3 nyied 19 hauh banhaet, Sang- linz Yen gaiq daihcib “cietsouhlaux” gaihmusiz youq aen yienh neix Bwzhih Cin Aicangz Cunh dieggaeuq Cicwngz banh. Fanh boux doxhwnj hekyouz caeuq dangdieg vunzlai daj gak dieg daeuj haenx doxcomz youq baihnaj Miuhgoengsouhlaux, yienh- ciengz roxyiuj goengsouhlaux caeqbaiq dadenj、 gyaqvasang cunz- byaij、 diemjbing lienhbing、 doiq- fwen daengj minzsuz baijyienj ndei yawj, lij camgya le gwn aemj- souhlaux、 gai gijgwn ndei、 giceh baijgai daengj hozdung. Gaiq ciet souh laux vansou neix gyalai le haujlai vwnzdij guh’angq hanghmoeg fungfouq mizyinx dem.

Cietsouhlaux dwg aen ciet ndawbiengz conzdungj he, vih geiq- niemh Cwngzcouh swsij Veiz Gez, aen yienh neix beixnuengx Boux- cuengh gagfat youq ngoenzseng (liggaeuq ndwenngeih cib’it) de banh cietsouhlaux, aeu geiqniemh gij cingsaenz goengsouhlaux guhndei cauxfuk beksingq、 simdingh lienh ndang bonjfaenh、 cangqheiq mingh- raez. De dwg Vuengzcuengh ceiq hungmbwk Ciuhdangz. Vuj Cwzdenh gaemgienz seizgeiz, de guenj ceiqleix Cwngzcouh(Vujmingz、 Yunghningz、 Binhyangz、 Laizbinh daengj dieg), de ciuhvunz ceih yak haenh ndei, cauxfuk beksingq, ndaej daengz Cwngzcouh beksingq haengjgyaez. Bi 2006 dieggaeuq Cicwngz ndaej laebbaenz daengx guek cungdenj vwnzvuz baujhoh danhvei, bi 2012 cietsouhlaux ndaej lied haeuj swcigih gaep feihvuzciz vwnzva yizcanj mingzloeg.

Caeqbaiq dadenj gouz youq- ndei. Caeqbaiq dadenj yiemzrwd caemrwd, henz daizcaeqbaiq hoenz- yieng mbinfwdfwd, gak vunz gingq- baiq ndangdaenj caezcingj. Youq Bouxcuengh canghswhyiz caeqbaiq doeg liux cukfaenz doeklaeng, vunz gingqbaiq riengzdwk canghswhyiz caeqbaiq sonyinx, daihgya itheij mienh doiq ranzdienh goengsouhlaux gingqbaiq, doengzcaez muengh bibi rumz swnh fwn yinz、 ranzranz vuen- yungz youqndei、 saedceij ngoenz beij ngoenz ndei.

Caeqbaiq yizsi guhsat, gij minz- suz baijyienj engqgya ndei yawj. Daihhingz fouxhaiciengz 《Biengz- hoengh Lungz Bonghmbin》、nyingz naqgung biujyienj、 diuqfoux 《Dahnuengx Hoenx Yahvaiz》、 gagciengq 《Sanglinz Lumj Man》 daengj gak cungj cezmuz ndei yawj laebdaeb hwnjdaiz yienjok, yienh- ciengz bouxyawj cungj bekfwngz haenhndei, bouxboux yawj dwk da cungj mbouj yaep.

“Cietsouhlaux” laebdaeb banh cib bi daeuj, Bwzhih Cin Dangjveij、 Cwngfuj doenggvaq banh ndei aen ciet neix, caenh’itbouh senhconz gaisau le Bwzhih Cin minzcuz vwnzva、 lijyouz swhyenz、 canjnieb gijndei daengj, gij mingzdaeuz binjbaiz caeuq yingjyangjliz daez- sang yienhda, doengzseiz hix yinx ndaej yied daeuj yied lai lauxhangz mizmingz caeuq bouxguhseng’eiq, daiqdoengh le ranghdieg ginghci hwngfat caeuq hwnjguh, vih doidoengh lajmbanj lijyouz hwngfat, gyavaiq baenzfouq vutgungz gyahaeuj rengzhoengh moq.