Ciuhvunz yaek siengj gvaq ndaej ndei, couhdwg mboujduenh bae gouzra vuenyungz caeuq vaiqvued, caenh- liengh ndojhai roxnaeuz gemjsiuj mbangj loeklawq caeuq siengsim. Soqlaiz mbouj raen miz bouxlawz gamsim bae genj aeu daemdengj、loeklawq caeuq ienqhoij.

Danhseih, ciuhvunz raeuz, youq mwh sengmaj、hagsib、gunghcoz、gwndaenj ndawde, youh miz geijlai boux gvaq ndaej swnhswnh leihleih、mbouj miz daemdengj、mbouj miz loeklawq gvaq ne? Youq ndaw swnghhoz, cungj dwg nyangz daengz gij daemdengj baenzneix roxnaeuz baenzhaenx、rox hung rox iq, leuxle miz gij goj soemj、manh、diemz、saep okdaeuj. Goulau yienghneix couhdwg ciuhvunz raeuz aeu baenzneix bae byaij lo. Danghnaeuz ciuhvunz mbouj miz daemdengj gvaq, ciuhvunz raeuz couh lumj boi raemxgoenj hau ndeu, mbouj miz feihdauh, neix mbouj suenq dwg ciuhvunz caezcingj ndeu.

Vahsug naeuz:“Lajgoek faexhung nya mbouj noengq”. Mboujlwnh bouxlawz, siengj guh baenz fan saehnieb ndeu, aeu nyaenxsouh ndaej mbangj daemdengj, aeu haenqhaenq ok daihbaj rengz cij ndaej. Neix dwg aenvih, miz daemdengj cij miz doenghlig, miz daemdengj cij rox bae gouzra. Youq gwnz diuzroen gumz- gamx, daemdengj dwg gij caizfouq hungloet ndawsim, muznanh yied lai, caizfouq couh yied lai, soundaej couh yied hung. Saetbaih baez ndeu, baenzgoeng gihvei couh liz raeuz yied gyawj; loengloek baez ndeu, ciuhvunz couh lai singj baez ndeu; saetnguh baez ndeu, lijgaij swnghhoz couh lai laeg di he; muznanh baez ndeu, nyinhrox saehcingz couh lai di ndeu.

Najdoiq daemdengj, bouxyox couh suk gen suk ga, uk luenh gyaeuj ngunh, da yawj mbouj raen gyae, doeklaeng cijnaengz laemx youq ndaw gumzgamx; boux maenh’ak haengj roemx baenaj, cix dawz daemdengj dangguh muzlienh ceiqheiq, naengz gwn haemz naih hoj, dawz gij haemzhoj、gumzgamx cienjvaq baenz cungj rengzak ndeu, roemx bae coh baihnaj. Hamj gvaq gumzgamx, couh dwg haij gvangq mbwn sang.

Ndigah, dang mwngz bungz daengz gij saeh mbouj swnhsim seiz, roxnaeuz bungz daengz gannanz caeuq daemdengj seiz, mboujyawx ndongj- ndat bae najdoiq de, okrengz haenq buek, mboujduenh bae caezcienz ciuhvunz. Couhcinj ciuhvunz raeuz hamj mbouj ndaej gvaq giz gumzgamx, youh baenzlawz ne? Swhgeij gag dwkhingz swhgeij lo, neix miz maz najnyaenq dem? Caiq gangj, gumz- gamx lix seiz hamj mbouj ndaej gvaqbae, couh louzce laj yaemgan caiq bae hamj——danghnaeuz caen miz baenzneix dahraix!