Linzloz Cunh dwg Sanhgyangh Dungcuz Swciyen aen mbanj ceiq hung ndawde aen ndeu, daengx cunh caet bet bak ranz vunz, ndaej vunzraeuz haenh dwg “‘gungdienh gwnzmbwn’ yienghsiengq aenmbanj ceiq ndeiyawj sam sengjgih”. Gij ranzcanx aenmbanj baizlele guh youq gwnz byonghbya, roek aen laeuzgyong miz hung miz iq dwk sieng youq gyang mbanj, daj diuz roen roxnaeuz gwnz bya doiqmienh aenmbanj yawj coh aen mbanj neix, couh lumj cingq yawj fuk vehbyaraemx gyaeundei ndeu nei, cingqsoq ndaej yiengjsouh daengz cungj gamjsouh haeuj dieg- sien ndeu.

Linzloz Cunh dieg youq giz gapgyaiq Gveicouh、Huznanz、Guengjsae sam sengjgih, liz yienhsingz Sanhgyangh 50 goengleix gyae, daengx cunh miz 700 lai ranz 3000 lai vunz. Gij dajcaep ndaw mbanj gag miz daegsaek, ranzcanx caeuq laeuzgyong gig miz daegsaek Dungcuz, gij ranzcanx de ing bya dep raemx hwnjguh, baenz caengz baenz caengz nazmbaeklae hophumx aen- mbanj, gyanghaet nditromh ciuq gvaqdaeuj, gij gvaengzlaengx aen- mbanj yienhsagsag, gij saek naz- mbaeklae caemh ronghsien dangq- maz. Daj gizgyae yawj gvaqbae, caenhraen gij ranzcanx sangsang daemqdaemq doxdaeb doxing, lumj gyaepbya lumj nyazroi baiz ndaej caezcup yinzrwd, lienz baenz benq baenz caengz baizlele doxhwnj, lumjbaenz “gungdienh gwnzmbwn” nei, gij gingjsaek ndeiyawj de hawj vunz yawj le nanzlumz, gyoengq hekyouz yawj gvaq le cix haenhdanq mbouj dingz, yawj mbouj gaeuq youz mbouj baeg dwk mbouj sij biek baema.

Gij mbawcaz Linzloz Cunh caemh gig okmingz, gai doh daengx guek gak dieg, gij gingj gyaeundei sengcingz gizneix, caemh hawj vunzmbanj simsoh simsienh youh gaenxhong, saedceij andingh vuenyungz, hawj gyoengq hekyouz yawj le hozhaenz dangqmaz.

Youq bi 2009 ndwen 11 ngoenz 6 mwh ranz caengz rongh, ciengz caifeiz ndeu ruemx gvaq Linzloz Cunh, ndaw mbanj miz 296 aen ranzcanx deng feiz coemh seuq, aen gyonglaeuz Bwzyen hungcoek sangvid ndaw mbanj caemh deng coemh baenz daeuh. Caifeiz fatseng le, youq gak gaep dangjveij cwngfuj gvansim bangcoengh lajde, youq sevei gak gyaiq ok cienz ok rengz doxbang lajde, gyoengq vunzmbanj Linzloz Cunh doxbang doxcoengh roengzrengz guh song bi seizgan, youh dauq guh baenz 296 aen ranzcanx moq, caemhcaiq cangcoih ndaej beij gaxgonq lij ndei; 5 diuz roen refeiz gvangqyub dwk dawz daengx mbanj 766 ranz gek baenz 9 aen mbanj iq gyaeundei; aen laeuzgyong Bwzyen moq caemh dauq guh ndaej beij aengaeuq engq hungcoek sangvid gyaeundei. Gij yienghmbanj engq gyaeundei engq yinxvunz de, gij yienghsiengq vunzmbanj saedceij huzndei vuenyungz de, hawj gyoengq hekyouz engq haengjgyaez, engq siengj bae youzcet.