3 nyied 25 daengz 28 hauh, Yanghgangj Fuzvei Gyauyuz Gihginhvei cujciz Yanghgangj Gyahnanz Cunghyoz lauxsae hagseng cunzhagduenz gungh 30 boux bae daengz Sangswh Yen haiguh seiq ngoenz byaijcunz doxgyau hozdung.

Cunzhagduenz gonqlaeng bae daengz Sangswh Cunghyoz gauh ngeih nienzgaep saujsu minzcuz banlwgmbwk caeuq Sangswh Yen Minzcuz Cunghyoz co ngeih nienzgaep banlwgmbwk Yauzcuz guh doxgyau camcunz hozdung. Gyoengq hagseng saujsu minzcuz daenj buhvaq minzcuz, angqcoux gyoengq beixnuengx daj Yanghgangj daeuj haenx, caemhcaiq vih gyoengqde biujyienj minzcuz diuqfoux 《Byayauz Funghyin》. Youq cunzhag geizgan, song mbiengj doenggvaq faen cuj sonhag、 guh gijgwn ndei conzdungj、 itheij guhcaemz daengj hozdung, hawj gyoengq hagseng Yanghgangj roxyiuj daengz gij minzsuz fungcingz Guengjsae saujsu minzcuz raeuz, hix hawj gyoengq hagseng Sangswh Yen roxyiuj gij vwnzva Yanghgangj.

Baez hozdung neix caenh’itbouh coicaenh le Guengjsae Yanghgangj song dieg bouxcoz nyezrauh hagsib caeuq doxgyau, hawj song dieg mbouj doengz minzcuz hagseng demgya doxrox, roxnyinh mbouj doengz vwnzva, laebhwnj le cingzngeih naekna.(Sangswh Yenveij Dungjcanbu)