Miz ngoenz ndeu, Daeggvai bae gwnz haw cawx huq. De daeuj daengz baihnaj aen dan gai nohmou he, raen boux dajgai dwg dah sau ndeu, de couh riu dwk cam:“Mwngz ndei, gaen nohmou ndeu gai geijlai ngaenz?” Dah sau haenx cim de mbat he, riu dwk dap naeuz:“Gaen he bak maenz ngaenz.” Daeggvai riuhaha youh cam:“Dahsau a, baez neix gou dwg caensim dwk cam mwngz, gaen nohmou ndeu aeu geijlai ngaenz?” Dah sau neix gangj:“15 maenz.” Daeggvai naeuz:“12 maenz baenz lo.” Dah sau neix naeuz:“Hix baenz, mwngz aeu noh gyawz, aeu geijlai gaen?”

“Gou mbouj cawx nohmou,” Daeggvai naeuz, “Mbouj aeu cing, mbouj aeu biz, mbouj cawx dungxsaej caeuq ndokngviz, hix mbouj aeu gyaeujmou roxnaeuz lauzfaiq.”

Dah sau haenx siengj yaep he, couh naeuz:“O, gou rox lo.” Dahsau couh gig lingzvued dwk gip gaiq lwed mou cuengq ndaw swx Daeggvai bae.

“Gou yaek hawj mwngz geijlai ngaenz?” Daeggvai cam dahsau.

Dahsau han ndaej sing seuqsak:“1+1+2+2+3+3+4+4+5+5+6+6+7+7+8+8+9+9+10, mwngz suenq ndaej geijlai, couhdwg geijlai faen lo.”

Daeggvai ngeix yaep he, couh hawj maenz ngaenz ndeu hawj dahsau, riuj aen swx hwnjdaeuj naeuz:“Docih mwngz, mwngz ndei gai!” Dahsau doq naeuz:“Mbouj dwg gou ndei gai, dwg nohmou gou ndei gai. Muengh mwngz doeklaeng caiq daeuj caeuq gou cawx.”

Gyoengqvunz youq henz raen song boux bouxcoz neix yienghneix gaicawx, cim ndaej da cungj mbouj laep. Miz boux vunz he sing sang haenh naeuz:“Song boux bouxcoz neix caen dwg coengmingz, cawx doxgaiq hix baenzneix yinxdaeuz!” Gangj sat, couh miz geij boux vunz bae caeuq dah sau haenx cawx nohmou lo.

（Hoz Cunghliuj soucomz cingjleix）