□bonjbauq gicej Dangz Lungz Vangz Hauyinz

Binhyangz Yen Couhhih Cin Bwzsanh Siujyoz 1958 nienz laeb, aen hagdangz neix seizneix miz it daengz roek nienzgaep, roek aen ban, 272 boux hagseng, 15 boux lauxsae. Doenghboux hagseng dingzlai dwg vunz Bouxcuengh、Yauzcuz. 1984 nienz aen hagdangz neix ndaej dingh guh Cuengh Gun song saw vah saedniemh siujyoz, 2014 nienz ndaej dingh guh minzcuz vwnzva gyauyuz sifan hagdangz. Lai bi daeuj, aen hagdangz neix doenggvaq sonhag Sawcuengh, hawj banhhag daegsaek noengzna.

Aen hagdangz neix dingh son- gyauq gocwngz dangdieg, roengzrengz sonhag Sawcuengh, hawj hagseng roxyiuj vwnzva Bouxcuengh, hag saw Bouxcuengh. Youq guh sonhag seizde, caemhcaiq sonhag vah saw、yinhyoz、foux nem dijyuz minzcuz.

Aen hagdangz neix bien le sawson dangdieg, dangz vah saw minzcuz aeu Vahcuengh biucinj hwnj, hawj hagseng rox aeu Vahcuengh ciengqgo、doeg sei、gangj gojgaeq、fanhoiz daengj; dangz foux minzcuz son hagseng moix aen haggeiz aeu rox song cungj foux minzcuz; dangz yinhyoz minzcuz son’gyauq hagseng rox ciengq《Fwen Couxhek》《Fwen Gingqlaeuj Bouxcuengh》doengh diuzgo Bouxcuengh. Linghvaih, aen hagdangz neix haenqrengz guh minzcuz conzdungj dijyuz, miz foux- faexsaux、 haizgiegraez、 bau aen- domq、dik lwggienq、ringx gengxdiet、diuqcag. Daj 2009 nienz daeuj, aen hagdangz neix genhciz moix bi banh baez saujsu minzcuz yindungvei ndeu, yinx hagseng gyaezmaij dijyuz minzcuz, lai rox dijyuz minzcuz.

Moix bi daengz liggaeuq sam nyied sam, aen hagdangz neix dawz ngoenzciet Bouxcuengh dingh guh aen ciet baijok vwnzva minzcuz. Daj 2009 nienz daeuj, moix bi guh baez vwnzyi comzyienj ndeu, dazyinx hagseng gyaezmaij gofoux minzcuz, swnjcienz vwnzva minzcuz.

Aen hagdangz neix moix bi cungj guh Cuengh Gun song saw vah gyauyenz hozdung, ndawde miz doxdax aeu Vahcuengh biucinj gangj gojgaeq, doxdax hwnj dangz goq Sawcuengh maenhndei daengj, yaugoj cungj ndei.

Aen hagdangz neix lij roengz- rengz comz lauxsae camgya dangz goq Sawcuengh beizyin, gij beizyin neix youz Swcigih Gyauyuzdingh、Nanz- ningz Si Gyauyuzgiz cawjbanh. Neix hawj lauxsae daezsang suijbingz sonhag Sawcuengh, daezsang Saw- cuengh sonhag cizlieng.

Aen hagdangz neix sonhag saw vah minzcuz aeundaej cingzcik ndei. Daj 1984 nienz sonhag Cuengh Gun song saw vah daeuj, vih cunghyoz nem sevei beizyangj geij cien boux hagseng saujsu minzcuz; daj 1990 nienz daeuj, gaenq miz 600 lai boux hagseng saujsu minzcuz gauj hwnj minzcuz cunghyoz. 2010 nienz 12 nyied, boux lauxsae Lingz Li daibyauj Binhyangz Yen camgya daengx gih lauxsae Cuengh Gun song vah doxdax gangj gojgaeq, ndaej ngeihdaengj- ciengj. 2012 nienz、 2013 nienz aen hagdangz neix camgya Vahcuengh Sawcuengh Suijbingz Gaujsi, miz 6 boux ndaej gaugaep ngeihdaengj, boux ndeu ndaej cogaep ngeihdaengj. 2014 nienz 12 nyied, boux lauxsae Lingz Li youq gwnz hozdung daengx gih aeu Vahcuengh biucinj gangj gojgaeq daihhoih dang bouxcujciz.

Aen hagdangz neix sonhag minzcuz vwnzyi cingzcik hix ndei. 2009 nienz 12 nyied, hagseng Hoz Yinghniz daibyauj Binhyangz Yen camgya daih’it gaiq daengx gih siujhagseng doxdax gangj gojgaeq Vahcuengh, ndaej samdaengjciengj. 2011 nienz 12 nyied, hagseng Veiz Ginhcui daibyauj Binhyangz Yen camgya daihngeih gaiq daengx gih siujhagseng doxdax gangj gojgaeq Vahcuengh, ndaej samdaengjciengj. 2012 nienz 12 nyied, hagseng Hoz Yingzcaij daengj daibyauj Binhyangz Yen camgya daengx gih siujhagseng Vahcuengh caizyi byaujyenj, ndaej samdaengjciengj. 2014 nienz 12 nyied, hagseng Lingz Yijsinh daibyauj Binhyangz Yen camgya hozdung doxdax aeu Vahcuengh biucinj gangj gojgaeq, ndaej samdaengjciengj.