Hag liux Cibbet Da,

Dahbawx hix roxsoq;

Daiq goeng couh lumj boh,

Gyaez boz lumj meh de.

Lajmbanj gyoengq lwgbawx,

Saw mbouj rox geij aen;

Hoeng son lwgnyez baenz,

Roxyiuj youh baenz caiz.

Bae roengz naz dauqma,

Da raen goengboz ndei;

Haeuxbyaek cawj ndaej feih,

Gyoengqde ceiq maij gwn.

Lwgbawx ndei ndaej maij,

Guh hong vaiq lij lai;

Vah unq bak youh gvai,

Beij lwgsai lij swnh.

Bungz daengz gijmaz saeh,

Couh bae cam goengboz;

Yienghlawz guh loeng lo,

Doq aeu vah unq dap.

Coengz mbouj miz beizheiq,

Ceiq rox lox goengboz;

Gwndaenj hix ciuqgoq,

Hawj gyoengqde doq gaenj.

Bi daengz byaij gvaq cieng,

Ciengx ndaej mou bit gaeq;

Aeu ceij hoengz nyumx gyaeq,

Angq bae coux bi moq.

Haujlai lwgbawx ndei,

geiq goengboz dangqmaz;

Bak diemz rox gangj vah,

Daengx ranz naj riu caez.