Byaij haeuj Cuzsanh Cunh, couh lumj ndonj haeuj le fuk veh raemxmaeg gyaeundei sengcingz ndeu nei, goengqbya heuswd daengjdwt, raemxdah sawrwnx laeret, yawj lumj aenmbanj ranghraemx miz giuziq raemxlae baihnamz guek raeuz nei; doengh dem doengh ranzlaeuz moqsag ndeiyawj, mbangj ing bya hwnjguh, mbangj ndwndaengj henz dah, siengnyemh youq ndaw gyang faex heu raemx saw, gyaeundei raixcaix.

Cuzsanh Cunh dieg youq baihnamz Lenzvah Cin Gunghcwngz Yauzcuz Swciyen, liz yienhsingz 15 goengleix gyae, miz Cuzsanhgyoz、Hungzyenz、Sinhgyauzdouz、Nanz- sanhgyauz seiq aen mbanj, gungh 409 ranz 1625 vunz, ndawde Yauzcuz 865 vunz. Bi 2001 gvaqdaeuj, aen cunh neix aeu Mbanjmoq Hungzyenz guh diuzsug hwngfat youqndwi nungzyez caeuq lajmbanj lijyouz, ndaetndi giethab nungzyez gezgou diuzcwngj caeuq swnghdai lijyouz, ingbaengh gij gingj gyaeu fanh moux suenmak lwgndae hwng guh “nungzgyahloz”, daezswng gij dangjsw aenmbanj youqndwi, hawj nungzminz miz hong guh ndaej demsou. Mbanjhungzyenz cix gonqlaeng aeundaej le “daengx guek nungzyez lijyouz diemjguh- yiengh”“daengx guek cib daih aenmbanj minghhoengh”“daengx gih swnghdai fouq minz mbanjguhyiengh”“cib ndei swnghdai fouq minz mbanjciuqei”“mbawcoh aenmbanj Cungguek”“mbanj lijyouz swnghdai Guengjsae”“Guengjsae cib daih aenmbanj minghhoengh” doenghgij mingzdaeuz ndei neix, baenz le baih- baek gih raeuz naedcaw ronghlwenq swnghdai youqndwi lijyouz ndeu. Gyawj geij bi neix daeuj, moix bi miz mauhgvaq 20 fanh vunzbaez hekyouz bae ndaw mbanj youzcet, youqndwi nungzyez daihhek souhaeuj 2600 fanh maenz, cunh cizdij souhaeuj 16 fanh maenz, vunzmbanj moix vunz bingzyaenz cinghsouhaeuj mauhgvaq 7000 maenz.

Cib lai bi neix daeuj, Cuzsanh Cunh ciuq cingzgvang saedcaeq ndaw mbanj bae guh, aeu hwnjguh Mbanjmoq Hungzyenz guh cungsim, guh ndei Nanzsanhgyauz、Sinhgyauz- douz、Cuzsanhgyoz gij mbanj neix hong canglengj daenj buh daep mauh. Ndawde Mbanjmoq Hungzyenz daj bi 2003 gvaqdaeuj, gonqlaeng hwnjguh baenz 80 aen ranzlaeuz lajmbanj, cingjcoih diuzroen haeuj mbanj, bu ndei roen yawj gingj, guhbaenz giuzndojfwn miz daegsaek Yauzcuz caeuq aenfai raemxroenx、aendiengz yawj gingj、cawjhoihciengz cietmak- ndae、ciengzdingzci doenghgij lijyouz sezsih neix, lij guh le aen camh- cawqceq raemxuq raemxmok ndeu; daengx mbanj vunzvunz guh hong lijyouz, ranzranz guh hong dakdaih hekyouz, miz 200 lai vunzmbanj cigciep guh monz hong lijyouz, daengx mbanj miz baenz 600 lai aen congz biucinj ndaej hawj hekyouz ietnaiq.

Seizneix, Cuzsanh Cunh daengx bi seiqgeiq lwgmak homfwt byaek- gve ranghrwd, daegsaek “lwgndae”“fungcingz Yauzcuz” yienhda, moix daengz seizcou fanh moux makndae gogo dawzmak nuengjrumx henjrwg vandiemz, byai cou haeuj doeng seiz, mbawgo’ndae henjroz doek gwnz namh, baenz benq henjgim roemx haeuj lwgda, engq hawj vunz roxnyinh mizyinx. Youq ndaw mbanj, mwngz ndaej bae henz dah ep bya, bae ndaw reihnaz ndaemndai, bae ndaw suenmak mbaet mak, roengz dah bae youzraemx gaeb bya, bae gwnz ndoi yawj gingj, bae laj gofaex doiq fwen, caemh ndaej bae ranz vunzmbanj gag dajcawj loenghbyaek, cimz gij byaekfeih lajmbanj, youqndwi cwxcaih, miz cingz miz eiq, sim soeng sim sangj, mizyinx raixcaix.