Daj daeg mbauqcoz ndeu 20 lai bi camgya gunghcoz, 30 geij bi yaepyet gvaqbae lo, vunz hix ciemh- ciemh bienq geq lo, gou miz swhgwz gangj cih “geq” ok bak lo. Seizneix duiyouh youq ranz, aensim hoengq- hanz fouzfangh.

Mboujguenj dwg doenghgo、doih- duz、bouxvunz caemh dwg yienghneix, cungj rox geq, caemhcaiq rox dai bae, neix dwg swhyenz gvilwd, byawz hix hamj mbouj ndaej gvaq aen “giemx” neix bae. Mwngz louzlienh hix ndaej, mbouj louzlienh hix bah, byawz hamj ndaej gvaqbae, gou couh fug de lo.

Bi’ndwen ngoenz riengz ngoenz bae, byoemgyaeuj hix hau liux lo, caen geq dahraix bw, aen’uk lainoix miz cungj naemjfap “mbawfaex loenq dauq goek” ndeu, cungj siengjniemh diegcoj、vunzranz、caencik、baengz- youx、beixnuengx, cungj siengj daengz seizde soengq hoenz dauqbae mbanj- ranz, an’onj haeuj namh. Gij seizndei gaenq gvaqbae haenx, gaenq byaij gvaq mbouj rox geijlai ndwenngoenz; gij seizndei gaenq gvaqbae haenx, cungj yaenq miz rizdin sengmaj gou laegmbub. Seizgan lumj raemx, hix lumj rumz, couh baenzneix dingh- dingh riuz bae, mbouj ae mbouj wt dwk nyoengx ndwenngoenz gvaqbae, ngoenz doek ngoenz, bi doek bi, baenzneix mbouj dingz mbouj duenh lae bae. Diuz roen lawz ndaej byaij gvaq, gienh saeh lawz ndaej nyangz- raen, bouxvunz lawq gvaq le, cijndei ancuengq youq ndaw seizndei gaenq let gvaqbae haenx, lumjnaeuz caeuq seizneix dan gek duenh ndwenngoenz ndeu ityiengh. Veq gyaeuj dauqngeix, gij geiqsingq dangco lij ciuqyiengh baenzneix sengmaj dwk.

Cingj dingq gou daeuj lwnhgangj citgoj mwh lij iq. Gizdieg doekseng gou, sam mienh dwg bya, miz diuz ngeihgaep goengloh he con gvaq gyangmbanj, diuz goengloh neix youq mwh caengz gaijfang couh miz lo. Gyangmbanj miz aen mboqraemx he, daengx mbanj vunz cawzhai mehmbwk haq ok rog bae, couhdwg gwn gij raemxmboq neix majhung, bienq geq, dai bae. Liuxle, vunz yienznaeuz bae lo, raemxmboq lij ciuqyiengh hwnz- ngoenz mbwnj okdaeuj sawliklik, gunghawj vunzmbanj bae cawj ngaiz gwn ciengx mingh. Seizcou caeuq seizdoeng, bakmboq cungj miz benq raemxfwi ndeu hoemq dwk, mok- saengsaeng, haungatngat.

Swnghhoz youq ndaw mbanj, gamjdaengz aensim cwxcaih dangq- maz. Hoeng, riengzdwk ndwenngoenz doxbae, vunz bungz daengz saehcingz lai le cij ndiusingj, gij ndwenngoenz de geijlai hawj vunz louzlienh ha.

Aen mbanj mbouj hung mbouj iq, gofaex byongh bya byongh ndoi, caeux couh deng vunz raemj bae coemh feiz ndoqndat lo. Doeklaeng bienqbaenz baenz dab baenz dab nazmbaeklae. Dingj bya dingj ndoi lij heuswd, dingzlai dwg ndaem gofaex coengz- riengmax, gij faex coengzriengmax neix couhdwg gij guding swhcanj ndaw mbanj, hix couhdwg gij swhginh laizyenz ndaw mbanj. Vunz ndaw mbanj ciuh dam daih baengh di reihnaz neix ciengx mingh. Aenvih namh reihbya deng raemxfwn dongj bae lai, doenghgo maj mbouj ndei, sou ndaej di haeux ngamq gaeuq vunz gwn. Ranz haeux loq lai di, couh ciengx saek song duz mou geij duz bitgaeq, bitgaeq okgyaeq dawz bae gai aeu ngaenz, gai ndaej ngaenz youh dawz daeuj cawx haeux cawx lauz. Ciengx song duz mou daengz byaibi, duz ndeu gai hawj guekgya duz ndeu louz gag gaj gvaq cieng. Duz gag gaj gvaq cieng haenx, lij gai bae mbiengj ndeu, gvaq cieng gwn di ndeu, louz saek geij gaen guh nohlab, daengz seiz nyaengq ndaemndai, goq saek geij vunz daeuj banggoeng cij ndaej gwn. Binaengz ndwenlab cibngux gvaq le, ranzranz hohhoh couh laebdaeb gaj mou lo, mwh gaj mou, cungj dingq ndaej nyi duzmou yaek gatcaw rongx ok gij sing dwglau haenx. Mid baez haeuj hoz duzmou, lwed bonghsasa, duzmou cukcak hemqswenj hwk dwk lwgnyez foenfoen goemq naj ndoj deuz, mbouj gamj youq henz ngonz- yawj.

Ndaw mbanj son vunz hag laex fuengfap daegbied lai, gou lij iq couh deng gij laex neix hanhhaed lai lo. Vunz baihrog haeuj dou, mwngz baenzlawz dongx baenzlawz heuh vunz naengh, couh lienz baenzlawz naengh daengq gwn haeux baenzlawz nip byaek cungj miz gvidingh liux caez. Geiqndaej gou ngamq ndaej haj roek bi seiz, aenvih youq dangnaj vunzrog gwn haeux daiq vaiq, mug rih raengraeng, deng daxboh fok ndaq can ndeu, aenvih gienh saeh neix, daxboh caeuq daxmeh doxceng dwk naj nding rwz ndat. Daxmeh naeuz:“Lwgnyez lij iq caengz roxsoq, caiq gangj, lwgnyez gwn haeux seiz mwngz baenzneix ndaq de, de daej dwk gwn haeux, ngoenzlaeng ndang rox miz bingh bw.” Daxboh fanj buek naeuz:“Lij iq mbouj guenj ndei, majhung le mwngz lij guenj ndaej de? Lumj go makdauz bakdou, de caengz gutgoz seiz, swnh lij iq lij ndaej beng soh de, caj de goz le naengz beng ndaej soh lwi?” Daxmeh mbouj caiq caeuq daxboh euq, cijdan lox gou gaej daej lo. Gou menhmenh majhung, bingzseiz mbouj daih hensouj gvigawj, daxboh hix mbouj caiq gangjmanz lo. Seizdaih cingq cinbu, bouxlaux gvanhnen hix gaenriengz gaijbienq, mbangj swh- siengj gaeuq hix gaenriengz seizdaih bienqvaq haujlai lo.

Seizneix moix baez dauqbae mbanjranz, gij ranzhaz ranzvax hoembangh gaenq deng ranzlaeuz daiqlawh lo, moix ranz song sam caengz, caepcoih ndaej lengjlup ndeingonz. Go maklaehcei laengranz, caeux deng vunz raemjrak bae coemh feiz, gizde fwzrwg nywjhaz sang, gij hojndoq ndwenngoenz gaxgonq gaenq mbouj raen ngumhngaeuz, cijnaengz dangguh goj bae lwnh hawj daihlaeng nyi lo.

Seizneix ndaw mbanj fwz lai lo. Nyuenz gij reihbaiz ndaem haeux- yangz megmax haenx, aenvih namh sied bae youqgaenj, gaenq doiq geng vanz ndoeng, reihnaz noix lo, vunz ndaw mbanj hix yied daeuj yied noix lo, saunomj mbauqcoz cungj bae ndawsingz dajgoeng lo, cij lamqlw mbangj bouxlaux binghnyieg hen ranz. Gij vunzlaux vunznyieg neix, yungh aenndang reuqrat hwetgoz de daeuj hen di reihnaz ciengx mingh haenx, saekseiz bingh dai ndaw ranz lauheiq cungj mbouj miz vunz raen bw.

Ciuhvunz diuzloh ut bae goz dauq, gij roensaejgaeq ndaw mbanj byaij gvaq, youq rog gunghcoz raen gij funghgingj gyaeundei, hix gaenriengz seizndei geq bae lo. Seizneix ndwn youq baksok ndwenngoenz, dauqngeix gij roen byaij gvaq, sojmiz gij saeh gaenq deng ndwenngoenz vaq baenz fwjhau fwjndaem. Ngeux gyaeuj dauq yawj, citgoj seiz lij mbauqcoz neix gaenq deng yaemz youq ndawsim roxnaeuz biu hwnj mbwn bae. Aenmbanj ndaw rungh, baengzyoux hujgeiq, gak boux gvaq gak giz, saekseiz ndaej raennaj, saekseiz caiq hix mbouj doxraen, haemz hix ndaej, you hix bah, geq couh geq lo, bouxlawz naengz geq bienq oiq? Dai ndaej dauq lix? Bouxlawz youh dingjgeng ndaej mbouj haeuj yaemgan ne? Bouxvunz doekseng roengzdaeuj, wng haisim gvaq ndei moix ngoenz, couh dangq youq ndaw aen seiqgyaiq neix cunzcet mbat ndeu, hix suenq dwg doiq sengmingh fucwz lo, dai hix da laep lo.