Naeuz bouxmbwk bouxsai,

Wnggai aeu roxndeq,

Ndiep bouxboh bouxmeh,

Aeu roxndeq cij baenz.

Ndiep bouxboh bouxmeh,

Roxndeq guh couh deng,

Bouxboux bohmeh seng,

Guh mbouj deng doxyaeng.

Meh raeuz mbouj yungzheih,

Seng raeuz gungqanq raeuz,

Gijmaz cungj mbouj naeuz,

Ndiep meh raeuz ciengxlwenx.

Seiz gyoengqde gaeuzhwet,

Mbouj ndaej bwed gyoengqde,

Hungmbwk dwg bohmeh,

Maz doq ce hawj raeuz.

Bohmeh seng ndang raeuz,

Youh aeu haeux daeuj bwnq,

Daengz bohmeh bienq mwnh,

Miz gwn ciengx gyoengqde.

Daengx bouxmbwk bouxsai,

Maij bouxmeh bouxboh,

Danghnaeuz miz gaiq noh,

Hawj bohmeh gwn gonq.

Gyoengqde ciengx raeuz hung,

Dungx iek hawj huq gwn,

Lumj daengngoenz youq mbwn,

Gyanghwnz hix raeujrub.

Miz raemx cij miz bya,

Miz naz cij miz haeux,

Miz meh cij miz raeuz,

Yaek aeu ndiep bohmeh.