Daegco caeuq Daegsi dwg lauxbiuj, geij bi mbouj raennaj lo. Miz ngoenz he, song boux de sawqmwh youq gwnz haw doxraen, couh bae aen diemqlaeuj ndeu doxgangj hwnjdaeuj. Daegco naeuz:“Gobiuj aeu gouq gou a, seizneix gou boihseiz lai bw.” Daegsi cam:“Vihmaz? Mwngz fatseng gijmaz saehcingz?”

Daegco dap:“Mwngz dingq gou gangj gonq. Laj byavaiz miz gaiq dieg bingz he, henz haenx miz aen mboq ndeu, seizhah gig ndei dajcaemx. Youh miz geij go faex hung, gwnz haenx gang geij gaiq baengzyouz, baihlaj miz daiz dwk mazcoz roxnaeuz dwkbej……Liz aen mboq 300 mij couhdwg Mbanjlaj.

Canghgyah youq gizhaenx guhdoj haemq nanz lo, gingjcaz bae gaemh doj geij mbat cungj doekhoengq, cijndei coemh cuengx baengzyouz bae. Hoeng, doeklaeng gyoengqde ciuqyiengh dap cuengx hwnjdaeuj laebdaeb guhdoj. Gyoengq boux guhdoj ciengzseiz doj daengz mbouj miz saek faen ngaenz bae, mbouj miz ngaenz youh siengj laebdaeb guhdoj, cijmiz bae guhcaeg lo. Ndigah, huq Mbanjlaj ciengz deng vunz caeg.

Miz di hai ciiq daeuj gizhaenx guhdoj, miz di gwih mohdozceh daeuj. Couhlienz mizmbangj vunz Mbanjlaj gwed fag gvak he daj ndaw naz dauq hix cigsoh daengz gizhaenx bae doj yaep he, nguh hong youh bae ngaenz, ndigah miz coenz vahsug gangj:‘10 boux vunz guhdoj, 9 boux vunz hojndoq’.

Bouxguhdoj baez daengz, canghgyah gizhaenx couh hawj boux vunz ndeu bau ien Hungzdazsanh he. Daengz banhaemh, lij cingj boux vunz saw ngaenz lai gwn caeuz, caiq hawj di ngaenz bae dap ci ma ranz dem. Canghgyah lij baij vunz souj youq bakroen, ngoenz ndeu hawj 100 maenz ngaenz. Baez raen ci gingjcaz roxnaeuz gyoengq vunzseng gvaqdaeuj, bouxsouj couh daj soujgih lwnh hawj canghgyah dingq. Ndigah, gingjcaz bae cungj gaemh mbouj ndaej saek boux vunz guhdoj. Danghnaeuz deng gingjcaz gaemh bae, gyaeng geijlai ngoenz, boux vunz ndeu ngoenz he ndaej 50 maenz ngaenz, cuengq dauqdaeuj couh ndaej bae caeuq canghgyah aeu ngaenz. Ndigah, miz haujlai vunz bae gizhaenx guhdoj.

Gou geij ndwen neix hix bae gizhaenx guhdoj, gaenq deng canghgyah yaeuh bae geij fanh maenz ngaenz lo. Saek ngoenz, canghgyah dawz ngaenz bae yinzhangz cunz, raeuz cangndang hawj de nyinh mbouj ok dwg byawz couh bae ciengj ngaenz dauqdaeuj?”

Daegsi naeuz:“Gou mbouj guh. Deng gaemh engq boihseiz bw. Mboujnex yienghneix, haetcog dwg cingmingz gou couh mbouj bae baiq goeng lo, hawj go gou bae, gou caeuq mwngz bae yawjyawj gyoengqde baenzlawz yaeuh ngaenz vunz bae.” Daegco gig angq.

Ngoenzlaeng, Daegco heuh geijcib boux baengzyoux, caeuq Daegsi itheij bae guhdoj. Canghgyah mbouj roxnaj Daegsi, raen dwg Daegco daiqdaeuj, couh vix Daegsi cam Daegco:“De dwg byawz?” Daegco naeuz: “De dwg lauxbiuj gou, heuh guh Daegsi, ok rog bae dajgoeng dauqma ranz noix, mwngz mbouj raen de gvaq.” Geijcib boux vunz riengz daeuj guhdoj hix cingqmingz. Canghgyah yawj naj Daegco caeuq Daegsi miz di doxdoengz, de cij hawj Daegsi haeujbae guhdoj. Daegsi、Daegco caeuq geijcib boux baengzyoux de youq giz guhdoj doj ndaej da hoengz caez. Songde geij mbat hingz ndaej 2 fanh maenz ngaenz gonq, doeklaeng youh saw okbae caez.

Banhaet, doekfwn lo, miz geij boux saimbwk gwed fag gvak dawz geiswx daeuj daengz laj baengzyouz ndoj fwn. Boux gwed fag gvak haenx baez raen Daegsi couh ndaq:“Nuengx ha, ngoenzneix dwg cingmingz, mwngz mbouj bae baiq goeng cix daeuj gizneix guhdoj, mwngz caen dwg ra dai a.” Ndawsim Daegsi gig lau, mbouj gamj gangj vah. Daegco ndoj daengz giz vunz lai bae, mbouj hawj boux gwed fag gvak haenx yawjraen naj de. Canghgyah raen Daegco bae ndoj, youh raen yiengh boux gwed fag gvak haenx caeuq Daegsi engq doxdoengz, rox de itdingh dwg go Daegsi, couh siengj rag de daeuj guhdoj. Canghgyah doq dawz bau ien he bae hawj boux gwed fag gvak haenx doq naeuz:“Go Daegsi, haeujdaeuj naengh yaep ndeu gonq, baiq goeng dauq itdingh fatcaiz!” Go Daegsi naeuz:“Mbouj doj, caj fwn doek noix di dou lij aeu hwnj bya wnq bae baiq goeng.” Canghgyah nyengh rag go Daegsi haeujbae, hawj de naengh henz daizdoj. Daegsi couh vix boux vunz youq henz daiz lwnh hawj go de rox dwg byawz, guhdoj haenq mbouj haenq. Caj Daegsi gangj sat, go de sikhaek ndwn hwnjdaeuj dawz fag cungqdinj he okdaeuj, naeuz:“Gaej doengh!”

Canghgyah caeuq gyoengq guhdoj baez dingq doeksaet caez, naj bienq heu liux. Miz bouxguhdoj he mbouj lau dai, doq yamq din yaek buet. Go Daegsi coh gwnz mbwn “byaz” dwk nyingz mbat cungq he, naeuz:“Ndwn ndei daeuj, mbouj cinj doengh! Byawz caiq doengh saek di gou couh nyingz byawz!” Gyoengq bouxguhdoj rox go Daegsi dwg gingjcaz, youh raen cij miz de boux vunz he, bouxboux cungj siengj baengh vunz lai couh swnhgei buetdeuz bae, seizhaenx ciengz guhdoj youh luenh hwnjdaeuj lo. Geij boux daeuj ndoj fwn haenx doengzseiz dawz cungqdinj okdaeuj coh gwnz faex nyingz geij mbat, boux he dawz gok ndeu humx ciengz guhdoj hwnjdaeuj. Miz haujlai bouxguhdoj lau ndaej nyouh yit dangzvaq, yousim swhgeij deng cungq nyingz, cijndei bouxboux caj gingjcaz daeuj coq gazfwngz. Yaep he, miz geij gyaq ci gingjcaz hai daeuj, yinh gyoengq bouxguhdoj baema gingjgiz lo.

Gyoengq bouxguhdoj mbatneix deng gaemh, miz di deng lauzgaij, miz di ngaiz fadcienz caemhcaiq gyaeng cibgeij ngoenz cij ndaej cuengq dauqdaeuj. Ndawde, Daegco ganciep bang gingjcaz gaemh bouxguhdoj, hix suenq dwg laebgoeng, ndigah gyaeng de geij ngoenz, gyauyuz de doeklaeng mbouj cinj caiq guhdoj couh hawj de dauqma ranz lo.

Byawz rox, Daegsi caeuq go de youq diegrog dang gingjcaz. Caeux couh gaen aen ciengz guhdoj neix lo. Bae gaemh geij mbat, gyoengqvunz dawz youq bakroen baez raen vunzseng couh daj soujgih bauq, Canghgyah doq anbaiz gyoengq bouxguhdoj buetdeuz. Yienghneix gingjcaz bae gaemh hix gaemh mbouj ndaej geijlai vunz. Daengz gyoengq gingjcaz baez lizhai, youh guhdoj hwnjdaeuj, mbouj miz geijlai yaugoj. Gyoengq gingjcaz mbouj rox baenzlawz guh seiz, cij rox lauxbiuj Daegsi geij ndwen neix hix bae gizhaenx guhdoj, ndigah couh siengj ok aen banhfap neix. Daegsi caeuq Daegco youq gwnz haw doxraen、go Daegsi bae baiq cingmingz gvaq gizhaenx cungj dwg gaxgonq giva gvaq. Yienghneix, aen ciengz guhdoj hung neix couh deng gingjcaz siubae lo. Gyoengqvunz Mbanjlaj rox le, angq dangqmaz, caiq hix mbouj yungh yousim gij huq deng bouxguhdoj caeg bae lo, doiq gingjcaz haenh mbouj dingz bak.