□ Moz Gwzli / 莫克利

Mboengqneix yawj bien faenz- cieng Veiz Funglanz sij 《Gangj Vwnzva Sibgvenq Ngoenzciet Boux- cuengh》, gangjlwnh vwnzva Boux- cuengh, ndawde lwnh daengz ngoenzciet Bouxcuengh. Cingqcaen, ngoenzciet Bouxcuengh cien lai fanh lai, ndwenndwen miz ciet, mbanj- mbanj miz ciet. Lumj ndwenlab soengqcauq, ndwencieng gvaqndaep, ngeih nyied co’ngeih、 sam nyied cosam、 seiq nyied cobet、ngux nyied co’ngux、 loeg nyied coloeg…… Youq rangh dieg Vujmingz, cib nyied doxbae lij miz cietmbanj, gak mbanj gvaq ciet gag mbouj doengz ngoenz. Cawz cietmbanj, cib nyied lij miz gij cietwnq dem.

Geiq ndaej cib bi gaxgonq, gou caeuq song boux baengzyoux doxcaez bae hag haici. Aenvih bingzciengz yaek hwnjdangz, mbouj miz seizgan ndaej ngoenzngoenz bae lienh. Miz ngoenz ndeu, dou sam boux caeuq saefouh doxiek, naeuz banringzgvaq yaek bae lienh haici hwnj daihloh. Saefouh haidaeuz doidoidakdak, doeklaeng saedcaih euq mbouj ndaej, couh dapwngq lo.

Baez bae daengz ciengzlienhci, cij gag dou sam boux, mbouj raen gij yozyenz wnq caeuq dou doengzdoih bauqmingz haenx daeuj lienh. Goeng saefouh naj saepsaeng ndaemndet, mbouj lumj bingzciengz nei miz gangj miz riu. Raen dou daeujdaengz, heuh dou hwnj ci vaiqdi. Dou sam boux hwnj ci naengh caengz onj, de couh fwt caij youzmwnz hai ci cung okbae. Daengz gwnz loh, hawj dou youq gwnz loh lienh vangraeh, de naengh ndaw ci mbouj gangj saek coenz vah, lienh baenz mbouj baenz hix mbouj guhsing. Ngoenzhaenx aenvih vunz noix, ndaej lienh seizgan nanz, dou sam boux hai ci hwnj daihloh raezrang, mbouj caiq miz vunz caeuq dou doxciengj, yinx dangqmaz.

Ma daengz ndaw ciengzlienhci, gaenq seiq diemj lai cung. Dou sam boux youh mboen naeuz lij caeux, mbwn caengz laep, lij siengj youq ndaw ciengz gag lienh doenqci haeujcang daengj hanghmoeg. Goeng saefouh seizneix song fwngz oet daehvaq, byaij bae byaij dauq geij doeb le, couh veq naj nyaenjndaeng mbwnjbak gangj vahseg, cug coenz cug cih dwk naeuz: “Yu—— sou sam dah neix cungj mbouj gwn hoenzfeiz ndawbiengz ha?”

Dou sam boux mwngz yawj gou, gou yawj mwngz, da’ndaem doiq da- ndaem, doxngonz myoegmyoeg, mbouj rox gij vah saefouh gangj dwg maz eiqsei. Dah mbei haemq laux couh riuhehe dwk cam:“Saefouh ha, mwngz siengj gangj gijmaz ne?”

Goeng saefouh saedcaih nyaenx mbouj ndaej lo, couh byaengqda haucan, sing gok lumj byajraez nei fokdengdeng maenj naeuz: “Ngoenzneix dwg cibcingz！ Sou rox mbouj rox?”

“Ha? O, o……” Dou sam boux mbouj rox cibcingz dwg gijmaz, miz maz geih lai. Hoeng dingq saefouh baenzneix fok, dou couh fwt singj gvaqdaeuj, gvaiq mbouj ndaej ngoenzneix lajbyonghngoenz mbouj- miz saek boux vunz Vujmingz daeuj lienh ci! Laxlawz ngoenzneix dwg ngoenzciet, dou sai seizgan saefouh lo. Cij geiq ndaej ngoenzhaenx dou najhoengz dangqmaz, vaiqvit sousib doxgaiq couh ma hagdangz lo.

Dou sam boux, dah ndeu vunz Denzdungh, dah ndeu vunz Bahmaj, dah ndeu vunz Sanglinz, dayoz bizyez youh daeujdaengz hagdangz son saw, cungj dwg daj hagdangz daengz hagdangz, cibcingz dwg ciet gijmaz ne?

Gvaqlaeng cam vunz Vujmingz, cij rox cibcingz couhdwg cib nyied cocib, vunz Bouxcuengh Vujmingz aeu gvaqciet. Aen ciet neix dwg naeuz seizcou sou haeux sat, ndaej haeuxmoq ma ranz, bi daengz haemh ndaej soucingz, haeuxnaz ndaej fungsou, couh caezgya angqhoh, caemhcaiq maqmuengh bilaeng doenghduz engq hwngvuengh, haeux- naz engq demsou.

Ngoenz cibcingz, gyoengqvunz yaek gaj bit gaj gaeq, guh ceiz, dwk bya ma guh byaseng, daj laj- byonghngoenz couh loengh gwn. Gyoengqvunz gwnz haw, doenghboux dajgai haenx gai huq liux roxnaeuz mbouj liux, cungj caeuxcaeux gvendou sousib doxgaiq ma ranz gvaqciet. Banhaemh, yaek aeu sam seng laeuj haeux caeuq lwgmak daengj, dwkcuengq cojcoeng gonq, cojcoeng gwn sat le, gyoengqvunz cij ndaej nda daiz gwn caeuz gwn laeuj……

Hai, ngoenzciet Bouxcuengh cingqcaen lai, gak dieg ngoenzciet miz doxdoengz hix miz mbouj doengz, ciet hung ciet iq cungj dajloengh, geq cungj geq mbouj liux. Hix rox cibcingz dwg ngoenzciet, hoeng miz maz ciengzgangj lij caengz rox ne.