“Gyanghaet singjndiu couh eu fwen, bouxboux dwen naeuz nuengx bak lai. Daxmeh seng nuengx cix bakgvai，diuzmingh daiq daeuj eu baenz ciuh.” Youq Siengcouh Yen Majbingz Cin Lungzyangj Cunh, vunzlai yienghneix hingzyungz lwgmbwk Bouxcuengh Cinz Lanzbinh, de daj lijiq couh haengj yungh Vahcuengh eu fwen, mboujdan doenggvaq eu fwen ndaej haeuj dangj, lij camgya Guengjsae fwenvuengz doxdax gvaq, ndaej aen cwnghauh“fwenvuengz Guengjsae”. Guengjsae Densidaiz、ndaw si、ndaw yienh sinhvwnz meizdij caijfangj de lai baez, vih coicaenh Majbingz Cin baenz aenmbanj Fwencuengh guh le haujlai hong, ok le haujlai rengz.

Cinz Lanzbinh 1961 nienz seng，de daj lijiq couh riengz daxmeh、daxdaiq hag eu Fwencuengh, ndigah de daj iq couh gyaez eu fwen. De eu fwen hingzyungz faenh sim gyaez fwen bonjfaenh:“Haet siengj hwnz hix maez, haemh ninz deihdeih fonj; bae ra daxmeh son, lij ndonj bae ngaeuq daiq.” Miz baez ndeu eu fwen seiz, de roxnaj le goenggvan de, songde gietvaen le, couh itheij guh seng’eiq. Mizseiz, seng’eiq hojguh goembonj, goenggvan de youzsim lai, de couh eu fwen hawj gvan de simbingz heiqswnh: “Gaej ienq lai, fatcaiz mbouj dwg mingh daiq daeuj; doengh uk ok rengz cij baenzfouq, song raeuz gaenxguh ndaej vuenyungz.” Bingzseiz guh seng’eiq nyaengq lai, Cinz Lanzbinh lij caeu di seizgan bae eu fwen. Youq Liujcouh seiz, de ciengzciengz bae Yizfunghsanh dingq vunz eu fwen、caeuq vunz doiqfwen. Miz ngoenz he, boux fwenvuengz ndeu raen de najsug le, eu fwen cam daengz：“Dahnuengx mwngz daj gizlawz daeuj? Daeuj daengz Liujcouh guh gijmaz？Dangh mbouj dasang siengj eufwen, gou bau son mwngz baenz fwenvuengz.”Cinz Lanzbinh hix eu fwen dap daengz：“Gou vunz Siengcouh Majbingz Yangh, daj ranz cienmonz daeuj dingq fwen; gou gyaez dingq fwen haengj eu fwen, caemh siengj hag guh boux fwenvuengz.” Gij dungxcaiz eu fwen de, gij sing go ndeidingq de, gij lijsiengj hunggyae de, hawj boux fwenvuengz gamjdoengh lo, doq gietdingh sou Cinz Lanzbinh guh lwgsae. Yienzlaiz bouxsai neix dwg Guengjsae Sanhgoh Hezvei veicangj gonq——Lij Lungzgiuz. Lij Lungzgiuz gawj de hawj Siengcouh Yen Sanhgoh Hezvei, aen hezvei neix caiq doigawj de bae aen Beizyinbanh Son Eu Fwen Swcigih Minzyijveij gawjbanh haenx camgya hagsib. Youq mwhhaenx, Cinz Lanzbinh yunghsim hag, sousup le dwzcangz bouxwnq, gij suijbingz eu fwen de daezsang le haujlai.

Youq fwenvuengz aen ranz hung neix, Cinz Lanzbinh roxnaj le gyoengq canghfwen mizmingz: Guengjsae Canghfwen Hezveiz veicangh Cinz Cwngzginz, fuveicangj Cinz Giuj- hungz、boux canghfwen mizmingz Vangz Yezsiengh、Vangz Youjfuz daengj. Aenvih de camgya ciennieb beizyin gvaq, gyoengq canghfwen mizmingz caiq yunghsim son de, gij suijbingz eu fwen de yied daeuj yied sang. De camgya le bak lai ciengz eu fwen doxdax youq Yizcouh、Lozcwngz、Yungzsuij、Nanzningz daengj gak si、yen gawjhengz haenx, de eu fwen ndaej ndei, caemh ndaej haujlai ciengjli. 2013 nienz Guengjsae fwenvuengz doxdax, de ceiq geiq ndaej laeg. Seizhaenx, gungh miz 10 aen doih 20 boux vunz camgya, bouxboux cungj ak eu fwen, Cinz Lanzbinh baez daih’it yawjraen yiengh ciengzmienh neix, ndawsim de lauyekyek, hoeng siengj daengz bonjfaenh dwg daiqbiuj Siengcouh daeuj camgya，aeu vih aen mbanj swhgeij cengheiq, ndaw sim de amqamq eu hwnjdaeuj：“Bya cax haij feiz gou gamj roemx, lwgmanh caiq manh gou gamj cimz; mwngz miz gaen ndeu gou cib liengx, mwngz dwg Vujdangh gou Saulinz.”Doek- laeng, Cinz Lanzbinh baengh gij dungxcaiz bonjfaenh, dued ndaej aen cwnghauh“fwenvuengz Guengj- sae”. Gvaqlaeng de camgya le Guengjsae fwenvuengz doxdax, ndaej“Guengjsae fwenvuengz” daih’it mingz .

Cinz Lanzbinh mwh eu fwen, dawz fuengcim cwngcwz dangj yungz haeuj ndaw fwen. Youq aenhoih Cibbet Daih dangj raeuz hai seiz, de eu fwen danq daengz:“Aen hoih Cibbet Daih, daez fanj fuj cang lenz. Dub duzguk duznengz, gangj deng sim lwgminz.”Aenvih Cinz Lanzbinh iugouz swhsiengj cinbu, ciengzciengz yungh eu Fwencuengh senhconz gij fuengcim cwngcwz dangj, ndaej dangjcihbu ranzmbanj soubaenz Cunghgung dangjyen. Gyahaeuj dangjcujciz seiz, de angq dwk eu le hot fwen ndeu:“Eu fwen sim vandiemz, cienzcingz nyaengq mbouj dingz. Gyahaeuj gung- canjdangj, eu fwen danq aen dangj.”

2013 nienz, Majbingz Yangh soengqbauq “aenmbanj Fwencuengh”. Cinz Lanzbinh dangguh boux fwenvuengz Guengjsae dog aen cin neix, roengzrengz guh gij hong hwngfat eu fwen, mboujdan daiq- daeuz laebguh Fwencuengh yenz- giujvei, vanzlij ndaej senj dang fuveicangj. De cujciz gij vunz rox eu fwen haenx baizlienh “fwen daej haq”“fwen lanz roen”daengj cezmuz, caiq soucomz cingjleix fwen ndawbiengz, camgya Majbingz Cin Fwencuengh doxdax. De daiqlingx bang cangh- fwen Bouxcuengh bae daengz gak mbanj、gak yangh、yienhsingz haiguh hozdung Fwencuengh cienzciengq, youq Majbingz Cin laebbaenz aen gihdi swnjcienz Fwencuengh, yiengq bouxcoz soncienz Fwencuengh, hawj Fwencuengh gij feihvuzciz vwnzva yizcanj neix ndaej daihdaih cienz roengzbae. Mboengqneix, Fwen- cuengh Majbingz Cin ndaej liedhaeuj mingzloeg swcigih feihvuzciz vwnzva yizcanj lo.