It Dingq——Dingq “Fwenvuengz” Doiq Fwen

“Sam nyied sam” aen cietheiq minzcuz neix youq Diegcuengh seizgan gyaenanz, dwg aen ciet Guengjsae gak minzcuz caez angq ndeu. Bineix, Vujsenh Yen guh “sam nyied sam” hozdung lai cungj lai yiengh、yinxdaeuz raixcaix, daengx yienh vunz lai vunz daih、sing fwen sing angq. Lajneix, cingj riengz dou daeuj yawjyawj ba.

Ciet “sam nyied sam”, Vujsenh Yen mbanj haw hoengh dangqmaz. Vunz Vujsenh yah “fwenvuengz Guengjsae” Goz Siulenz, 4 nyied 8 hauh (liggaeuq 3 nyied co’ngeih) daeujdaengz Dunghyangh Cin Mbanj- daemzlienz caeuq daihgya doiq fwen. Yah neix sing fwen niunetnet, ndeidingq raixcaix, cienz ok gij cingz naekna Bouxcuengh, daeuq ndaej vunzlai riugakgak, angqvauvau.

“Ok bak cix baenz fwen, dwen daengz couh rox mingz”, gyoengqvunz baenzneix haenh “fwenvuengz” Goz Siulenz.

Miz “fwenvuengz” daiqdaeuz, gyoengqvunz engq haengj doiq fwen lo. Yienhciengz baenz aen fwenhaij ndeu, hawj vunzhek gamjsouh daengz mbanjranz “fwenvuengz” miz yinxdaeuz dangqmaz.

Ngeih Yawj——Yawj Minzsug Dieg- cuengh

Youq gwnz gvangjcangz Dunghyangh Cin Mbanj- sanhdoh, foux faexsaux、foux roegdingdiuj、foux saeceij、foux maxfaex、foux haizgiegraez、vunzhek doxdax, doenghgij hanghmoeg hozdung minzcuz daegsaek noengznat cingq guh ndaej hoenghhwdhwd. Doengzseiz, lij miz dahsau daegmbauq daenj gij ndangdaenj Bouxcuengh lengjlili, diuqyekyek angqwtwt baijyienj hawj vunzhek yawj. Doenghgij hozdung neix, cungj dawz minzsug caeuq cienzdoengj vwnzva doxgiethab, daegbied dwg “cauh faexndoek dog” aen hanghmoeg doxdax cij cojgoeng Bouxcuengh gag miz neix, hawj vunzhek geizheih dangqmaz, yinxdaeuz dangqmaz.

Sam Cimz——Cimz Gijgwn Daegsaek

Gijgwn daegsaek Dunghyangh haemq mizmingz. Haeuxnaengj haj saek、byabauq、faenjhaeux、bya ndwq- hoengz、noh ndungq、rangzgyaq cauj byadoj daengj, doengh gijgwn daegsaek neix, fwi heiq rangfwtfwt, yaeuh ndaej vunz myaiz rwi, hawj vunzhek gamjsouh daengz gij “byaeklaeuj bakranz” Diegcuengh cienzdoengj geijlai ndeigwn.

Seiq Youz——Youz Funghgvangh Vuj- senh

Vujsenh funghgvangh gyaeundei, ranz ciuhgonq mizmingz, gyoengq vunzhek daeuj daengz Vujsenh cungj noix mbouj ndaej bae youz. Bineix “sam nyied sam” cuengqgyaj caeuq ngoenz singhgiz guhdoih, gungh miz 4 ngoenz ndaejhoengq. Miz vunzhek angq naeuz: Bineix “sam nyied sam” daeuj Vujsenh, ndaej menhmenh youz lo. Ndigah, mboujguenj dwg Byamaxan caeuq “Haj Max Laengz Dah” doengh giz ndawsingz gizgyawj, roxnaeuz dwg Luegbakdat caeuq Gamjvaizsihniuz doengh giz rogndoi dieggyae, hix mboujguenj dwg ranzhung ciuhgonq doengh giz caemcingx, roxnaeuz dwg Dadwngzgyaz doengh giz raemx gip dan yiemj, cungj miz haujlai vunz bae youz.

Haj Haenh——Haenh Byauhyij Cietheiq

Vujsenh Yen Dangveij、Cwngfuj swnh “sam nyied sam” hozdung haenqrengz senhconz vah saw minzcuz cwngcwz，mde’gvangq vah saw minzcuz yingjyangj. It dwg youq yienhsingz caeuq gak yanghcin venj senhconz byauhyij Cuengh Gun song cungj cihsaw. Ngeih dwg yungh Cuengh Gun song cungj cihsaw daeuj sezgi aen vujdaiz minzsug hozdung, yungh Cuengh Gun song cungj vah daeuj bauq cezmuz. Sam dwg minzcuz hagdangz youq ndaw hag yungh Cuengh Gun song cungj cihsaw guh gak cungj gak yiengh byauhyij caeuq banjbau. Gig vaiq, youq Vujsenh, doenghgij byauhyij Cuengh Gun song cungj cihsaw daegbied lwenqda, sawj cietheiq yienjndaej engq noengznat. Doenghgij banhfap neix ndaej haenq coi sevei yungh vah saw Bouxcuengh, ndaej daengz gyoengqvunz haenhndei.

“Sam nyied sam” dak dwk minzcuz vwnzva, cingq youq gwnz ranghdieg Vujsenh daih- daih swnjcienz, de cingq riengz dwk seizdaih riengjret angq baenaj.