De gipmuengz cuengq fwngz, gaendwk mo, youhcaiq mo dawz gik din Dindaemq 6. Dinsang 9 gipmuengq yut fwngz doxdauq, caiq mo, mo dawz fajfwngz he, dwg fajfwngz Dindaemq 6. Dinsang 9 nyinhnaeuz mbouj ndei eiqsei saek di, swnh de caengz gangj doiq mbouj gvaq, Dindaemq 6 couh daj laj congz ndonj okdaeuj, cuengq gonj bit daengz dangqnaj Dinsang 9 bae. Laxlawz de gaenq bang Dinsang 9 gip ndaej gonj bit lo.

Dinsang 9 ngaem gyaeuj yawj de. Dindaemq 6 ngiengx gyaeuj yawj de. Song boux cungj riu ngawh liux.

Riunyumj baenz rengz raixcaix, laeglemx dawz diuz ciengz ndaw sim songde cek bae lo. Gyoengqde seizneix cij roxyiuj，laxlawz song vunz yaek baenz baengzyoux hix mbouj nanz law.

Dinsang 9 caeuq Dindaemq 6 doengzcaez bae hagdangz, cuengqhag le youh doxcaez dauqma. Gyoengq doengzhag gingciengz raen songde doxcaez baet deih、doxcaez dwk giuz、doxcaez doeg haet. Vunzlai hix gingciengz raen gyoengqde youq haenznaz gwnz ndoi guzcaemz. Youq seiz cuengqgyaj, songde lij doxcaez bae aeu fwnz、doxcaez bae langh cwzvaiz、doxcaez bae ap raemx.

Songde baenz aen gingjsaek geizheih lajmbanj he.

Vunzlai gingciengz danqheiq, hojsik dwk naeuz songde boux he sang lai, boux he daemq lai, doengzcaez byaij doxca gvaq lai, danghnaeuz boux sang haenx daemq di he, boux daemq haenx sang di he couh ndei lo.

Ngoenz he, Dinsang 9 caeuq Dindaemq 6 doengzcaez bae hagdangz, gwnz mbwn sawqmwh doek fwn lo. Mwhhaenx caenhmiz Dindaemq 6 daiq aen liengj he. Dindaemq 6 dawz liengj, ngamq ndaej dangj daengz gwnz ga Dinsang 9. Dindaemq 6 doeknaiq dwk naeuz:“Danghnaeuz gou caiq sang di couh ndei lo.”Dinsang 9 riu naeuz:“Baenzneix couh gig ndei.”Gvaqlaeng Dindaemq 6 hawj Dinsang 9 gaem liengj, hoeng Dinsang 9 sang lai, Dindaemq 6 ndwn youq henz de cungj mbouj ndaej gang liengj. Dinsang 9 doeknaiq naeuz:“Danghnaeuz gou daemq di couh baenz lo.”Dindaemq 6 riuriu naeuz:“Baenzneix couh gig ndei.”

Song vunz ndwn youq ndaw fwn riungawh, mbouj rox baenzlawz yungh aen liengj neix cij dangj ndaej song vunz. Gvaqlaeng Dinsang 9 naeuz de mbouj gang liengj, hawj Dindaemq 6 gang. Doeklaeng, gyoengqde doxyaeng ndei, song vunz doxlwnz gang liengj. Yienghneix song boux cungj ngaiz dumz liux. Raen songde ngaiz fwn rwed dumz baenzneix, gyoengq doengzhag nyaenx mbouj ndaej riu gyoengqde:“Raen luba, sou ha, boux he sang lai, boux he daemq lai, miz liengj couh lumj mboujmiz.”Hoeng songde gagnyinh, buhvaq ngaiz dumz hix gig ndei.

“Makseq mbanj gou baenz lo, singgeiz roek gou daiq mwngz bae mbaet.”Dinsang 9 baet gij raemxfwn gwnz byoem riu dwk caiq gya gawq dem,“danghnaeuz dou cungj mbouj baenz ae.”

“Ndei ha.”Dindaemq 6 nyaenx mbouj ndaej myaiz rih lo, hix riu dwk caiq bouj coenz he,“danghnaeuz dou mbouj baenz ae.”

Caeklaiq songde caenh lae mug, mbouj baenz ae. Yienghneix couh ndaej doengzcaez bae mbaet makseq lo.

Dinsang 9 sangvidvid haenx ndwn youq laj gomakseq baez yaengx fwngz couh mbaet ndaej haujlai makseq youh hung youh sug haenx, yienzhaeuh ndenq hawj Dindaemq 6 ndwn youq laj gomak haenx gwn. Dindaemq 6 bang mbouj ndaej Dinsang 9 saek di, miz di mbouj ndei eiqsei, dawz coenz vah bouxwnq daeuj gangj:“Ae, gou daemq lai lo, danghnaeuz caiq maj sang di dem couh ndei lo.”

Dinsang 9 ngaem gyaeuj yawj de, naeuz:“Gaej cuengq gij vah bouxwnq haeuj ndaw sim bae. Baenzneix couh gig ndei.”

Dinsang 9 mbaet di makseq he cuengq daengz gwnz diegnywj. Song boux naengh roengzdaeuj caemh gwn makseq.

Dindaemq 6 buenz ga naengh, youq ndaw rumz bibuengq dwk gwn makseq, cwxcaih raixcaix. Dinsang 9 hix siengj lumj Dindaemq 6 nei buenz ga naengh, hoeng song diuz ga raez de ut gvaqdaeuj lij ndaej, couh dwg buenz naengh mbouj baenz. Dinsang 9 sawq geij baez cungj mbouj ndaej, caenhndei iet ga youq baihnaj, de hojsik dwk naeuz:“Ae, ga gou raez lai lo. Danghnaeuz gou daemq di he couh ndei lo.”

Dindaemq 6 bekbek ga raez Dinsang 9, riunyumj nai de naeuz:“Yiengjneix couh gig ndei.”

Song boux mwngz yawj gou gou ngonz mwngz, riu lo, gyoengqde bau makseq hwnj gwnz mbwn caiq aj bak caj. Gwn imq le, riu gouq le, doxcaez aj gen aj ga dingjai youq gwnz diegnywj, boux he raezrang, boux he dinjdet.

Boux raez boux dinj ninz youq laj gomakseq, yawj hwnjbae yienznaeuz hung nyaeq mbouj doxdaengj, hoeng yawj nanz le couh gagnyinh, gizsaed baenzneix hix gig ndei.

(6 sat)

长长的手赶紧放开，接着摸，又再次摸到矮脚6的脚。长长的手赶紧放开，再摸，摸到一只手，是矮脚6的手。高脚9终于感到不好意思了，可矮脚6赶在他说对不起之前从桌子底下冒出来，把笔放在高脚9面前。原来他已经帮高脚9捡到笔了。

高脚9低头看他。矮脚6抬头看他。两人傻傻地笑了。

微笑有着神奇的力量，悄悄地拆除他们筑在心里的那道防御之墙。他们这才明白，原来两个人要成为朋友并不是那么难的事。

高脚9和矮脚6上学的时候一起结伴去学校，放学的时候又一起回家。学生们经常看到他们俩一起扫地、一起打球、一起晨读。人们也经常看到他们俩走在田地间的身影。他们俩在节假日的时候还一起打柴、一起放牛、一起玩水。

这两个人成为这个乡村间最让人好奇的风景。

人们常常叹一声气，有点可惜地说他们俩一个太高了，一个太矮了，走在一起过于悬殊，要是太高的那个矮一点，太矮的那个高一点就好了。

有一天，高脚9和矮脚6一起上学的时候，天突然下雨。当时只有矮脚6带了一把伞。矮脚6撑起伞，却只能帮高脚9挡到脚。矮脚6遗憾地说：“我要是高一点就好了。”高脚9笑笑说：“这样就很好。”然后矮脚6把伞交给高脚9来撑，可高脚9太高了，站在身边的矮脚6等于没有被伞遮盖到。高脚9遗憾地说：“我要是矮一点就好了。”矮脚6笑笑说：“这样就很好。”

两人站在雨中傻笑，一时不知该如何更好地使用这把伞。后来高脚9说他不用雨伞，让矮脚6用。矮脚6说他不用雨伞，让他用。最后，他们俩商量好，两人轮换撑伞。结果两个人都被淋得透湿。看到他们俩淋得一身雨水，同学们忍不住笑他们：“看见了吧，你们呀，一个太高了，一个太矮了，有雨伞也等于白有。”可他们俩觉得，即使是这样也很好。

“我们村的杨梅熟了，星期六我带你去摘一些吃吧。”高脚9甩了一下头发上的水，笑着再加一句，“如果我们都没有感冒的话。”

“好呀。”矮脚6忍不住吞了一口口水，也笑着再补一句，“如果我们都没有感冒的话。”

万幸的是他们俩都只是流了一点清鼻涕而已，没有感冒。所以他们的杨梅盛宴之约得以实现。

高高的高脚9站在杨梅树下伸手就能摘到很多又大又熟的杨梅，然后递给站在树下的矮脚6吃。矮脚6帮不上高脚9的忙，有点过意不去，把别人说过的话拿出来说：“唉，我太矮了，要是能高一点就好了。”

高脚9低头看他，说：“别在意那些话。这样就很好。”

高脚9摘了一堆杨梅放在草地上。两人坐下来开心地享受杨梅盛宴。

矮脚6盘着腿坐，在风中左右摇晃着吃着杨梅，一副很悠闲惬意的样子。高脚9也想像他那样盘腿坐着，可他那长长的腿曲起来还可以，盘起来就困难了。高脚9试了几次都不成功，只能把腿长长地摊伸出去，略有遗憾地说：“唉，我的腿太长了。我要是矮一点就好了。”

矮脚6拍拍他的长腿，微笑着安慰他说：“这样就很好。”

两人互相看看，笑起来，把杨梅抛到空中再张大嘴巴等着接。吃饱了，笑够了，一齐张开手和脚仰躺在草地上，一个成了瘦瘦的长长的“大”字，一个成了壮实的短短的“大”字。

睡在杨梅树下的这两个“大”字，看上去虽然大小悬殊，但看着看着就会觉得，其实这样也很好。

（6 完）