3 nyied 10 hauh, Ningzmingz Yen Aiden Cin Aiden Segih gizdieg youq henzgyaiq Cungguek Yeznanz haenx banh conzdungj “ngeih nyied ngeih” miuhhoih, vunzlai henzgyaiq Cungguek Yeznanz faenfaen daeuj camgya aen hoihhoengh minzsuz neix, Ningzmingz Yen Gyauhgingj Dadui Ginhgoz Senhconzdui leihyungh aen seizndei neix habseiz guh senhconz gyaudoeng ancienz cihsiz caeuq faplwd fapgvi. Haeuj cieng daeuj, Ningzmingz Yen gak yanghcin、 gak mbanj laebdaeb banh conzdungj miuhhoih caeuq ciet fwenbo, aen yienh neix gyauhgingj dadui roengzsim cujciz “ginhgoz senhconzdui” aeu sam boux gyauhgingj mehmbwk gapbaenz haenx, bae daengz gak dieg banh miuhhoih、 ciet fwenbo haenx, yiengq vunzlai senhconz gyaudoeng ancienz cihsiz, daezsang gyaudoeng ancienz yisiz, baujmaenh vunzlai okrog an’an onjonj.

(Couh Yizgangh/周贻刚 Nungz Cidingz/农志婷)