Aen sigij gonq 70 nienzdaih, Dahmeiz doekseng youq aen ranz binznungz gungzhoj ndeu. Doeklaeng, sam daeg nuengx de hix laebdaeb doekseng lo. Bohmeh de baengh song gaiq fwngz guhhong ciengx daengx ranz 6 boux vunz. Dahmeiz 4 beixnuengx de bouxboux coengmingz lingzleih, cijdwg ndaw ranz mbouj miz ngaenz, gwndaenj mbouj ndei, haeuxgwn cungj dwg lwgmaenz、maenzfaex、megmax caeuq souh haeuxyangz daengj, byaek couh dwg gip byaekdoengh daeuj gwn lo. Daenj buhmaeng vaqrengq, caen hawj vunz hojlienz ha.

Dangseiz fatseng gienh saeh ndeu gou geiq ndaej gig cingcuj. Dahmeiz ndaej 10 bi bihaenx, de lij dwg dah lwgnyez ndeu. Raen vunz gwn doxgaiq bak ngah caiq cingqciengz mbouj gvaq lo.

Baezde, Dahvah ranznden cingq gaem aen nyiedbingj ndeu gwn- soebsoeb, Dahmeiz itcig muengh dwk. Aenvih de soqlaiz mbouj raen nyiedbingj gvaq, ndaw ranz haeux mbouj gaeuq gwn, geij beixnuengx hix cingq hwnjhag doegsaw, bohmeh yawz mizsim goq neix goq haenx cawx doxgaiq hawj geij beixnuengx de? Dahmeiz ndwnjmyaiz byoegbyoeg, daengzlaeng nyaenx mbouj ndaej couh cam Dahvah naeuz:“Dahvah, mwngz gwn gijmaz?” Dahvah angjat dwk dap naeuz:“Daxboh cawx nyiedbingj hawj gou gwn, caen ndei gwn ha, hawj mwngz gwn di ndeu ba.”Dahmeiz vaiqvet iet fwngz bae aeu, maqmuengh Dahvah hawj de lai di, liuh mbouj daengz, Dahvah ngamq mbek di he hawj de. Mwhhaenx, cingqngamj deng daxmeh Dahvah nyangzraen lo. Meh Dahvah gig ndatheiq, rag dawz Dahvah couh fok ndaq naeuz:“Lwghuk ndoq, mbouj ndaej gwn nyiedbingj gvaq, heuh boh mwngz bang mwngz cawx ha, mwngz gingqyienz gamj lox Dahvah aeu gwn, mwngz nyaenq mbouj nyaenq ha? Baezlaeng mwngz caiq gamj lox Dahvah aeu gwn, gou couh aeu naenj mwngz dai bae.” Dahmeiz gig haemzndaenq. De roxyiuj, de mbouj dwg lox aeu gwn, cijdwg raen le bak ngah myaiz rih cam coenz ndeu cixbah lo. Miz baez he dwg Dahvah cawjdoengh mbek hawj de di he. Dahvah doiq daxmeh naeuz:“Daxmeh, dwg gou hawj de da.” Meh Dahvah ciepdwk naeuz:“Guenj de lox mbouj lox aeu, couhdwg gaej hawj de, de miz gijmaz doxgaiq hawj mwngz gvaq? Daegdungh ndaw ranz gijmaz cungj miz, mwngz hawj de di he gou caemh mbouj gangj bw.” Dangseiz, ranz Daegdungh fouqmiz, meh Dahvah cijdan caeuq ranz vunzfouq baedauq haeujok, yawj mbouj hwnj ranz hojndoq. Dahmeiz dingq le, raemxda doekbyoegbyoeg, aensim iqet de goemq hwnj caengz ngaeuzndaem ndeu.