Goengheij coenz daih’it,

Daihgit youh daihleih,

Goengheij raeuz gak veih,

Bineix fat daihcaiz.

Goengheij coenz daihngeih,

Hoh gak veih gengangh,

Bouxlaux ndang doq cangq,

Lwglan mangx lumj guk.

Goengheij coenz daihsam,

Lwglan yamq ndaej hung,

Hagsib coh naj cung,

Dungxcaiz laeg lumj lueg.

Goengheij coenz daihseiq,

Diendeih hai valienz,

Raeuz bouxboux miz cienz,

Beij saenzsien fouqmiz.

Goengheij coenz daihhaj,

Lwgmbwk lumj va hai,

Bouxsai gaenx lumj vaiz,

Caezgya maij dangqmaz.

Goengheij coenz daihroek,

Bawx boeksaed hauqswh,

Lwggwiz gyaez daiqda,

Bak riu daengx mbouj roengz.

Goengheij coenz daihcaet,

Caizheiq yaek daeuj daengz,

Caizsaenz ndaw ranz naengh,

Baengzyoux daeuj doxbang.

Goengheij coenz daihbet,

Ce ndaej ngaenz gvaq cieng,

Fwen goengheij cingq ciengq,

Ciengx mou bit daeuj gaj.

Goengheij coenz daihgouj,

Bineix soucingz ndei,

Gwn gijmaz cungj feih,

Beij gwn dangz lij diemz.

Goengheij coenz daihcib,

Vunzhuk hix bienq gvai,

Bouxhoj ndaej fatcaiz,

Daih beij daih engq fouq.