□bonjbauq gicej Vangz Hauyinz Dangz Lungz

Binhyangz Yen Couhhih Cin Lungzdangz Siujyoz dieg youq baihbaek Couhhih Cin, 1966 nienz hainduj laeb. Aen hagdangz neix fuzvu vunz Lungzdangz Cunh, aen cunh neix dwg ranghdieg Boux- cuengh、Yauzcuz comzyouq, miz 2600 lai vunz. Ndaw hagdangz seizneix miz 181 boux hagseng, ndawde it daengz roek nienzgaep 149 boux, yozcenz- banh 32 boux. Miz gyau cizgungh 12 boux. Aen hagdangz neix dwg Cuengh Gun song saw vah sonhag saedniemh hagdangz, guh Cuengh Gun song saw vah sonhag. Banh minzcuz gyauyuz hawj vunzlai hab’eiq, neix dwg hongsaeh goekgaen aen hagdangz neix. Lai bi daeuj, Lungzdangz Siujyoz ginggvaq lai daih vunz doengzcaez haenqrengz, mboujduenh hawj ciz- lieng sonhag ndaej daezsang hwnjbae, vih guekgya、sevei beizyangj le haujlai vunzcaiz maenhndei.

2012 nienz, bang lingjdauj moq hwnjdaeuj lo, dingh le hwngfat muzbyauh: Haenqrengz dawz hag- dangz dajcaux baenz aen hagdangz Cuengh Gun song saw vah caemhcaiq minzcuz daegsaek noengzna, beiz- yangj vunzcaiz saujsu minzcuz, swnjcienz vwnzva minzcuz, vih vwnzva dangdieg、minzcuz gyauyuz okrengz. Vih guh daengz aen muzbyauh neix, gyoengqde haenq- rengz cengndaej gak fuengmienh haeujcoengh, gaenh geij bi neix, hagdangz gak fuengmienh cungj ndaej hwngfat baenaj.

2012 nienz, youz Gvangjsih Gyauyuzdingh haeujcoengh, aen hag- dangz neix ndaej buedhawj 10 fanh maenz cienmonz cawx gij doengh- yiengh yijyinh sezbei sonhag Cuengh Gun song saw vah, gya miz le buek denswj sezbei ndeu, hawj aen hagdangz neix guh yendaiva sonhag laeb ndei giekdaej.

Youz Binhyangz Yen Minzcuzgiz haeujcoengh, aen hagdangz neix gya cawx le gij doenghyiengh gicaiz guh saujsu minzcuz conzdungj dijyuz yindung, youq 2014 nienz haggeiz seizcou gya cawx le 70 dauq ndang- daenj saujsu minzcuz nem sezbei byaujyenj, lai ndei hawj vwnzva minzcuz haeuj ndaw hagdangz.

Haenqrengz haeujsim bae guh gij hozdung doxdax gvendaengz Cuengh Gun song saw vah sonhag. Lumjnaeuz guh hozdung doxdax aeu Vahcuengh doegsaw, linghvaih bae daengz hagdangz wnq hag ging- niemh, caeuq gyoengq lauxsae hagdangz wnq doxgyau. Lumjnaeuz caeuq Bwzsanh Siujyoz doengzcaez guh hozdung, miz doxdax gangj gojgaeq Vahcuengh、doxgyau sonhag Cuengh Gun song saw vah、doxdax sonhag Cuengh Gun song saw vah daengj. Caeuq ndaw swcigih gak hagdangz beixnuengx doxgyau, 2008 nienz, daengz Dwzbauj Yen guh hozdung doxgyau sonhag Cuengh Gun song saw vah; 2011 nienz, caeuq Majsanh Hozcoz Siujyoz doxgyau daengj. Doenggvaq doxgyau, daezsang le suijbingz sonhag Cuengh Gun song saw vah.

2013 nienz haggeiz seizcou, aen hagdangz neix youz Binhyangz Yen Minzcuzgiz nem Couhhih Cin Cungsim Yozyau roengzrengz haeuj- coengh, gawjbanh le daih’it gaiq saujsu minzcuz conzdungj dijyuz yindungvei, guh ndaej swnhleih. Daengx hagdangz it daengz roek nienzgaep hagseng cienzbouh camgya. Baez yindungvei neix gungh guh le haj aen doxdax hanghmoeg, baugvat dik lwggienq、sam vunz haizgieg beij vaiq、ringx gengxdiet、dwk lwggyangq、lai boux diuqcag. 2014 nienz haggeiz seizcou, youz ndaw yienh minzcuzgiz haeujcoengh, aen hagdangz neix gawjbanh le daihngeih gaiq saujsu minzcuz conzdungj dijyuz yindungvei, guh ndaej swnhleih.

Linghvaih, aen hagdangz neix gonqlaeng youq 2014 nienz nem 2015 nienz haggeiz seizcou guh minzcuz funghcingz haeuj hagdangz vwnzyi comzyienj hozdung. 2014 nienz haggeiz seizcou gya cawx le 70 dauq ndangdaenj saujsu minzcuz nem sezbei byaujyenj, hawj hagseng lai gyaezmaij minzcuz conzdungj dijyuz nem vwnzva minzcuz, hawj aen hagdangz neix laeb ndei giekdaej, lai ndei guh minzcuz vwnzva gyauyuz、minzcuz vwnzva haeuj hagdangz, hix vih aen hagdangz neix lai ndei hwngfat baenaj.