Guengjsae cawz ndaej demgya song fanh bingzfueng goengleix dieg- hawq le, lij lai ndaej benq haij he, sienqhamqhaij raez miz 1595 goeng- leix. Gizneix daejhaij bingzrwd, dohraeuj caeuq gyu bienqvaq mbouj hung, gij doxgaiq haij ok lai cungj lai yiengh, giz ndaej dwklauz gij doxgaiq haij ok gvangqlangh, giz haifat baenz aensok mbouj noix, guh gij hong gyu、ciengx bya、dwklauz gij doxgaiq haij ok caeuq dajyinh, roennaj gig ronghsag.

Boux cungjdungj daihleix gonq gozminzdangj Lij Cunghyinz bi 1966 nienzco dauqma Guengjsae ngonzyawj ranzmbanj de, Veiz Gozcingh daengj goengdaeuz swcigih gaisau gij cingz- gvang Guengjsae hawj de seiz, Lij Cunghyinz dingqnyi gij dieg Lenzginh gaxgonq gaenq youz Guengjsae guenj le, vuenheij raixcaix dwk naeuz: “Gienh saeh neix liux mboujhwnj a, gou guenj Guengjsae seiz, danghnaeuz aeu Ginhcouh gvaqdaeuj, mbouj rox yaek ok saeh maz hung okdaeuj, sou mbouj miz saek di saeh couh guh baenz lo, gou caen boiqfug gung- canjdangj sou hungmbwk!” Veiz Gozcingh gej naeuz:“Gungcanjdangj dou gangj daengx guek dwg buenz geiz ndeu, cijaeu gangj cingcuj dauhleix, lwgminz couh rox lijgaij caeuq yungjhu.”

Guengjsae miz benq haij ndeu le, Veiz Gozcingh naemj gij vwndiz engq lai couhdwg baenzlawz baghai diuz- roen okhaij Guengjsae. Bi 1966 nienzco, de ngamq daj diegrog liuzyangj dauqma mbouj miz geij nanz, Cinz Yinggih bae ra de doxyaeng gij hong, de vix mbaw deihdoz gwnz ciengz he doiq Cinz Yinggih naeuz: “Yinggih, mwngz yawj, gij guekgya caeuq aensingz gwnzbiengz fanzdwg youq henzhaij, ceng mbouj geijlai cungj fatdad, youq guek raeuz gij swngj henzhaij ginghci itbuen hwngfat hix ndaej vaiq gvaq gij swngj dieghawq, vihmaz ne?” Cinz Yinggih caengz caj de gangj roengzbae, couh gangj yawjfap swhgeij okdaeuj:“Cujyau dwg aenvih baengh hong hangzhaij, gyaudoeng bienhleih, ngaenzgoek dajyinh noix.”

Veiz Gozcingh naeuz:“Dang- yienz, hix dwg aenvih baengh hong haijok ndaej fazcanj, hoeng cujyau vanzlij dwg baengh hong hangzhaij.” De youh vix mbaw deihdoz wnq naeuz:“Mwngz yawj, aen diegyouq Guengjsae raeuz seizneix gig ndei ha! Naj coh daihhaij, depgyawj Doengnamzya, baihlaeng baengh Daihsaenamz. Yinz、Gvei、Conh sam aen swngj dieghawq Daihsaenamz neix swhyenz fungfouq, vunz hix lai, gyoengqde yinh huq haeujok, aen bak okhaij ceiq gyawj youq gyawz ne? Couh youq Guengjsae. Seizneix gyoengqde doenggvaq Can’gyangh、Gvangjcouh bae yinh, roen gyae lai. Doeklaeng raeuz guh baenz gij sok yienhdaihvaq caeuq gij sienqgyau- doeng doeng coh aensok le, couh ndaej baenz aen bak okhaij ceiq ndei Daihsaenamz lo. Lohdiet Namz-Gunh caeux couh naeuz yaek hwnjmax lo, cijdwg aenvih guekgya ginghci haemzhoj deng ngaiznyed, gou yawj vaiqmenh yaek ndaej hwnjmax, diuz lohdiet neix baez doeng, youh miz aensok caeuq gij sezbei boiqdauq bietaeu, gij huq Daihsaenamz couh rox daj giz raeuz haeujok lo.”

Cinz Yinggih naeuz:“Guh aensok aeu daez hwnj yizcwngz daeuj ngeixyaeng.”

Veiz Gozcingh naeuz:“Raeuz seizneix couh wnggai siengj daengz bouh geiz neix.”

Gij siengjfap , hix lwnh hawj Gyauz Yaujgvangh daengj geij boux suhgi nyi gvaq, caezgya cungj doengzeiq gij yigen de. Gyauz Yaujgvangh lij nyinhnaeuz, couhcinj guh Lohdiet Namz-Gunh deng ngaiznyed, raeuz bonjfaenh hix aeu gag siengj banhfap, caenhvaiq dwk hai diuz roen neix, leihyungh aen diegyouq ndeiraeuh raeuz, gyavaiq bae hwngfat ginghci .

Mboujgvaq, aenvih ngaenzcaiz deihfueng mizhanh, youh bungz daengz “vwnzgwz” hainduj, gienh saeh guh aensok couh deng daengx 2 bi.

1968 nienzco, aen diuzgen baihrog he hai le diuzroen hawj Guengjsae guh aensok.

(caengz sat)