Aen mbanj iq neix youq ndaw bya, daengx mbanj miz cib lai ranz. Youq aen sigij gonq 90 nienzdaih, vunz mbanj neix gig maezsaenq.

Miz ngoenz ndeu, ndaw mbanj miz boux coz he hwnj bya bae aeu fwnz, bya sang hoeng loh gaeb, de mbouj siujsim caij deng ndaek rin soeng he, couh daj gwnz bya sang ringx roengzdaeuj, gyaeuj daemj daengz ndaek rin hung bae, gaemz heiq cungj mbouj miz lo.

Vunz daengx mbanj doeksaet caez, aenvih youq ndaw mbanj, mbouj daengz 36 bi couh dai mbouj gitleih, gij hoenz boux dai mbouj ndaej haeuj yaemgan, caemhcaiq lij dauqma ndaw mbanj loengh bae loengh dauq. Caezgya doxyaeng couh cingj boux guhmo daeuj nam ging, hai fap le couh ram boux dai haenx daengz lueg bya gyae bae moek lo.

Banhaemh, ndaw mbanj gyoengq- vunz dauq daengz ranz, gvendou ndaep daeng hwnj congz, beij gaxgonq ninz ndaej caeux. Daengx mbanj caemrwgrwg, cij dingqnyi gij sing duznengz swenj.

Sawqmwh, daj giz gyae cienz daeuj gij sing lumj boux vunz he daej. Aen sing haenx seiz miz seiz daengx, daj gyae daengz gyawj, gij singyaem dingq ndaej gig dungxliengz. Gyoengq- vunz dingqnyi doq nyinhnaeuz dwg gij hoenz bouxcoz dai haenx dauqma ndaw mbanj lo, bwn ndang daengj caez, bouxboux saenzgywggywg, ganj- gip ndoj daengz laj congz bae, saek di heiq hix mbouj gamj hawj okdaeuj. Seizneix, ndaw mbanj geij duz ma hix swenj hwnjdaeuj .

Ngoenz daihngeih mbwn ngamq rongh, gyoengqvunz couh saemxsaemx saxsax dwk hai dou okdaeuj, daj seiqhenz comzgyoeb youq itheij, doxlwnh haemhlwenz dingqnyi gij sing lumj boux vunz he daej. Seizneix, miz boux ndeu buet gvaqdaeuj, swenj naeuz:“Haetneix gou hwnqdaeuj, fatyienh ndaw riengh gou duz cwz meh he bae gizlawz mbouj rox, mbouj raen lo. Sou bae henz riengh gou bang gou ra baez ndeu a!” Caezgya caemh bae daengz aen riengh de bae ra, yawjraen aen suj gij dou riengh cwz gaenq deng geuh vaih, youh yawjraen henz riengh cungj dwg gij rizdin vunz. Gyoengq- vunz cungjsuenq rox gij singyaem haemhlwenz dwg maz lo.Yenzlaiz dwg duz cwz meh haenx ninz laep liux, deng vunzseng rag ok riengh, yienghneix duz cwz meh neix couh swenj hwnjdaeuj, muengh miz vunz dingqnyi daeuj gaemh bouxcaeg neix. Caen dwg swhgeij hwk swhgeij, haemh ndeu cungj mbouj ndaej ninz.

Daj seizhaenx hwnj, aen mbanj neix cungj mbouj dingqnyi gij sing lumj boux vunz he daej lo, caiq hix mbouj saenq gaxgonq naeuz dangh- naeuz bouxvunz mbouj daengz 36 bi dai, gij hoenz de couh mbouj ndaej haeuj yaemgan, cungj dwg youq ndaw mbanj guhyak lo.