De coengzlaiz mbouj hawj vunzlai Guengjsae saetmuengh gvaq, baez ma daengz Guengjsae de couh aeu gij cungceij gaenbonj cienzsim cienzeiq fuzvu lwgminz aendangj raeuz caeuq gij hengzdoengh saedcaih fuzvu vunzlai gak cuz ranzmbanj youjgih dwk doxgap hwnjdaeuj, de doiq lwgminz gig cungsim simhoengz, gig siengj gaijbienq gij yiengh doeklaeng Guengjsae, ndigah ciengz- ciengz haeuj dieg lajgoek bae guh diucaz yenzgiu, hwnz lienz ngoenz mbouj goq bonjfaenh dwk haenqrengz guh hong. De caeuq gij goengdaeuz Guengjsae wnq doengzcaez, ciuq gij lohsienq、 fuengcim、 cwngcwz caeuq cingsaenz cijsi dangjcunghyangh, daj gij saedcaeq Guengjsae hwnjdin, lwgda yawj coh daengzcog, hoeng youh byaij ndaej maenhsaed, cienzmienh giva, miz diuzleix dwk cingsim gyoebcomz hwnjguh ginghci、vwnzva daengj gak hangh hongsaeh daengx gih. De baengh gij dungxcaiz daengxcungq aenban goengdaeuz, diuhdoengh guengjdaih ganbu caeuq vunzlai engqgya hwnj- heiq bae guh hong, ciq gij rengz rog gih, youq dangjcunghyangh caeuq gozvuyen dazyinx caeuq bangcoengh lajde, fazyangz gij cingsaenz baengh rengz swhgeij bae fazcanj、haenqrengz bae guh, guh baenz hongndaej aen dam aen.

20 bi neix daeuj, Guengjsae cawz caeuq gij swngj、swcigih caeuq si beixnuengx wnq doxdoengz deng “daih yathaeuj” caeuq “vwnzva dagwzming” song baez loengloek neix nyauxluenh caeuq buqvaih le, lij aenvih Meijgoz ciemqhaeuj Yeznamz, Swcigih Bouxcuengh Guengjsae youh caeuq Yeznamz Minzcuj Gunghozgoz doxrangh, youq dangjcunghyangh lingjdauj lajde, rap hwnj gij hong naekcaem bang Yez, guekgya mbouj ndaej mbouj nyaenxsim gemjnoix roengzngaenz hawj Guengjsae. Youq dingz cingzgvang lajneix, Guengjsae hwnjguh seveicujyi lij aeu ndaej cingzcik gig ndei. Ciuq gij gyaqcienz beij ndaej daeuj suenq, duenhneix gij canjciz gungh nungzyez daengx gih demgya 3 boix, gij souhaeuj ngaenz- caiz deihfueng demgya 2.4 boix, gijgvangq reihnaz ndaej daengz rwed raemx mizyauq demgya 1.2 boix, gijgvangq cauh ndoeng demgya 5.2 boix, gij raez goengloh demgya 3.6 boix, yenzmeiz demgya 22.1 boix, denliz demgya 53.1 boix, dangzoij demgya 4.2 boix. Daihbuek hwnjguh goekdaej reihnaz caeuq dietloh、goengloh、ciengzfeihgih、aensok daengj hongloek doxlienz guh baenz, buek dam buek giyez gunghgvang ndaej gonqlaeng douzcanj, gang caeuq gangcaiz、suijniz、dohlahgih、liuzsonh、sauhgenj、vafeiz nungzyungh、souj- byauj、gvandouz daengj daj mbouj miz daengz miz, baenzbyoz cauh’ok. Hagdangz gaudaengj bujdungh dem- gya 2.3 boix, hagdangz gisuz ciennieb cungdaengj demgya 5.8 boix, cunghag bujdungh demgya 9.7 boix, yihyen demgya 9.3 boix, doxdax dijyuz gyonj ndaej 83 aen daeuzmingz daengx guek、11 aen daeuzmingz Yacouh、3 aen daeuzmingz seiqgyaiq, dwk buq 10 baez geiqloeg seiqgyaiq. Ginghci、vwnzva daengj gak hangh hwnjguh daengx gih caeuq gij mienhmauh cingsaenz lwgminz daengx gih cungj bienq ndaej moqsaksak, dubmaenh le aen goekdaej ndei he hawj gvaqlaeng Guengjsae guh hong yienhdaihvaq seveicujyi.(caengz sat)