“Runghraix” dwg aen coh mbanj Bingzgoj Yienh Majdouz Cin ndeu, miz roek aen mbanj swhyienz, gyoengq coh mbanj faenbied dwg Ndaw- ngaenz、Bouxnda、Raixgwnz、Raixlaj、Runghbang caeuq Runghroed. Aen coh “Runghraix” neix couhdwg “Runghbang”、“Runghroed” caeuq “Raixgwnz”、 “Raixlaj” seiq aen mbanj neix aeu cih “rungh” caeuq cih “raix” daeuj habbaenz. Hoeng, gij coh “Ndawngaenz”、“Bouxnda”、“Raix- gwnz”、 “Raixlaj”、 “Runghbang” caeuq “Runghroed” vihmaz heuhguh yienghneix ne? Mbouj miz geijlai vunz rox aen laizyouz neix.

Cienznaeuz mizmbangj bing byoem raez dawz ngaenz, rox budui youq baihnaj hoenx baih deng mued caez lo, couh doxyaeng dawz gij ngaenz neix haeuj rungh bae yo. Mizmbangj ngaenz dawz haeuj ndaw gamj bae, aen gamj he cang rim le couh aeu ndaek rin ngamq hab aen bak gamj hung ndeu dimz haeujbae. Mizmbangj ngaenz couh moek roengz laj namh bae, aeu ndaek rin youh benj youh hung he daenz youq baihgwnz caiq daem namh. Caemhcaiq cuengq vah okdaeuj naeuz gizneix heuhguh gumhngaenz, vanzlij baij vunz hen ngaenz dem. Gyoengq vunz neix naeuz swhgeij dwg “Bouxhenngaenz”. Gyoengq vunz rog hixnaengz mbouj aeu cih “hen”, couh heuh gyoengqde guh “Bouxngaenz”. Bi dem bi gvaq- bae lo, gyoengq vunz neix yied sanj yied lai, laebbaenz aen mbanj he, gyoengqvunz couh heuh aen mbanj neix guh “Bouxngaenz”. Doeklaeng, gyoengqde roxnyinh “Bouxngaenz” mbouj beij “Ndaejngaenz” ndei. Hoeng, “Ndaejngaenz” youh daiq mingzyienj lai, ndigah couh gaij aen coh mbanj baenz “Ndawngaenz” lo.

Doeklaeng, miz boux vunzhek he laeglemx daengz Ndawngaenz daeuj cam gij ngaenz youq gizlawz. Gyoengqvunz Ndawngaenz vix baih- doengbaek naeuz:“Bouxnda gaenq aeu hanz ram gij ngaenz gvaq gemh bae lo.” Bouxhek neix dingq le doq gvaq gemh bae ra bouxnda. De cam bouxnda, bouxnda couh vix baihbaek naeuz: “Miz vunz gaenq rap daengz gwnz haenx bae raix lo”. Bouxhek neix dingq le ndawsim gag naemj: Gyoengq vunz neix mbouj rox ngaenz dijbauj, dawz bae raix caez, gou gaenjgip bae aeu cij ndaej. Yienghneix de couh buetfwfw dwk bae daengz giz bouxnda vix. Youh cam bouxraix, bouxraix vix baihdoeng naeuz:“Raix roengz laj haenx bae lo”. Bouxhek neix byaij daengz baihdoeng, youq gwnz yawj roengz laj bae hix mbouj raen gij ngaenz saek di, roxnyinh swhgeij deng yaeuh, cijndei dauqbae lo. Naeuz gij ngaenz neix youq gizhaenx yo roxnaeuz deng bae raix, cungj dwg yaeuh bouxhek haenx. Gizsaed gij ngaenz neix gaxgonq youh deng dawz daengz aen gamj hung ndaw bya baihsaebaek he bae yo lo. Bouxnda caeuq bouxraix doeklaeng aeu bawx, miz lwg miz lan, menhmenh vunz lai lo, hix laebbaenz song aen mbanj, gij coh mbanj faenbied dwg Bouxnda caeuq Bouxraix. Doeklaeng Bouxraix caiq baen baenz song baih——Bouxraix baihgwnz caeuq Bouxraix baihlaj. Ndigah Bouxraix aen mbanj he couh bienqbaenz song aen mbanj——Raixgwnz caeuq Raixlaj.

Aenvih mwhhaenx cungj senj gyoengqvunz miz rengz ram ngaenz bae yo, ndigah vunz cungj heuh gyoengqde guh “Bouxrengz”. Caemh- caiq dawz ngaenz bae yo ngoenzde, lau miz vunz gaenlaeng bae caeg ngaenz, couh ce geij boux vunz youq buenq roen hen. Aenvih mbangj vunz neix dwg bang dawz gij ngaenz bae yo, ndigah vunz cungj heuh gyoengqde guh “Bouxbang”. Doeklaeng hix cungj laebbaenz mbanj lo, vunz couh heuh gij mbanj guh Bouxrengz caeuq Bouxbang.

Gangj daeuj geizheih, miz hwnz he, song bouxdaeuz Bouxrengz caeuq Bouxbang fangzhwnz cungj doxdoengz caez: Miz duz lungz he ndongqsaksak, youq gwnz mbwn doek roengzdaeuj, aen gyaeuj de cingqngamj goemq youq gwnz bya yo ngaenz, aen nyauj swix baihlaeng doek daengz henz Boux- bang. Ngoenzlaeng, song bouxdaeuz neix raennaj couh gangj daengz gienh saeh neix, roxnyinh bouxsien mizeiq soengq gyoengqde gij coh mbanj. Ndihgah couh doxyaeng gaij gij coh mbanj baenz Lungzrengz caeuq Lungzbang. Gyoengqvunz rog raen song aen mbanj neix cungj youq ndaw rungh, boux riuz boux couh heuhguh baenz “Runghrengz” caeuq “ bang”.

Gvaq mbouj geijlai nanz, youh aenvih youq henz bya yo ngaenz miz goengq bya he hwnj faexroed gig lai, goengq bya neix heuhguh “Byaroed”, ndigah bouxdaeuz Rungh- rengz couh gaij aen coh mbanj baenz “Runghroed”.

Yienghneix couhdwg gij coh roek aen mbanj Rungh baenzlawz daeuj lo. Seizneix gij coh mbanj youz haidaeuz dwg Bouxngaen、Bouxnda、Bouxraix、Bouxbang caeuq Bouxrengz bienqbaenz Ndawngaenz、Bouxnda、Raixgwnz、Raixlaj、Runghbang caeuq Runghroed.

Rungh-

raix