Baenz benq hausaksak,

Gag yawj gag simmaez；

Lumj doek siet doek nae,

Lox vunz gyaez vunz maij.

Luegvaleiz gyaeundei,

Nazmbaeklae baenz yawj；

Byawz ndaej byaij bae gyawj,

Hawj daengx ciuh nanz lumz.

Gaxgonq, youq gwnz vangj nyi gij fwen haenh Luegvaleiz gvaq, ndawhoz caenh naemj yaek bae cet baez ndeu. Bineix ndwen 3 ngoenz 10 hauh, gou ndaej riengz aen caijfangjdonz vwnz- lenz ndaw cin bae Ginhcouh Si Ginhbwz Gih Banjcwngz Cin Mbanj- yiuzduix baez ndeu, ndaej caencingq byaij haeuj Luegvaleiz bae lo.

Dou bae daengz Mbanjyiuzduix, ndwn youq aen diegngonzgingj daih’it yawj coh gizgyae, daengx aen Lueg- valeiz cungj yawj ndaej raen cingcing cujcuj, raen lengqlengq cungj dwg goleizgaeq, langhlangh loedloed, baenz benq baenz ndoeng. Hojsik ha, dou mbouj ndaej raen valeiz angj “lumj doek siet doet nae”. Cij mumjmumj gyumqgyumq yawjraen saek di vahau lw seb youq ndaw mbaw heusum haenx. Ngoenzbonz gou lij daegdaengq hwnj vangj bae cazyawj gij saenqsik Luegvaleiz, gij beix- nuengx gwnz vangj cungj daezsingj gou naeuz, mwh ndawgyang ndwen 2 bae Luegvaleiz, gingjsaek ceiq ndeiyawj, danghnaeuz seizhaenx ndaej bae, haengjdingh ndaej raen daengz gij gingjsaek “doek nae hung” hausaksak haenx lo. Seizneix valeiz loenq yaek liux lo, dingzlai goleiz cungj dawzaen iqetet lo.

Byaij youq lajgoek goleizgaeq, yawjyawj gij makleizgaeq ngamq maj baenz gyaeujdawh nyaenx hung haenx, gou couh ngeix dauq doenghbaez mwh lij iq youq ndaw haw dou doegsaw haenx, ciengzseiz ndaej raen gij vunz gangj Hek haenx geij boux geij boux guhdoih naengh danci doz baenz laep baenz laep makleizgaeq soemj daeuj haw dou gai, sawj dou myaiz yaek rih bae. Gij makleizgaeq de miz di saep、miz di soemj、youh miz di van, ndei gwn raixcaix, gwn bae rox sek dungx. Seizhaenx gij gwn gig noix, danghnaeuz ndaej dawz di haiz vaih、diet rwix bae vuenh ndaej saek di makleizgaeq soemj daeuj gwn guh- caemz, couhdwg gij saeh ceiq sim- angq lo. Lij geiq ndaej gij vunz gangj Hek haenx naeuz gyoengqde dwg daj Banjcwngz daeuj. Seizneix dauqngeix hwnjdaeuj, laxlawz gij makleizgaeq soemj doenghbaez lox dou hozgyaez haenx dwg daj aen Luegvaleiz neix okdaeuj ha!

Gou roxnyinh gij vunz Mbanj- yiuzduix gig gvai. Caen dahraix, Mbanjyiuzduix, coh mbanj eiqsei couh dwg coemh yiuz guh duix, ndaw diegmbanj geij giz dieg yiuzgaeuq haenx gaenq lwnh hawj raeuz rox lo, gij vunz ciuhgonq Mbanjyiuzduix ak bw, dinfwngz gvai, rox coemh yiuz guh duix. Youq doenghbi gij gwn lij gig noix haenx, gij vunz Mbanjyiuzduix couh gamj bae cauxmoq, roengzrengz ndaem makleizgaeq lai, caemhcaiq guh ndaej gij maksoemj ndei gwn dangqmaz haenx, sawj Mbanjyiuzduix ciuh doek ciuh baengh gij makleiz- gaeq neix ndaej vut gungz baenz fouq. Gij vunz Mbanjyiuzduix seizneix engqgya rox naemj, raen makleizgaeq ciemh bi ciemh mbouj daih dijcienz lo, couh roengzrengz baujhoh baenz benq goleizgaeq hwnjdaeuj, hwnj guh liengzdingz、hai goengloh, guh baenz aen dieg ndei lajmbanj swnghdai lijyouz. Yawj ha, aen vwnzva gvangjcangz de hwnj ndaej geijlai gyaqciq, gij nazmbaeklae byaekvayouz de guh ndaej geijlai gyaeu, Ndoifw、Diegdangz Dingjndoi、Ndoidiencingj dajcang ndaej geijlai lengj ha! Geij bi dinjdetdet, Luegvaleiz couh bienq- baenz giz dieg ndei guhcaemz mizmingz Ginhcouh Si. Ak ha, Mbanjyiuzduix baengh gij uk gvai gyoengq vunzmbanj, cingq ciemh ngoenz ciemh ndaej youq ndei gwn van!

“Yaek yawj va mbouj raen, ndaej gaen doih bouxak, ndaej riengz lauxsae hag, gag roxnyinh ndei lai.” Baezneix daeuj cunzcet Luegvaleiz mbouj ndaej raen daengz gij “gingjsaek doeknae” valeiz, hoeng gou cix mbouj roxnyinh doeknaiq saek di, aenvih miz gyoengq boux ak vwnzlenz ndaw cin caemh bae, ndaej dox gangjgoj dox gyaulouz, rox ndaej haujlai doenghyiengh moq. Gyang- haemh hwnj vangj, gou youq benqdieg QQ gou fatbiuj le hot fwen ndeu：

Cunzcet Luegvaleiz,

Lauq gvaq seiz va angj；

Caeklaiq caemhdoih angq,

Ndaej gangjgangj riuriu.