bak gamz ci ien ndeu cit boebboeb.

Lai baez deng daxboh mboengj dwk naeng laenz gawh in, ndawsim gou gag ngeix, gou dauqdaej dwg mbouj dwg de caenseng? Ngoenz riengz ngoenz bae, aen singq lij mbouj gaijbienq saek di. Baez ndeu, de naengh youq gyaeujmbonq cit ien boebboeb. “Mwngz ngoenz daengz haemh cungj mbouj hawj gou soeng saek di, gou haemz dai mwngz lo……” Daxboh gaet faenz maenj heuj dwk naeuz. Daxmeh youq henz mbouj gamj gangj saek coenz vah, raemxda cix doek mbouj dingz.

Laxlawz, daxmeh vih ceng gvaengh reih ndeu ndaem byaek, caeuq ranzhenz ciengzseiz doxceng. Daxmeh dwg boux vunz goq hokranz he, yawj gvaengh reih neix dangq diuzmingh. Danhseih daxboh cix gencueg goz dauq rog, bang vunz ranznden fok ndaq daxmeh. Daxmeh gamjdaengz gig ienqhoij, baenzneix ceng mboujdanh mbouj ndaej maz ndei, dauqfanj deng daxboh fok ndaq can he. Daxmeh daejsoebsoeb, naeuz:“Mwngz gaej ndaq gou lo, gou hix mbouj rox gou lij gyaeu ndaej geijlai bi dem……” Daxboh mboujcaiq ndaq, gou gaem dawz fwngz daxmeh, raemxda nyaenx mbouj ndaej gag rih rim naj.

Daxmeh bi’ndwen geq lo, ciengzseiz gvaqniemh gou, gek samhaj ngoenz couh heuh gou baema ranz. Gou ngamq daengz bak douranz seiz, go faexgeq lumjnaeuz yiengq gou ngaek gyaeuj vad fwngz nei. Gwn caeuz seiz, gou bang daxboh daek vanj haeux ndeu caemhcaiq nip byaek hawj de, de yienznaeuz najmong, doiq gou hix mbouj lumj gaxgonq yienghhaenx yiemzleih lo. De naengh youq henz daiz cit ien boebboeb, gou hix mbouj lanz de, caeuq de bungq boi laeuj ndeu, caegcaeg yawj de baenzlawz yiengh……Geij bi mbouj raennaj de lo, gou hix mboujcaiq lumj gaxgonq yienghneix haemzndaenq de lo. Gou youq rogdieg gunghcoz samcib lai bi, sawqmwh mingzbeg daxboh vih ciengx ranz vunz ndeu gvaq ndaej geijlai sinhoj. Gwndaenj atlig, hawj daxboh mbouj ndaej mbouj doiq lwg yiemzgek son’gyauq. Gou hix gag yienzliengh daxboh lo.

Gou siengj, youq aen seizdaih hojndoq haenx caen mbouj rox daxboh baenzlawz ngaiznyed gvaqdaeuj. Vunz mbouj dwg faex haz, byawz mbouj simcieg ne? Cijdwg, gij gyaez daxboh naekcaem lai, gou lijgaij de hix dwg laeng di lo.

Daxboh, mwngz geijlai bi gvaqdaeuj, vih ciengx mingh daengx ranz vunz, yungh aen mbaq mwngz rap hwnj daengx ranz maqmuengh, couh lumj go faexgeq bak douranz, youq ndaw rumz dongj fwn rwed giendingh dwk soengz youq. Ci ien ndaw fwngz de, couh lumj boux baengzyoux geq ndeu, youq haemh mbouj miz ronghndwen mbouj miz ndaundeiq haenx, dinghdingh dwk ngeng rwz dingq goenggeq he lwnhgangj gij goj ciuhvunz de.

Seizneix, yawj coh rog cueng, go faexgeq lij soengz youq gizde, gou fwngz gaem ci ien ndeu, hag gij yiengh daxboh mwhhaenx, boq ok gien doek gien hoenzien. Ndwenngoenz lumj raemx lae, faexgeq did mbaw moq, gou gingq ciuq bwn’gyaeuj, bwn’gyaeuj gingqyienz hix hau liux lo. Lij miz gijmaz banhfap dem? Cij miz raemxda buenx gou cixbah lo.

□ Luj Sauh